1 Pedru 4 - BIBLIA - traduson antigu in Krioulo

Nobu vida

¹ Gosi, suma ku Kristu sufri na kurpu, abos tambi bo fika firmi ku e mesmu sintidu ku el i teneba, pabia kil ku sufri na kurpu i kaba ja ku pekadu.

² Gosi, dias ku sobra bos na vida, bo ka dibi di sigi mau diseẑu di omis di mundu, ma bo dibi di yanda suma ku Deus misti.

³ No gasta ja manga di tempu na fasi kusas ku jinti ku ka kunsi Deus gosta di fasi. No yanda na pekadu di seksu, na mau diseẑu, na camidera, na kume ciu, na bibi ciu, na nujentimenti di adora idulus.

⁴ Gosi e ta straña kuma ku bo ka ta sta ku elis na ki forti kurida fora di ordi; e ta fala mal kontra bos,

⁵ ma e ten ku bin da konta pa kil ku sta pruntu pa julga bibus ku mortus.

⁶ E ku manda Bon Noba kontadu pa mortus, pa e pudi julgadu na kurpu suma tudu jinti, ma na spiritu e pudi bibu suma ku Deus bibu.

⁷ Fin di tudu kusa sta ja pertu; asin bo ten ku sedu seriu, bo ba ta bisia na orason.

⁸ Riba di tudu, bo ama ŋutru ku tudu bo korson, pabia amor ta kubri manga di pekadu.

⁹ Bo risibi ŋutru na bo kasa, sin miskiña.

¹⁰ Bo sedu bon nkargadus di manga di koldadi don ku Deus da bos. Kada un ta sirbi ŋutru ku don ki risibi.

¹¹ Si algin na papia, pa i papia suma ki ntregadu rekadu di Deus. Si algin na sirbi, pa i sirbi konformi forsa ku Deus dal, pa Deus pudi ngabadu na tudu, na nomi di Jesus Kristu, kil ku gloria ku puder pertensi pa tudu sempri. Amen.

Sufri suma krenti

¹² Ña ermons ku N ama, ka bo straña e forti probason ku bin riba di bos pa spurmenta bos, suma ki kusa strañu ku kontisi,

¹³ ma bo kontenti suma ku bo toma parti na sufrimentu di Kristu, pa, ora ku si gloria mostradu, bo ta fika kontenti ku alegria.

¹⁴ Si i pabia di nomi di Kristu ku bo kobadu, abos i sortiadu, pabia Spiritu di gloria, ku sedu Spiritu di Deus, sta riba di bos.

¹⁵ Ka nin un di bos sufri pabia i sedu matadur o ladron o kil ku ta fasi mal, o suma kin ku ta miti na asuntu di jinti,

¹⁶ ma si bo sufri pabia bo sedu Kriston, ka bo burguñu; bo ngaba Deus pabia de nomi.

¹⁷ I ciga ja tempu pa julgamentu kumsa na pobu di Deus. Si i kumsa na nos, kal ku na sedu fin di kilis ku nega obi Bon Noba di Deus?

¹⁸ Si i kansadu pa kilis ki justu kapli, nunde ku pekadur ku ka mporta ku Deus na bai para?

¹⁹ E ku manda, kilis tambi ku na sufri konformi vontadi di Deus, pa e kontinua fasi ben; asin e na ntrega se alma na fiel Kriadur.