1 Reis 3 - BIBLIA - traduson antigu in Krioulo

Salomon fasi kontratu ku Faraó, rei di Ejitu

¹ Salomon fasi kontratu ku Faraó, rei di Ejitu, i kasa si fiju femia, i lebal pa prasa di Davi, te na tempu ki kaba kumpu si palasiu, ku kasa di SIÑOR, ku mura ku rodiaba Jerusalen.

² Pobu fika e na sakrifika na kaus altu, pabia, te na ki tempu, kasa ka kumpuduba inda na nomi di SIÑOR.

³ Salomon amaba SIÑOR, i yanda konformi leis di si pape Davi, ma un kusa son, i ta sakrifikaba, i ta kema nsensu na kaus altu.

Salomon pidi Deus jiresa

⁴ Un dia rei bai Jibeon pa bai sakrifika, pabia ki kau altu seduba mas importanti di ki tudu. La ki mataba mil limaria, i kema elis riba di ki altar.

⁵ La na Jibeon, SIÑOR Deus bin pa Salomon di noti, na suñu, i falal: “Pidi kusa ku bu misti pa N dau.”

⁶ Salomon falal: “Bu mostra garandi bondadi pa bu servu Davi, ña pape, pabia el i yanda ku bo diritu, na bardadi, ku bon korson. Bu kontinua mostral ki garandi bondadi, manera ku bu dal un fiju ku sinta aos na si lugar na tronu.

⁷ SIÑOR ña Deus, ami bu servu, bu pun pa N rena na lugar di ña pape Davi, ma N sedu mininu inda, N ka sibi fasi e tarbaju.

⁸ N sta na metadi di pobu ku bu kuji, ku sedu un pobu garandi dimas ku ka pudi fasidu konta del, suma ke ciu.

⁹ Asin, bu ta dan korson di ntindimentu pa guberna bu pobu, pa N pudi sibi rapara kil ki bon ku kil ki mau, pabia kal algin ku pudi guberna es bu pobu garandi?”

¹⁰ SIÑOR fika kontenti manera ku Salomon pidi ki kusa.

¹¹ Asin Deus falal: “Suma ku bu pidi e kusa, bu ka pidi rikesa pa bu kabesa, nin mortu pa bu inimigus, ma bu pidi jiresa pa fasi justisa diritu,

¹² N na fasi konformi bu pidin. N na dau un sintidu di jiresa ku ntindimentu, ku ka ciga di ten antis di bo, nin dipus di bo i ka na ten utru suma di bo.

¹³ Tambi N na dau kil ku bu ka pidin, ku sedu rikesa ku gloria. Na bu tempu i ka na ten utru rei ku na justa ku bo.

¹⁴ Si bu yanda na ña kamiñu, bu obdisi ña leis ku ña mandamentus suma ku bu pape Davi fasi, N na dau vida kumpridu.”

¹⁵ Salomon korda, i rapara kuma i seduba suñu. I bai Jerusalen, i bai firma dianti di arka di kontratu di SIÑOR, i sakrifika ofertas kemadu ku ofertas di pas, i fasi festa pa jinti di si sirvis.

Salomon julga kasu di dus minjer

¹⁶ Un dia dus minjer di mau vida bai dianti di rei.

¹⁷ Un son falal: “Ñu Rei, ami ku e minjer no mora na mesmu kasa. N bin padi fiju oca ki staba la.

¹⁸ Tris dia dipus di N padi, e minjer padi tambi. Manera ku no sta juntu, ningin mas ka staba ku nos na kasa, si i ka anos dus son.

¹⁹ Di noti si fiju muri, pabia i ditaba riba del.

²⁰ I lanta me-noti, i toman ña fiju lungu di mi, oca ku N na durmi, i ditandal lungu di si kurpu; i toma kil si fiju mortu, i ditandal lungu di mi.

²¹ Oca N lanta parmaña pa mamanta ña fiju, N ojal mortu, ma oca kau kaba mansi, N jubil diritu, N oja kuma i ka seduba ña fiju ku N padi.”

²² Ki utru minjer fala: “I ka asin! Mininu bibu i di mi, ki mortu i di bo.” Ki purmeru fala: “I ka bardadi! Ki mortu i bu fiju; ki bibu i di mi.” Asin ke na diskuti dianti di rei.

²³ Rei fala: “Es fala: ‘Ki bibu i ña fiju, ki mortu i di bo.’ Es utru fala: ‘I ka bardadi; ki mortu i di bo, ki bibu i di mi!’ ”

²⁴ Rei fala mas: “Bo tisin spada.” E tisil el.

²⁵ Rei fala: “Bo rapati mininu bibu na dus parti, bo da metadi pa un, metadi pa utru.”

²⁶ Ma kil ku seduba mame di ki bibu i sinti amor pa si fiju, i fala rei: “Ñu Rei pudi dal mininu bibu; ka bo matal!” Ki utru minjer fala: “I ka na sedu di mi nin di bo; bo rapatil.”

²⁷ Rei fala: “Ka bo mata mininu bibu; bo dal pa e purmeru minjer, pabia i el ki si mame.”

²⁸ Oca ku tudu jinti di Israel obi manera ku rei julga ki kasu, e sinti garandi rispitu pa el, pabia e oja kuma jiresa di Deus staba nel pa fasi justisa.