1 Reis 14 - BIBLIA - traduson antigu in Krioulo

Anunsiu di Aias kontra Jeroboan

¹ Na ki tempu Abias, fiju di Jeroboan, bin duensi.

² Jeroboan fala si minjer: “Lanta, bu kamufla pa ningin ka rapara kuma abo i minjer di Jeroboan; bu bai pa Siló. Anunsiadur Aías sta la, kil ku fala kuma N na sedu rei riba de pobu.

³ Leba des pon, ku bulus, ku un garafa di mel, bu bai pa el; i na kontau ke ku na kontisi ku mininu.”

⁴ Asin ku minjer di Jeroboan fasi; i lanta, i bai pa Siló, i yentra na kasa di Aías. Aías ka pudiba ja oja, pabia di bejisa,

⁵ ma SIÑOR falalba ja: “Minjer di Jeroboan na bin konsultau aserka di si fiju ku sta duenti. Bu ta falal asin ku ’sin. Ora ki ciga, i na finji sedu utru algin.”

⁶ Oca ku Aías sinti si pasu na porta kontra i na yentra, i falal: “Yentra, minjer di Jeroboan. Pabia di ke ku bu na kamufla asin? N tene mau noba pa bo.

⁷ Bai fala Jeroboan kuma asin ku SIÑOR Deus di Israel fala: ‘N lantandau na metadi di pobu, N fasiu sedu ŝef riba di ña pobu Israel.

⁸ N rumpi renu di kasa di Davi, N dau el, ma bu ka bin sedu suma ña servu Davi ku obdisi ña mandamentus, i yanda ku mi ku tudu si korson, i fasi son kusa retu ña dianti,

⁹ ma abo bu fasi mal mas pior di ki tudu kilis ku staba ja antis di bo. Bu bai kumpu utru deusis, ku idulus di metal, pa provoka ña raiba; bu viran kosta.

¹⁰ Pabia di kila N na tisi mal riba di familia di Jeroboan. N na korta di si familia tudu omi ku mininu, katibu ku bandonadu. N na bota fora di Israel tudu jinti di jorson di Jeroboan, suma ku algin ta bota susidadi fora tok i kaba tudu.

¹¹ Kacur na kume jinti di familia di Jeroboan ku muri na prasa; pastrus na kume kilis ku muri na matu. I SIÑOR ku fala!’

¹² “Bu pudi lanta bu bai pa kasa; ora ku bu masa pe na prasa, mininu na muri.

¹³ Tudu Israel na coral, e na nteral. El son di familia di Jeroboan ku na nteradu, pabia el i uniku ku SIÑOR Deus di Israel oja kusa bon nel.

¹⁴ SIÑOR na lantanda un rei riba di Israel ku na kaba ku familia di Jeroboan na un dia son. Ke mas ku na bin sedu?

¹⁵ SIÑOR na kastiga israelitas tok e tirmi suma po di kana na yagu. I na tira pobu di Israel ne bon tera ki da se papes di antigu, i na pajiga elis te na utru ladu di riu Eufrates. Manera ke kumpu idulus di deus femia Aserá, e lantanda raiba di SIÑOR.

¹⁶ I na bandona Israel pabia di pekadu ku Jeroboan fasi, ki pui Israel pa i fasi tambi.”

¹⁷ Minjer di Jeroboan lanta, i riba pa Tirza. Oca ki ciga na porta di si kasa, mininu muri.

¹⁸ E nteral; tudu Israel coral, konformi palabra di SIÑOR ki falaba ja na boka di si servu, anunsiadur Aías.

¹⁹ Utru kusas ku pasa na renansa di Jeroboan, si geras ku si manera di rena, e sta skritu na libru di Storia di Reis di Israel.

²⁰ I rena pa vinti i dus anu, i bin muri. Si fiju Nadab rena na si lugar.

Reoboan, rei di Judá

²¹ Reoboan, fiju di Salomon, i bin sedu rei na Judá. I kumsa rena ku korenta i un anu di idadi, i rena disaseti anu na Jerusalen, prasa ku SIÑOR kuji di tera di tudu jorsons di Israel pa pui si nomi la. Si mame seduba minjer amonita comadu Naamá.

²² Jinti di Judá fasi mal dianti di SIÑOR; pabia di pekadus ke fasi, e mas lantanda nel siumi ku raiba di ki tudu se papes.

²³ E kumpu kaus altu, ku kulunas sagradu ku idulus di Aserá riba di tudu monti altu, ku bas di tudu arvuri garandi.

²⁴ Kusa pior, i tenba rapasis di mau vida ligadu ku ki kaus sagradu. Jinti fasi konformi kustumus nujenti di nasons ku SIÑOR tiraba fora oca ku fijus di Israel na yentra.

²⁵ Na kintu anu di rei Reoboan, Sisak, rei di Ejitu, ataka Jerusalen.

²⁶ I toma rikesas di kasa di SIÑOR ku di kasa di rei, i leba elis tudu. I toma tambi tudu tajaderas di uru ku Salomon kumpuba.

²⁷ Na se konta rei Reoboan kumpu tajaderas di kobri, i ntrega elis na mon di kapitons di guarda ku staba sempri na porton di kasa di rei.

²⁸ Kada bias ku rei na yentra na kasa di SIÑOR, guardas ta lebaba elis; dipus e ta torna pui elis na kasa di guarda.

²⁹ Utru kusas ku pasa na renansa di Reoboan, ku tudu ki fasi, e sta skritu na libru di Storia di Reis di Judá.

³⁰ Gera tenba sempri entri Reoboan ku Jeroboan.

³¹ Reoboan diskansa, i nteradu lungu di si papes na prasa di Davi. Si mame seduba minjer amonita comadu Naamá. Si fiju Abias toma si lugar suma rei.