1 Reis 1 - BIBLIA - traduson antigu in Krioulo

Bejisa di Davi

¹ Oca ku rei Davi beju ba ja, jinti ta kubril ku mantas, ma si kurpu ka ta kinti.

² Ŝefis di si kasa falal: “Ñu Rei, disanu pa no buska un bajuda pa i ba ta sta pertu di rei, pa toma konta del, pa ba ta dita lungu del, pa Ñu Rei pudi kenta kurpu.”

³ E yanda na tudu ladu di Israel pa buska un bajuda bonitu, e oja Abisag, sunamita, e lebal pa rei.

⁴ I seduba bajuda bonitu dimas; i toma konta di rei, i sirbil, ma rei ka tenba relason seksual ku el.

Adonias buska renansa

⁵ Adonias, fiju ku Davi padi ku Ajit, i lanta i fala: “I ami ku na sedu rei.” I purpara karus ku kabalus ku sinkuenta omi pa kuri si dianti.

⁶ (Nunka si pape ka raprindil nin i ka puntal: “Ke ku manda bu fasi asin?” I seduba rapas bonitu, ku padidu dipus di Absalon.)

⁷ I papia ku Joab, fiju di Zeruia, ku saserdoti Abiatar; elis e konkorda pa apoial,

⁸ ma saserdoti Zadok ka bai pa ladu di Adonias, nin Benaia, fiju di Jeoiada, nin anunsiadur Natan, nin Simei, nin Rei, nin guardas di Davi.

⁹ Un dia Adonias sakrifika karnelis, bakas ku fijus di baka gurdu, lungu di pedra di Zoelet, ku sta pertu di fonti di Rojel. I kumbida tudu si ermons, fijus di rei, ku tudu omis di Judá ku seduba ŝefis di rei,

¹⁰ ma i ka kumbida anunsiadur Natan, nin Benaia, nin guardas di Davi, nin si ermon Salomon.

¹¹ Natan bai pa Bateseba, mame di Salomon, i puntal: “Nta bu ka obi kuma Adonias, fiju di Ajit, i na rena, sin no mestre Davi sibi?

¹² Pera N dau konsiju pa bu pudi salba bu vida, ku vida di bu fiju Salomon.

¹³ Bai nunde rei Davi, bu puntal: ‘Ñu Rei ka jurmentaba pa mi si servu kuma, di sertesa, ña fiju Salomon na rena dipus di Ñu, kuma i el ku na sinta na tronu dipus di Ñu? Nta pabia di ke ku Adonias na rena?’

¹⁴ Ora ku bu na papia inda ku rei, N na yentra tambi bu tras, N na kabanta bu palabra.”

¹⁵ Asin Bateseba yentra na kuartu di rei ku staba ja beju dimas. Abisag, ki sunamita, i na sirbilba.

¹⁶ Bateseba mpina kabesa te na con dianti di rei. Rei puntal: “Ke ku bu misti?”

¹⁷ I falal: “Ñu Rei jurmenta pa mi, si servu, na nomi di SIÑOR si Deus, kuma ña fiju Salomon na rena dipus di Ñu, kuma i el ku na sinta na tronu,

¹⁸ ma gosi, ala Adonias na rena sin Ñu Rei ka sibi.

¹⁹ I sakrifika manga di baka, fiju di baka gurdu ku karnel; i kumbida tudu fijus di rei, ku saserdoti Abiatar, ku Joab, ŝef di tropas, ma i ka kumbida bu servu Salomon.

²⁰ Ñu Rei, uju di tudu Israel na jubiu, pa Ñu konta elis kin ku na sinta na tronu dipus di Ñu.

²¹ Si i ka asin, ora ku Ñu Rei muri, i nteradu juntu ku si papes, ami ku ña fiju Salomon, no na tratadu suma kriminosus.”

²² Oca ki na papia inda ku rei, na ki ora anunsiadur Natan yentra.

²³ Jinti konta rei kuma anunsiadur Natan sta la. I yentra nunde rei, i mpina si dianti ku rostu na con,

²⁴ i fala: “Nta Ñu Rei falaba kuma Adonias na rena dipus di Ñu, kuma el ku na sinta na tronu?

²⁵ Pabia aos i bai mata manga di baka, fijus di baka gurdu ku karnel; i kumbida tudu fijus di rei ku ŝefis di tropa, ku saserdoti Abiatar. Ala e na kume, e na bibi ku el, e na fala: ‘Viva rei Adonias!’

²⁶ I ka kumbidan, nin saserdoti Zadok, nin Benaia, fiju di Jeoiada, nin bu servu Salomon, fiju di rei.

²⁷ Nta i Ñu Rei ku manda fasi e kusas, sin kontanu kin ku na sinta na tronu dipus di Ñu Rei?”

