1 Kronikas 4 - BIBLIA - traduson antigu in Krioulo

Jorson di Judá

¹ Jinti di jorson di Judá: Perez, Ezron, Karmi, Ur ku Sobal.

² Reaias, fiju di Sobal, i padi Jaat; Jaat padi Aumai ku Laad. Esis i familias di zoratitas.

³ Fijus di Etan i Jizreel, Isma ku Idbas; nomi di se irma i Azelelponi.

⁴ I padi tambi Penuel, pape di Jedor, ku Ezer, pape di Usá. Esis tudu e seduba di jorson di Ur, purmeru fiju ku Efrata padi ku Kaleb. El ku sedu pape di Belen.

⁵ Asur, pape di Tekoa, i teneba dus minjer: Ela ku Naará.

⁶ Esis i fijus ku Naará padi: Auzan, Efer, Temeni ku Astari.

⁷ Ela padi Zeret, Izar ku Etnan.

⁸ Koz padi Anub ku Zobeba, ku familias di Arel, fiju di Arun.

⁹ I tenba un omi comadu Jabez ku mas rispitaduba di ki si ermons. Si mame pul ki nomi di Jabez pabia i padil ku garandi dur.

¹⁰ Jabez coma Deus di Israel i falal: “N misti pa bu bensuan ciu, bu burin mas terenu, pa bu mon sta riba di mi pa libran di tudu mal ku pudi fasin sinti dur.” Deus seta kusa ku Jabez pidi.

¹¹ Kelub, ermon di Suá, i padi Meir ku sedu pape di Eston.

¹² Eston padi Bet-Rafa, Paseia ku Teina, pape di Ir-Naas. Esis i omis di prasa di Reka.

¹³ Fijus di Kenaz i Otniel ku Seraias. Otniel padi Atat ku Meonotai.

¹⁴ Meonotai padi Ofra; Seraias padi Joab, ku sedu pape di jinti di kobon di artistas. Ki kau dadu e nomi pabia jinti di la e tenba jitu na kumpu kusas bonitu.

¹⁵ Fijus di Kaleb, fiju di Jefoné, i Iru, Elá ku Naan. Elá padi Kenaz.

¹⁶ Fijus di Jealelel i Zif, Zifa, Tiria ku Asareel.

^17-18 Fijus di Ezra i Jeter, Mered, Efer ku Jalon. Mered kasa ku Bitia, fiju di Faraó, ku padi Mirian, Samai ku Isbá, pape di Estemoa. Si minjer di Judá padi Jered, pape di Jedor, Eber, pape di Sokó, ku Jekutiel, pape di Zanoa.

¹⁹ Irma di Naan kasa ku Odias; e padi Abikeila di familia garmita, ku Estemoa di familia maakatita.

²⁰ Fijus di Simon i Amon, Rina, Ben-Anan ku Tilon. Fijus di Isi i Zoet ku Ben-Zoet.

²¹ Fijus di Selá, fiju di Judá: Er, pape di Leka, ku Lada, pape di Maresa. I seduba tambi pape di familias ku ta tarbaja ku liñu na kasa di Asbeia.

²² Utrus di si jorson i Jokin, ku omis di Kozeba, ku Joás, Saraf (ku ta mandaba riba di moabitas), ku Jasub-Leen. (E kusas li e tiradu na reẑistus di antigu.)

²³ Ki jinti seduba kumpuduris di puti, e ta staba tambi na ortas ku jardins; e ta tarbajaba pa rei.

Jorson di Simeon

²⁴ Fijus di Simeon: Nemuel, Jamin, Jarib, Zerá ku Saul.

²⁵ Saul padi Salun; Salun padi Mibsan; Mibsan padi Misma,

²⁶ ku sedu pape di Amuel. Amuel padi Zakur, pape di Simei.

²⁷ Simei padi disaseis fiju macu ku mas seis fiju femia, ma si ermons e ka teneba manga di fiju. Tudu se jorson i ka bin ciu suma jorson di Judá.

²⁸ E moraba ne prasas: Berseba, Molada, Azar-Sual,

²⁹ Bila, Ezen, Tolad,

³⁰ Betuel, Orma, Ziklag,

³¹ Bet-Markabot, Azar-Susin, Bet-Biri ku Saarain. Esis i se prasas te na tempu ku Davi renaba.

³² E moraba tambi na sinku prasa pikininu, ku sedu Etan, Ain, Rimon, Token ku Asan,

³³ ku tudu tabankas ku staba na se roda, te na Baal. Es i reẑistu di se jorson ku kau ke moraba nel.

^34-38 Es i reẑistu di nomis di ŝefis di se familias: Mesobab, Janlek, Josa, fiju di Amazias, Joel, Jeu, fiju di Josibias, fiju di Seraias, fiju di Asiel, ku Elioenai, Jaakobá, Jesoaias, Asaias, Adiel, Jesimiel, Benaia, ku Ziza, fiju di Sif, fiju di Alon, fiju di Jedaias, fiju di Sinil, fiju di Semaias. Se familias bin aumenta tok e ciu.

³⁹ E ciga te na entrada di Jedor, na ladu di kobon pa saida di sol, pa buska paja pa se karnel.

⁴⁰ E bin oja paja ciu na un kau largu, susegadu, diskansadu, nunde ku jorson di Kan moraba antis.

⁴¹ Na tempu di Ezekias, rei di Judá, e jinti ku se nomis skirbidu ja e ataka moradias di jinti ke ojaba la na ki kau, e kaba ku elis tudu, suma ku no pudi oja aos; e rabida e mora na se lugar, pabia i ten paja bonitu la pa se karnel.

⁴² Tambi kiñentus omi di jorson di Simeon e sai e bai pa montañas di Seir. Kilis ku bai dianti e seduba Pelatias, Nearias, Refaias ku Uziel, fijus di Isi.

⁴³ E mata restu di amalekitas ku kapliba, e mora la te aos.