1 Reis 22 - BIBLIA - traduson antigu in Krioulo

Akab fasi kontratu ku Jeosafá

¹ I leba tris anu sin gera entri Siria ku Israel.

² Na terseru anu Jeosafá, rei di Judá, bai visita rei Akab di Israel.

³ Akab punta si ŝefis: “Bo ka sibi kuma Ramot di Jilead i di nos? Ma no na sinta son, sin tomal na mon di rei di Siria.”

⁴ Dipus i punta Jeosafá: “Bu na bai ku mi pa geria kontra Ramot-Jilead?” Jeosafá fala rei di Israel: “Ami N sta suma bo; ña tropas ku ña kabalus e sta suma di bo,

⁵ ma buska konsiju di SIÑOR purmeru.”

⁶ Asin rei di Israel junta anunsiaduris, serka di kuatrusentus omi, i punta elis: “N dibi di bai geria kontra Ramot-Jilead, o pa ka N bai?” E falal: “Bai, pabia SIÑOR na ntregal na mon di rei.”

⁷ Jeosafá punta: “I ka ten inda li utru anunsiadur di SIÑOR ku no pudi pidi konsiju?”

⁸ Rei di Israel fala Jeosafá: “Mbon, i ten inda un omi ku no pudi pidil konsiju di SIÑOR, ma N ka gosta del, pabia nunka i ka ta anunsia un kusa bon aserka di mi, ma son mal. I Mikaias, fiju di Inlá.” Jeosafá falal: “Ñu Rei ka dibi di papia asin.”

⁹ Rei di Israel coma un funsionariu, i falal: “Bai dipresa bu tisin Mikaias, fiju di Inlá.”

¹⁰ Rei di Israel ku Jeosafá, rei di Judá, bistidu di ropa di rei, e staba sintadu, kada kin na si tronu, na prasa, na entrada di porton di Samaria. Tudu anunsiaduris na anunsiaba se dianti.

¹¹ Zedekias, fiju di Kenaaná, i kumpu cifris di feru, i fala: “Asin ku SIÑOR fala: ‘Ku e cifris bu na fidi jinti di Siria tok bu kaba ku elis tudu.’ ”

¹² Tudu anunsiaduris e anunsia di mesmu manera, e fala: “Bai ataka Ramot-Jilead; bu na ngaña vitoria, pabia SIÑOR na ntregal na mon di rei.”

¹³ Ki algin ku bai coma Mikaias i falal: “Ki utru anunsiaduris e pui na un son pa anunsia vitoria pa rei. I minjor bu konkorda ku elis, bu fala bon kusas.”

¹⁴ Mikaias fala: “N jurmenta pa vida di SIÑOR kuma, kil ku SIÑOR falan, el ku N na fala.”

¹⁵ Oca ki ciga nunde rei, kila puntal: “Mikaias, no dibi di bai geria kontra Ramot-Jilead, o no ka dibi di bai?” I falal: “Bai, bu na ngaña vitoria, pabia SIÑOR na ntregal na mon di rei!”

¹⁶ Rei falal: “Kantu bias ku N ten ku falau pa bu kontan son bardadi na nomi di SIÑOR?”

¹⁷ Mikaias fala: “N oja tudu Israel pajiga na montis suma karnelis ku ka tene bakiadur. SIÑOR fala: ‘Esis e ka tene ŝef; minjor kada kin riba ku pas pa si kasa.’ ”

¹⁸ Rei di Israel punta Jeosafá: “Nta N ka falau kuma es nunka i ka ta anunsia bon kusa aserka di mi, son mal?”

¹⁹ Mikaias kontinua i fala; “Sukuta palabra di SIÑOR. N oja SIÑOR sintadu na si tronu; tudu tropas di seu staba lungu del na si mon direita ku skerda.

²⁰ SIÑOR punta: ‘Kin ku na ngana Akab pa i bai geria na Ramot-Jilead, i muri la?’ Un na fala un kusa, utru na fala tambi.

²¹ Dipus un spiritu ciga dianti di SIÑOR, i fala: ‘Ami N na nganal.’ SIÑOR puntal: ‘Di kuma?’

²² I fala: ‘N na bai sedu spiritu di mintida na boka di tudu anunsiaduris di Akab.’ I falal: ‘Bu na pudi nganal. Bai fasil.’

²³ “Gosi bu pudi oja kuma ku SIÑOR pui spiritu di mintida na boka di tudu bu anunsiaduris. SIÑOR purpara mal pa bo.”

²⁴ Zedekias, fiju di Kenaaná, i ciga lungu di Mikaias, i dal bofotada, i puntal: “Kal kamiñu ku Spiritu di SIÑOR bai nel oca ki sai na mi pa bai papia ku bo?”

