1 Reis 17 - BIBLIA - traduson antigu in Krioulo

Korvus tisi kumida pa Elias

¹ Elias, di Tisbe na Jilead, fala Akab: “N jurmenta pa vida di SIÑOR Deus di Israel, kil ku N ta sirbi, kuma, ne anus ku na bin, i ka na ten nin serenu nin cuba tementi N ka fala pa i cubi.”

² Dipus SIÑOR papia ku el, i falal:

³ “Sai li, bu bai pa ladu di saida di sol, bu sukundi lungu di riusiñu di Kerit, na utru banda di Jordon.

⁴ Bu na bibi yagu di riu; N manda ja korvus pa e lebau kumida la.”

⁵ Asin i obdisi palabra di SIÑOR, i bai fika lungu di riu di Kerit na utru banda di Jordon.

⁶ Korvus bin ta tisil pon ku karni parmaña ku di noti; i ta bibiba yagu di riu.

⁷ Tempu pasa; riu bin seku pa falta di cuba.

Viuva di Zarefat

⁸ SIÑOR bin papia ku Elias, i falal:

⁹ “Lanta, bu bai pa Zarefat, prasa di Sidon, bu fika la. N manda ja un minjer viuva pa i ba ta dau di kume.”

¹⁰ I lanta i bai pa Zarefat. Oca ki ciga na porton di prasa, i oja la un minjer viuva ku na kujiba leña. I comal i falal: “Di fabur, ranjan un kaneka di yagu pa N bibi.”

¹¹ Oca ki na bai pa bai tisil, i torna comal, i falal: “Tisin tambi un padas di pon na mon.”

¹² Minjer falal: “N jurmenta pa vida di SIÑOR bu Deus kuma N ka tene nin un padas di pon, son un mon di foriña na un jaru, ku un bokadiñu di azeiti na garafa. Alin li N bin pa kuji dus po di leña pa N bai kusña pa mi ku ña fiju, pa no kumel antis di no muri.”

¹³ Elias falal: “Ka bu medi. Bai fasi kil ku bu fala, ma purmeru bu ta kumpun un pon pikininu na kil ku bu tene, bu tisin el pa fora; dipus, bu ta kusña pa bo ku bu fiju,

¹⁴ pabia asin ku SIÑOR Deus di Israel fala: ‘Foriña na jaru ka na kaba, nin azeiti na garafa ka na falta, te na dia ku SIÑOR manda cuba na tera.’ ”

¹⁵ Minjer bai, i fasi konformi Elias falalba. Asin el ku si familia ku Elias e teneba kusa di kume pa manga di tempu.

¹⁶ Foriña ka kaba na jaru, nin azeiti ka falta na garafa, suma ku SIÑOR falaba na boka di Elias.

¹⁷ Ku tempu, fiju di ki minjer, dona di kasa, duensi. I fika i na piora tok i para da folgu.

¹⁸ Minjer punta Elias: “Omi di Deus, ke ku no ten? Bu bin pa mi pa lembranta Deus di ña pekadu, pa mata ña fiju?”

¹⁹ Elias falal: “Dan bu fiju.” I tomal na si mon, i lebal pa kuartu la riba nunde ki ta moraba, i ditandal na si kama.

²⁰ I yalsa fála, i coma SIÑOR i falal: “O SIÑOR ña Deus, bu kastiga tambi e viuva ku N mora na si kasa, manera ku bu mata si fiju?”

²¹ I distindi kurpu riba di mininu tris bias, i coma SIÑOR, i fala: “O SIÑOR ña Deus, N rogau pa bu torna folgu di vida na kurpu de mininu!”

²² SIÑOR obi orason di Elias; mininu kumsa na da folgu, i lanta.

²³ Elias toma mininu, i ria ku el di si kuartu te dentru di kasa, i ntregal na mon di si mame, i falal: “Jubi, ali bu fiju sta bibu.”

²⁴ Minjer fala Elias: “Gosi N sibi kuma abo i omi di Deus; palabra di SIÑOR ku ta sai na bu boka i bardadi.”