Davi da Salomon renansa

²⁸ Rei Davi fala: “Bo coman Bateseba.” I yentra nunde rei, i firma si dianti.

²⁹ Rei jurmenta i falal: “Pa vida di SIÑOR ku libran di tudu foronta,

³⁰ aos N na fasi kil ku N jurmentau na nomi di SIÑOR Deus di Israel, kuma, di sertesa, bu fiju Salomon na rena dipus di mi; i el ku na toma ña lugar na ña tronu.”

³¹ Bateseba mpina ku rostu na con dianti di rei, i falal: “Ñu Rei Davi pa i bibu pa sempri!”

³² Rei Davi fala: “Bo coman saserdoti Zadok, ku anunsiadur Natan ku Benaia, fiju di Jeoiada.” Oca ke ciga nunde rei,

³³ i fala elis: “Bo leba ña ŝefis, bo pui ña fiju Salomon monta riba di ña propi buru, bo lebal pa Jion.

³⁴ Saserdoti Zadok ku anunsiadur Natan e ta unjil la pa i sedu rei di Israel. Bo na toka korneta, bo na grita tudu: ‘Viva Rei Salomon!’

³⁵ Dipus bo ta tisil, pa i bin sinta na ña tronu, pa i rena na ña lugar, pabia N kujilba ja pa i sedu rei di Israel ku Judá.”

³⁶ Benaia, fiju di Jeoiada, i ruspundi rei i falal: “Asin ki na sedu! Pa SIÑOR Deus di Ñu Rei konfirmal!

³⁷ Suma ku SIÑOR staba ku Ñu Rei, i ta sta tambi ku Salomon, i ta fasi si renansa pa i sedu mas garandi di ki renansa di Ñu Rei Davi.”

³⁸ Asin saserdoti Zadok, anunsiadur Natan, Benaia, fiju di Jeoiada, ku kereteus ku peleteus, e bai pui Salomon monta riba di buru di rei Davi, e lebal pa Jion.

³⁹ Saserdoti Zadok toma cifri ku tene azeiti na tenda di SIÑOR, i unji Salomon. E toka korneta; tudu jinti grita: “Viva Rei Salomon!”

⁴⁰ Oca ke na riba, tudu jinti pega tras di rei, e na tokaba flauta, e kontenti dimas, e na somna tok con parsi suma i na tirmi.

⁴¹ Oca ku Adonias ku si kumbidadus kaba festa, e obi ki baruju. Joab sinti kornetas na toka, i punta: “Pabia di ke ki ten e turmenta na prasa?”

⁴² Oca ki na papia inda, Jonatas, fiju di saserdoti Abiatar, ciga. Adonias falal: “Yentra, pabia abo i omi di fiansa; bu dibi di tisi bon noba.”

⁴³ Jonatas ruspundi i falal: “Na bardadi, Ñu Rei Davi pui Salomon pa i sedu rei,

⁴⁴ i mandal juntu ku saserdoti Zadok, anunsiadur Natan, Benaia, fiju di Jeoiada, ku kereteus ku peleteus, e pul pa i monta riba di buru di rei.

⁴⁵ Zadok ku Natan unjil rei la na Jion. Di la e kumpañal ku kontentamentu; tudu prasa sta turmentadu; e ku manda bo obi e baruju.

⁴⁶ Ala Salomon sinta ja na tronu di renansa.

⁴⁷ Tambi ŝefis di rei bai fala Ñu Rei Davi manteña, e falal: ‘Pa Deus fasi nomi di Salomon sedu mas kunsidu di ki nomi di Ñu, tambi pa si renansa sedu mas garandi.’ La na si kama rei mpina,

⁴⁸ i fala: ‘No ngaba SIÑOR Deus di Israel ku disan oja aos ku ña uju kin ku na sinta na ña tronu.’ ”

⁴⁹ Asin tudu kumbidadus di Adonias panta, e lanta, e pajiga, kada kin pa si ladu.

⁵⁰ Adonias, ku medu di Salomon, i lanta, i bai pa tenda di Deus, i pega na pontas di altar.

⁵¹ Algin konta rei Salomon kuma Adonias ten medu del, kuma i pega na pontas di altar, i fala: “N misti pa rei Salomon jurmentan aos kuma i ka na matan ku spada.”

⁵² Salomon fala: “Si i mostra kuma el i algin diritu, nin un fiu di si kabelu ka na kai na con, ma si maldadi ojadu nel, i na matadu.”

⁵³ Dipus i manda jinti pa e bai tiral na altar. Oca ki ciga, i mpina dianti di rei. Salomon falal: “Bu pudi bai pa bu kasa.”