1 Kronikas 5 - BIBLIA - traduson antigu in Krioulo

Jorson di Ruben

¹ Ruben i seduba purmeru fiju di Jakó ma, suma i bin dita ku minjer di si pape, si diritu di purmeru fiju i pasantadu pa fijus di José, fiju di Israel. Pabia di kila, si jorson ka ta kontadu suma jorson di purmeru fiju.

² Judá bin sedu mas forti na metadi di si ermons, tok renansa sai na si jorson, ma diritu di purmeru fiju i seduba di José.

³ Fijus di Ruben, purmeru fiju di Israel, seduba: Enok, Palú, Ezron ku Karmi.

^4-6 Es i lista di jorson di Joel, di pape pa fiju: Joel, Semaias, Gog, Simei, Mika, Reaias, Baal ku Beera, ŝef di rubenitas, ku Tiglat-Pileser, rei di Asiria, prindi i leba.

⁷ Konformi reẑistu, lista di ŝefis di familia di Ruben i sedu: Jeiel, Zakarias,

⁸ Belá, fiju di Azaz, fiju di Sema, fiju di Joel, ku mora na Aroer te na Nebu ku Baal-Meon.

⁹ Manera ke bin tene limarias ciu na tera di Jilead, e distindi se moradias pa saida di sol, te na entrada di lala ku ta bai te na riu Eufrates.

¹⁰ Na tempu di rei Saul e geria ku agarenus, e ngaña elis, e mora na se tendas na tudu ki reẑion di lesti di Jilead.

Jorson di Gad

¹¹ Fijus di Gad moraba pertu delis na tera di Basan te na Salka.

¹² Joel seduba ŝef na Basan; Sofan seduba sugundu ŝef, dipus Janai ku Safat.

¹³ Se ermons, konformi jorsons di se papes, seduba seti: Mikael, Mesulan, Seba, Jorai, Jakan, Zia ku Eber.

¹⁴ Esis i fijus di Abiail, fiju di Uri, fiju di Jaroa, fiju di Jilead, fiju di Mikael, fiju di Jesisai, fiju di Jadu, fiju di Buz.

¹⁵ Ai, fiju di Abdiel, fiju di Guni, i seduba se ŝef.

¹⁶ E moraba na Jilead na tera di Basan, ku na tabankas na roda, suma tambi na tudu se kau di bakia di Saron te na se frontera.

¹⁷ Tudu ki jinti e reẑistadu konformi se jorsons, na tempu di Jotan, rei di Judá, ku Jeroboan, rei di Israel.

Gera di jorsons di utru banda di Jordon

¹⁸ Jorsons di Ruben ku Gad ku metadi di jorson di Manasés e teneba 44.760 omi forti ku sibiba pega tajadera ku spada, ku teneba jitu pa usa mansasa, ku trenadu pa sai pa gera.

¹⁹ E bai geria ku agarenus, suma tambi ku Jetur, Nafis ku Nodab.

²⁰ E coma Deus na gera, e fiansa nel; Deus obi elis, i juda elis pa e ngaña vitoria riba di agarenus ku tudu ki jinti ku juntaba ku elis.

²¹ E leba sinkuenta mil kamelu, duzentus i sinkuenta mil karnel, dus mil buru ku sen mil omi.

²² Manga di jinti matadu, pabia ki gera i seduba di Deus. E bai mora na se tera te na dia ke lebadu katibu.

Metadi di jorson di Manasés

²³ Metadi di jorson di Manasés moraba na ki tera. E bin ciu, e distindi se kau di mora desdi Basan te na Baal-Ermon, Senir ku monti di Ermon.

²⁴ Esis i ŝefis di se familias: Efer, Isi, Eliel, Azriel, Jeremias, Odavias ku Jadiel; e seduba omis famosu di gera.

²⁵ E bin ka sedu fiel pa Deus di se papes, e bai tras di deusis di jinti di ki tera ku Deus kababa ku elis oca ku fijus di Israel yentra pa toma tera.

²⁶ Pabia di kila, Deus di Israel cuci spiritu di Pul, ku tene tambi nomi di Tiglat-Pileser, rei di Asiria. Kila bai leba jorsons di Ruben ku Gad, ku metadi di jorson di Manasés, pa katiberasku, i pui elis na Ala, na Abor, na Ara ku lungu di riu di Gozan, nunde ke sta te aos.