1 Reis 19 - BIBLIA - traduson antigu in Krioulo

Jezabel ameasa Elias

¹ Akab konta Jezabel tudu ku Elias fasiba, ku manera ki mata tudu anunsiaduris ku spada.

² Jezabel manda algin nunde Elias ku e rekadu: “Deusis ta matan si, antis de ora amaña, N ka tirau vida suma ku bu tira di selis.”

³ Elias sinti medu, i lanta, i kuri pa kapli ku si vida. I ciga na Berseba, na tera di Judá, i fika si rapas la,

⁴ i bai pa lala, i yanda un dia ntidu; dipus i bai sinta na sombra di un arvuri, i pidi mortu. I ora, i fala: “O SIÑOR, i ciga ja. Tiran vida gosi, pabia N ka sedu minjor di ki ña papes.”

⁵ I dita bas di ki arvuri, i durmi. Dipus, un anju pangal, i falal: “Lanta bu kume.”

⁶ Elias jubi, i oja lungu di si kabesa un pon kusñadu riba di brasas ku un jaru di yagu. I kume, i bibi, i torna dita.

⁷ Anju di SIÑOR riba sugundu bias, i pangal, i falal: “Lanta bu kume, pabia kamiñu kumpridu dimas pa bo.”

⁸ Asin i lanta, i kume, i bibi. Na forsa di ki kumida i yanda korenta dia, di dia ku di noti, te na Oreb, monti di Deus.

Elias na monti di Oreb

⁹ I yentra na un kaverna, i pasa noti la. SIÑOR bin papia ku el, i puntal: “Elias, ke ku bu na fasi li?”

¹⁰ I falal: “N pega tesu sempri na sirbi SIÑOR Deus ku ten tudu puder, ma fijus di Israel kebra se kontratu ku bo, e durba bu altaris, e mata bu anunsiaduris ku spada. N fika ami son, ma e na buska manera di matan tambi.”

¹¹ SIÑOR falal: “Sai fora, bu firma riba de monti dianti di SIÑOR.” Asin, SIÑOR bin na pasa. I bin un garandi bentu forti ku findi montis, i kebra pedras garandi si dianti, ma SIÑOR ka staba na ki bentu. Dipus di bentu, con bin tirmi, ma SIÑOR ka staba na ki tirmidura.

¹² Dipus di tirmidura, fugu ciga, ma SIÑOR ka staba tambi na fugu. Dipus di fugu i obidu un fála finu, mansu.

¹³ Oca ku Elias obil, i kubri si rostu na si kapa, i sai fora, i firma na entrada di kaverna. Un fála bin pa el, i puntal: “Elias, ke ku bu na fasi li?”

¹⁴ I fala: “N pega tesu sempri na sirbi SIÑOR Deus ku ten tudu puder, ma fijus di Israel kebra se kontratu ku bo, e durba bu altaris, e mata bu anunsiaduris ku spada. N fika ami son, ma e na buska manera di matan tambi.”

¹⁵ SIÑOR falal: “Bai, bu riba na kamiñu ku bu binba nel, bu bai pa lala di Damasku, bu bai unji Azael pa i sedu rei di Siria.

¹⁶ Dipus bu ta unji tambi Jeu, fiju di Ninsi, pa i sedu rei di Israel. Tambi Eliseu, fiju di Safat, di Abel-Meolá, bu na unjil pa i sedu anunsiadur na bu lugar.

¹⁷ Kil ku kapli di spada di Azael, Jeu na matal; kil ku kapli di spada di Jeu, Eliseu ta matal.

¹⁸ Ma N rakada seti mil na Israel ku ka finka juju dianti di Baal, nin se boka ka ciga di toka nel.”

Eliseu comadu

¹⁹ Elias sai di la, i bai oja Eliseu, fiju di Safat, ku na labraba ku dozi junta di turu; el propi i staba ku ki ultimu junta. Elias pasa nunde el, i bota si kapa riba del.

²⁰ Eliseu disa si turus, i kuri tras di Elias, i falal: “Peran pa N bai dispidi ña pape ku ña mame, N kumsa bin bai ku bo.” Elias falal: “Bu pudi bai. Ke ku N fasiu?”

²¹ Asin i riba, i toma si dus turu, i mata elis; i fasi ki kanga di turu pa i sedu leña pa kusña karni. I da pobu karni; e kume. Dipus i lanta i pega tras di Elias, i sedu si judadur.