²⁵ Mikaias falal: “Bu na bin oja kila ora ku dia ciga ku bu kuri pa sukundi na un kuartu di tras.”

²⁶ Rei di Israel fala: “Bo prindi Mikaias, bo lebal pa Amon, ŝef di prasa, ku Joás, fiju di rei,

²⁷ bo fala elis kuma rei fala: ‘Bo fica e omi na kalabus, bo dal son pon ku yagu, tok N riba ku pas.’ ”

²⁸ Mikaias falal: “Si bu riba ku pas, i ta oja i ka SIÑOR ku papiaba na ña boka.” I torna fala: “Abos tudu, bo sukuta ke ku N fala.”

Mortu di Akab

²⁹ Rei di Israel ku Jeosafá, rei di Judá, e bai pa bai ataka Ramot-Jilead.

³⁰ Rei di Israel fala Jeosafá: “N na kamufla pa yentra na gera, ma bu pudi bisti suma rei.” Asin, rei di Israel kamufla, i yentra na gera.

³¹ Rei di Siria daba ja ordi pa si trinta i dus ŝef di karu, i fala elis: “Ka bo geria ku ningin, nin garandi nin pikininu, ma son kontra rei di Israel.”

³² Oca ku ki ŝefis di karu oja Jeosafá, e fala: “Di sertesa es i rei di Israel.” E bai pa el pa atakal, ma Jeosafá grita.

³³ Ŝefis oja kuma i ka seduba rei di Israel, e para serkal.

³⁴ Un soldadu tesanta si mansasa, i manda fleŝa sin pontaria. Fleŝa serta ku rei di Israel, i pasa na metadi di juntura di si armadura. I fala si kondutor: “N molosta risu. Vira karu, bu tiran na gera.”

³⁵ Ki dia, oca ku tropas na geriaba ku forsa, rei sinta nkuñadu na si karu, nunde ki pudi oja sirianus. Sangi di si molostus na laguaba te na fundu di karu. I muri di tardi.

³⁶ Oca sol na noti, ordi pasa na tropas di Israel pa kada kin riba pa si prasa o pa si kau.

³⁷ Asin rei muri. E lebal pa Samaria, e nteral la.

³⁸ E laba si karu na lagua di Samaria. Na ki kau nunde ku minjeris di mau vida ta lababa kurpu, kacuris limbi si sangi, suma ku SIÑOR falaba.

³⁹ Tudu utru kusas ku pasa na renansa di Akab, ku tudu ki fasi, ku kasa di marfin ku tudu prasas ki kumpu, e sta skritu na libru di Storia di Reis di Israel.

⁴⁰ Asin Akab bin diskansa; si fiju Akazias rena na si lugar.

Jeosafá, rei di Judá

⁴¹ Jeosafá, fiju di Asa, kumsa rena riba di Judá na kuartu anu di Akab, rei di Israel.

⁴² Jeosafá teneba trinta i sinku anu di idadi oca ki kumsa rena, i rena vinti i sinku anu na Jerusalen. Si mame seduba Azuba, fiju di Sili.

⁴³ I yanda na tudu kamiñus di si pape Asa, i ka disvia delis; i fasi kusas retu dianti di SIÑOR, ma ki kaus altu ka tiradu; pobu kontinua na sakrifika la, e na kema nsensu.

⁴⁴ Jeosafá vivi na pas ku rei di Israel.

⁴⁵ Tudu utru kusas ku pasa na renansa di Jeosafá, ku puder ki mostra, ku manera ki geria, e sta skritu na libru di Storia di Reis di Judá.

⁴⁶ I tira fora rapasis di mau vida ku sobraba di tempu di si pape Asa.

⁴⁷ Rei ka tenba na Edon, ma i tenba gubernadur.

⁴⁸ Jeosafá kumpu barkus di nogos pa e bai Ofir pa bai buska uru, ma e ka ciga di bai, pabia barkus bin kebra na Ezion-Jeber.

⁴⁹ Akazias, fiju di Akab, fala Jeosafá: “Disa ña omis bai na barkus ku bu omis.” Jeosafá ka seta.

⁵⁰ Jeosafá bin diskansa, i nteradu lungu di si papes na prasa di si pape Davi. Si fiju Jeoran rena na si lugar.

Rei Akazias di Israel

⁵¹ Na anu 17 di Jeosafá, rei di Judá, Akazias, fiju di Akab, kumsa rena na Samaria. I rena dus anu riba di Israel.

⁵² I fasi mal dianti di SIÑOR, manera ki yanda na kamiñu di si pape ku si mame, tambi na kamiñu di Jeroboan, fiju di Nebat, ku pui Israel pa i peka.

⁵³ I adora Baal, i mpina si dianti, i lantanda raiba di SIÑOR Deus di Israel, suma ku si pape fasiba.