1 Reis 11 - BIBLIA - traduson antigu in Krioulo

Salomon disvia

¹ Rei Salomon bin ama manga di minjer di utru teras; fora di fiju di Faraó i kasa ku minjeris eteu, ku minjeris di Moab, Amon, Edon ku Sidon.

² SIÑOR papiaba ku fijus di Israel aserka di ki nasons, i fala elis: “Ka bo kasa ku elis, pabia e na tursi bo korson pa bo bai tras di se deusis.” Ma Salomon bin liga ku elis ku amor.

³ I kasa ku setsentus minjer ku seduba fijus di rei; i teneba tambi trizentus kumadri. Ki minjeris pul pa i disvia.

⁴ Oca ku Salomon bejuba ja, si minjeris tursil korson pa i bai tras di utru deusis. Asin si korson ka seduba pirfitu pa SIÑOR si Deus suma korson di si pape Davi.

⁵ I yanda tras di Astarot, deus femia di Sidon, ku Milkon, ki deus nujenti di Amon.

⁶ Asin Salomon fasi mal dianti di SIÑOR; i ka yanda ku SIÑOR suma si pape Davi.

⁷ Na monti dianti di Jerusalen Salomon kumpu un kau sagradu pa Kemós, deus nujenti di Moab, ku utru pa Molok, ki deus nujenti di Amon.

⁸ Asin ki fasi pa tudu si minjeris stranjeru, ku ta kemaba nsensu, e sakrifika pa se deusis.

⁹ SIÑOR bin ten raiba di Salomon, manera ku si korson disvia di SIÑOR, Deus di Israel, kil ku binba pa el dus bias,

¹⁰ i dal ordi pa ka i yanda tras di utru deusis. I ka obdisi ordi di SIÑOR.

¹¹ Asin SIÑOR fala Salomon: “Suma ku bu sta asin, bu kebra ña kontratu, bu ka obdisi ña leis ku N mandau, N na rumpi e renu na bu mon, N na dal pa un di bu ŝefis. E kusa ka na maina.

¹² Ma N ka na fasil na bu tempu, pa amor di bu pape Davi. N na rumpil na mon di bu fiju.

¹³ N ka na tiral renu ntidu; N na dal un jorson pa amor di ña servu Davi, ku amor pa Jerusalen, ki prasa ku N kuji.”

Inimigus di Salomon

¹⁴ Asin, SIÑOR lantanda un inimigu kontra Salomon, ku sedu Adad, di familia di rei di Edon.

^15-16 Na tempu ku rei Davi ngaña gera riba di Edon, Joab, ŝef di tropas, ku tudu omis di Israel, e bai la pa ntera mortus, e fika la seis mis, tok e kaba mata tudu omis na Edon,

¹⁷ ma Adad, ku seduba rapasiñu, i kuri pa Ejitu ku utru omis edomeu, ŝefis ku ta sirbiba si pape.

¹⁸ E sai di Midian, e bai pa Paran. E leba utru omis di Paran ku elis, e bai ciga nunde Faraó, rei di Ejitu, ku da Adad un kasa ku terenu, i sustental ku kumida.

¹⁹ Faraó gostaba ciu di Adad, i bin dal minjer, ku sedu irma di si minjer, raiña Tafnes.

²⁰ Irma di Tafnes padi un fiju, Jenubat, ku Tafnes kria na kasa di Faraó. Asin Jenubat fikaba la juntu ku fijus di Faraó.

²¹ La na Ejitu Adad obi kuma Davi muriba ja, kuma Joab, ŝef di tropas, staba mortu tambi. I fala Faraó: “Disan pa N riba pa ña tera.”

²² Faraó puntal: “Bu tene falta di kualker kusa li ku manda bu misti riba pa bu tera?” I falal: “Nada ka faltan, ma disan bai.”

²³ Deus lantanda utru inimigu, ku sedu Rezon, fiju di Eliada, ku kuriba di si mestre, Adad-Ezer, rei di Zobá.

²⁴ I junta un grupu di omis rebeldi, i sedu se kapiton, na tempu ku Davi mata tropas di Zobá. Rezon ku si omis bai pa Damasku, e mora la, e toma konta di ki tera.

²⁵ Rezon bin sedu rei di Siria, i tenba odiu di Israel, i seduba si inimigu duranti tudu ki tempu ku Salomon staba di vida. Asin i buri mal riba di kil ku Adad na fasiba.

Jeroboan

²⁶ Utru omi ku lanta kontra rei Salomon i un di si ŝefis di tarbajaduris, Jeroboan, fiju di Nebat, di Zeredá na tera di Efrain. Si mame seduba viuva comadu Zeruá.

²⁷ I kontisi asin: Salomon kumpuba ja Milu, i tapaba burakus na mura di prasa di si pape Davi.

²⁸ Jeroboan seduba joven kapas. Oca ku Salomon rapara kuma ki tarbaja ku vontadi, i pul pa i sedu ŝef di tarbaju obrigatoriu na tera di José.

²⁹ Un dia, oca Jeroboan na saiba di Jerusalen, anunsiadur Aías, di Siló, kontra ku el na kamiñu. E staba elis dus son na ki kau. Aías bistiba panu nobu.

³⁰ I tiral, i rumpil na dozi padas.

³¹ I fala Jeroboan: “Toma des padas pa bo, pabia SIÑOR Deus di Israel fala asin: ‘N na rumpi renu na mon di Salomon, N na dau des jorson.

³² El i na fika ku un jorson, pa amor di ña servu Davi, ku amor pa Jerusalen, ki prasa ku N kuji na metadi di tera di tudu jorsons di Israel.

³³ N na fasi asin pabia Salomon disan, i mpina dianti di Astarot, deus femia di jinti di Sidon, ku Kemós, deus di jinti di Moab, ku Milkon, deus di fijus di Amon. I ka yanda na ña kamiñus, i ka fasi kusa retu ña dianti, i ka obdisi ña leis ku ordis suma ku si pape Davi fasi.

³⁴ Ma N ka na tira renu na si mon; N pul pa i sedu rei pa tudu si vida, pa amor di ña servu Davi, kil ku N kuji, ku obdisi ña mandamentus ku ña leis.

³⁵ N na tira renu na mon di si fiju, N na dau des jorson.

³⁶ N na da un jorson pa si fiju, pa ña servu Davi pudi tene sempri un lus ña dianti na Jerusalen, ki prasa ku N kuji pa N pui ña nomi nel.

³⁷ Ma abo, N na pou pa bu rena riba di tudu ku bu misti; bu na sedu rei di Israel.

³⁸ Si bu obi tudu ku N mandau, bu yanda na ña kamiñus, bu fasi kil ki retu ña dianti, bu obdisi ña leis ku ña mandamentus, suma ku ña servu Davi fasi, N na sta ku bo, N na dau Israel, N na konfirma bu familia na renu, suma ku N konfirma kil di Davi.

³⁹ Pabia di pekadu di Salomon N na kastiga jorson di Davi, ma i ka pa sempri.’ ”

⁴⁰ Asin, Salomon buska manera di mata Jeroboan, ma i lanta, i kuri pa Sisak, rei di Ejitu, i fika la tok Salomon muri.

Mortu di Salomon

⁴¹ Tudu utru kusas ku pasa na renansa di Salomon, tudu ki fasi, ku si jiresa, e sta skritu na libru di Storia di Salomon.

⁴² I rena na Jerusalen riba di tudu Israel pa korenta anu.

⁴³ I bin diskansa, i nteradu na prasa di si pape Davi. Si fiju Reoboan rena na si lugar.