1 Pedru 2 - BIBLIA - traduson antigu in Krioulo

Pedra bibu

¹ Bo disa tudu mau maña, tudu nganu, finjimentu, nveẑa, ku tudu palabra mau.

² Bo sedu suma mininu ku kumsa padidu, ku ta faima pa liti. Bo faima pa liti spiritual, puru, pa bo bibil, bo kirsi na vida spiritual.

³ Gosi ja bo proba kuma Siñor i bon.

⁴ Si bo bin pa el, ku sedu pedra bibu ku omi nega na bardadi, ma ku Deus kuji pabia i di balur,

⁵ abos tambi, suma pedras bibu, bo na kumpudu pa forma kasa spiritual, pa sedu saserdotis santu pa fasi sakrifisius ku Deus ta seta, sakrifisius spiritual pabia di Jesus Kristu.

⁶ E ku manda i fala na Skritura: “Bo jubi, N kuji un pedra di balur ku N na pui suma purmeru pedra di kantu na Sion. Kin ku fia nel ka ta fika ku borgoña.”

⁷ E pedra i ten garandi balur pa bos ku fia, ma pa kilis ku ka fia: “Pedra ku pedrerus nega i bin sedu purmeru pedra di kantu.”

⁸ Tambi i sta skritu kuma i “Pedra ku ta pui algin da tapada, un roca ku ta fasi algin kai.” E ta da tapada pabia e ka obdisi palabra. Asin ki distinadu pa elis.

⁹ Ma abos bo sedu rasa kujidu, saserdotis di rei, nason santu, pobu ku Deus ranja pa el, pa konta garandi obras di kil ku coma bos na sukuru pa si lus bonitu.

¹⁰ Purmeru ba bo ka sedu pobu, ma gosi bo sedu pobu di Deus. Purmeru ba bo ka kunsi miserikordia di Deus, ma gosi bo yangasal.

Rispitu pa otridadi

¹¹ Ña kiridus, suma ku bo sedu ospris stranjeru, N pidi bos pa bo libra di mau diseẑu di kurpu, ku ta geria kontra alma.

¹² Bo yanda diritu na metadi di kilis ku ka kunsi Deus. Asin, ora ke na koba bos mal suma kin ku ta fasi mal, e pudi rapara bon tarbaju ku bo na fasi, e ta ngaba Deus na dia ki na visitanu.

¹³ Pa amor di Siñor bo baŝa pa tudu otridadi di omi, suma rei ku sta riba di tudu,

¹⁴ o gubernaduris ku rei manda pa e kastiga kilis ku ta fasi mal, pa ngaba kilis ku ta fasi ben.

¹⁵ Deus misti pa bo fasi ben, pa bo pudi kalanta ki tulus ku ka sibi nada.

¹⁶ Bo yanda na liberdadi, ma ka bo usa liberdadi pa kubri mal ku el. Bo yanda suma katibus di Deus.

¹⁷ Bo rispita tudu jinti, bo ama ermons, bo ten medu di Deus, bo rispita rei.

No pudi sufri suma Kristu

¹⁸ Abos katibus, bo baŝa pa bo dunus ku tudu rispitu; i ka son pa bon dunus ku ta trata ben, ma pa ki maus tambi.

¹⁹ I kusa sabi si algin nguenta kastigu di sufrimentu ki ka mersi, pabia i pui sintidu na Deus.

²⁰ I kal gloria si bo fasi mal, bo sutadu, bo nguenta ku pasensa? Ma si bo fasi ben, bo kastigadu, bo nguenta ku pasensa, i el ku ta sabi Deus.

²¹ I es propi ku Deus coma bos pa el, pabia tambi Kristu sufri pa bos, i disa bos isemplu pa bo yanda na si pe.

²² I ka fasi pekadu, nin na si boka nganu ka obidu.

²³ Oca i na kobadu, i ka torna. Oca ki na sufri, i ka fala i na torna, ma i ntrega si kabesa na kil ku ta julga retu.

²⁴ El propi i leba no pekadu na si kurpu na krus, pa no pudi sta suma mortu na ladu di pekadu, no yanda diritu suma ku Deus misti. Bo kuradu pabia di si molostus.

²⁵ Bo na yandaba pirdidu, suma karnel, ma gosi bo rabida ja pa Pastor, guarda di bo alma.