1 Reis 21 - BIBLIA - traduson antigu in Krioulo

Orta di uva di Nabot

¹ Un omi di Jizreel comadu Nabot teneba un orta di uva na Jizreel, lungu di palasiu di Akab, rei di Samaria.

² Un dia Akab fala Nabot: “Bu orta di uva sta lungu di ña kasa. Dan el pa N fasil orta. N ta dau utru orta di uva mas bon na si konta, o si bu misti, N ta dau diñeru konformi si balur.”

³ Nabot fala Akab: “SIÑOR ta libran di N dau yardansa di ña papes.”

⁴ Akab fika ku kasabi, i paña raiba, pabia di palabra di Nabot di Jizreel ku falalba: “N ka na dau yardansa di ña papes.” I bai pa kasa, i dita na kama, i vira rostu pa paredi, i nega kume.

⁵ Si minjer Jezabel bai pa el, i puntal: “Ke ku manda bu sta ku kasabi de manera, bu nega kume?”

⁶ I falal: “Pabia N fala Nabot di Jizreel pa i bindin si orta di uva pa diñeru o, si i misti, N ta dal utru orta mas minjor, ma i falan kuma i ka na dan el.”

⁷ Si minjer Jezabel puntal: “Nta i ka abo ku na manda na Israel? Lanta bu kume, bu fika kontenti; ami N na dau ki orta di Nabot di Jizreel.”

⁸ Jezabel skirbi kartas na nomi di Akab, i pui karimbu di rei, i manda ki kartas pa garandis ku jinti altu ku moraba lungu di Nabot na si prasa.

⁹ Asin ki skirbi na kartas: “Bo ranja un dia di junjun, bo da Nabot un lugar di rispitu dianti di pobu.

¹⁰ Bo pui dus malandru pa e sinta si dianti, pa e testifika kontra el kuma i papia mal kontra Deus ku rei. Dipus bo lebal fora, bo dal ku pedras tok i muri.”

¹¹ Asin garandis ku jinti altu ku moraba na prasa di Nabot e fasi konformi ordis ku Jezabel da na kartas ki manda elis.

¹² E ranja un dia di junjun, e da Nabot un lugar di rispitu dianti di pobu.

¹³ Dus malandru yentra, e bai dianti di Nabot, e testifika kontra el dianti di pobu, e fala: “Nabot papia mal kontra Deus ku rei.” Jinti lebal fora di prasa, e dal ku pedras tok i muri.

¹⁴ E manda konta Jezabel kuma Nabot dadu ku pedras, i muri.

¹⁵ Oca ku Jezabel obi kuma Nabot dadu ku pedras tok i muri, i bai fala Akab: “Lanta bu toma konta di orta di Nabot di Jizreel, kil ki nega bindiu pa diñeru, pabia Nabot ka sta ja di vida; i muri.”

¹⁶ Oca ku Akab obi kuma Nabot muriba ja, i lanta, i bai pa ki orta di uva, i toma konta del.

Deus manda Elias pa i papia ku Akab

¹⁷ SIÑOR papia ku Elias di Tisbe, i falal:

¹⁸ “Lanta, bu bai kontra ku Akab, rei di Israel ku mora na Samaria; bu na ojal na orta di uva di Nabot, pabia i bai la pa toma konta del.

¹⁹ Bu na falal: ‘Asin ku SIÑOR na puntau: Nta bu mata un omi; gosi bu na toma si yardansa?’ Falal mas: ‘Asin ku SIÑOR fala: Na kau ku kacuris limbi sangi di Nabot, la ku kacuris na limbi tambi bu sangi, sangi di bo propi!’ ”

²⁰ Akab punta Elias: “A, ña inimigu, bu ojan ja?” Elias falal: “N ojau, pabia bu ntrega ja bu kurpu pa fasi mal dianti di SIÑOR.

²¹ Asin ku SIÑOR fala: ‘N na manda kastigu riba di bo, N na kaba ku bu jorson, N na kaba ku tudu omi di bu familia, katibu o libri.

²² N na fasi bu familia suma kil di Jeroboan, fiju di Nebat, tambi suma familia di Baasa, fiju di Aias, pabia bu lantanda ña raiba, bu pui Israel pa i peka.’

²³ SIÑOR papia tambi aserka di Jezabel, i fala: ‘Kacuris na kume Jezabel lungu di mura di Jizreel.

²⁴ Kilis di familia di Akab ku muri na prasa, kacuris na kume elis; kilis ku muri na matu, kacus na kume elis.’ ”

²⁵ (Nunka i ka tenba ningin suma Akab ku ntrega si kurpu pa fasi mal dianti di SIÑOR, manera ku si minjer Jezabel ta pincalba.

²⁶ I fasi pekadus nujenti, manera ki bai tras di idulus, suma ku amoreus fasiba, kilis ku SIÑOR serkaba na tera oca ku fijus di Israel na yentraba.)

²⁷ Oca ku Akab obi ki palabra di Elias, i rumpi si ropa, i kubri kurpu ku saku, i junjuŋa; i dita na saku, i yanda ketu.

²⁸ SIÑOR papia ku Elias di Tisbe, i puntal:

²⁹ “Bu nota manera ku Akab baŝa ña dianti? Suma ki baŝa asin, N ka na manda ki kastigu na si dias, ma na tempu di si fiju N na mandal.”