1 Kronikas 24 - BIBLIA - traduson antigu in Krioulo

Davi rapati saserdotis na grupus

¹ Jorson di Aron i divididu na turmas. Fijus di Aron e seduba Nadab, Abiu, Eleazar ku Itamar.

² Nadab ku Abiu muri antis di se pape, e ka fika fijus. Eleazar ku Itamar fika na tarbaju di saserdoti.

³ Ku ajuda di Zadok, di jorson di Eleazar, ku Aimelek, di jorson di Itamar, Davi rapati jorson di Aron konformi dever di kada kin na sirvis.

⁴ I ojadu kuma ŝefis di familia di jorson di Eleazar e muitu mas ciu di ki di jorson di Itamar. Asin e divididu: disaseis ŝef di familia di Eleazar ku oitu ŝef di familia di Itamar.

⁵ E rapati elis pa sorti, pabia i tenba na metadi di tudu dus familia ŝefis di kau sagradu ku ŝefis di Deus.

⁶ Semaias, fiju di Netanel, sekretariu levita, i skirbi se nomis dianti di rei ku ŝefis, saserdoti Zadok, Aimelek, fiju di Abiatar, ku ŝefis di familia di saserdotis (di familia di Eleazar ku Itamar), ku di levitas.

⁷ Sorti paña jinti ne ordi: Jeoiarib, Jedaias,

⁸ Arin, Seorin,

⁹ Malkias, Miamin,

¹⁰ Akoz, Abias,

¹¹ Jesua, Sekanias,

¹² Eliasib, Jakin,

¹³ Upa, Jesebeab,

¹⁴ Bilga, Imer,

¹⁵ Ezir, Apizez,

¹⁶ Petaias, Jeezkel,

¹⁷ Jakin, Gamul,

¹⁸ Delaias ku Maazias, ku fasi elis vinti i kuatru.

¹⁹ Aron, se pape antigu, i fasiba regras pa elis konformi ordi ki risibiba di SIÑOR Deus di Israel. Asin elis e fika e sigi ki regras pa yentra na kasa di SIÑOR pa fasi sirvis.

Lista di levitas

²⁰ Esis i nomis di utru ŝefis di familia di jorson di Levi: di familia di Anran, Subael; di familia di Subael, Jedeias;

²¹ Isijá i seduba ŝef di familia di Reabias;

²² di izaritas, Selomot; di familia di Selomot, Jaat;

²³ di familia di Ebron i tenba kuatru, ku sedu Jerias, Amarias, Jaaziel ku Jekamean;

²⁴ di familia di Uziel, Mika; di familia di Mika, Samir;

²⁵ ermon di Mika, Isijá; di familia di Isijá, Zakarias;

²⁶ fijus di Merari: Mali, Musi ku Jaazias;

²⁷ di Merari, di familia di Jaazias: Benu, Soan, Zakur ku Ibri;

²⁸ di Mali, Eleazar (ku ka teneba fiju) ku Kis.

²⁹ Fiju di Kis: Jerameel.

³⁰ Fijus di Musi: Mali, Eder ku Jerimot. Es i sedu jorson di levitas konformi se familias.

³¹ Elis tambi e juga sorti, suma ku se ermons di jorson di Aron fasi, dianti di rei Davi ku Zadok ku Aimelek, ku ŝefis di familia di saserdotis ku levitas. Ermon garandi di familia ku ermonsiñu e tratadu di mesmu manera.