1 Kronikas 22 - BIBLIA - traduson antigu in Krioulo

¹ Davi fala: “Es i kau ku kasa di SIÑOR Deus na kumpudu nel; tambi es na sedu altar di oferta kemadu pa Israel.”

Davi fasi purparason pa kumpu templu

² Davi da ordi pa junta tudu stranjerus ku staba na tera di Israel. I pui utrus ku sibi korta pedra pa e kumpu blokus di pedra pa kumpu kasa di Deus.

³ I junta manga di feru pa fasi junturas ku pregus pa portons di entrada, ku kobri ku ka pudiba ja pesadu pabia i ciu dimas,

⁴ ku manga di madera di sedru, sin konta, pabia jinti di Sidon ku Tiru e ta tisiba manga del pa Davi.

⁵ Davi ta falaba: “Kasa ku ten ku kumpudu pa SIÑOR i dibi di sedu garandi, spesial, pa i ten fama tok jinti di tudu nasons na ngaba si bonitasku. Ña fiju Salomon i muitu nobu, i ka ten inda spiriensia; i ami propi ku na purpara material.” Asin Davi purpara manga di kusa antis di muri.

⁶ Un dia i coma si fiju Salomon, i dal ordi pa i kumpu kasa pa SIÑOR Deus di Israel.

⁷ I falal: “Ña fiju, N teneba na sintidu pa kumpu un kasa pa nomi di SIÑOR ña Deus,

⁸ ma palabra di SIÑOR bin pa mi, i falan: ‘Bu darma sangi ciu, bu fasi manga di geras. Bu ka na kumpu kasa pa mi pabia di ki manga di sangi ku bu darma na con ña dianti.

⁹ Bu na padi un fiju ku na sedu omi di diskansu, pabia ami N na dal diskansu di tudu si inimigus na si roda. Si nomi na sedu Salomon; N na da pas ku diskansu pa Israel na dias di si renansa.

¹⁰ I el ku na kumpu kasa pa ña nomi. I na sedu ña fiju, N na sedu si pape; N na konfirma tronu di si renansa riba di Israel pa sempri.’

¹¹ “Asin, ña fiju, pa SIÑOR sta ku bo; N dija pa kusas kuri diritu na bu vida, pa bu kumpu kasa di SIÑOR bu Deus, suma ki fala aserka di bo.

¹² SIÑOR tambi pa i dau jiresa ku ntindimentu, pa bu pudi guberna Israel diritu, pa bu obdisi lei di SIÑOR bu Deus.

¹³ Si bu toma sintidu pa kumpri leis ku regras ku SIÑOR da Moisés pa Israel, kusas na kuriu diritu. Sedu forti, bu ten koraẑen; ka bu medi nin ka bu panta.

¹⁴ N fasi forsa, N junta 3.450 tonolada di uru pa kasa di SIÑOR, ku 34.500 tonolada di prata, tambi ku kobri ku feru ku ka pudi pesadu pabia i ciu dimas. N purpara tambi madera ku pedras, ma bu pudi bin buri kil ku na falta.

¹⁵ Bu tene manga di mestre di obra: kortaduris di pedra, pedrerus ku karpinterus, ku jinti sin numeru ku ten jitu di fasi tudu koldadi tarbaju spesial

¹⁶ na uru, prata, kobri ku feru. Lanta, bu pui mon na tarbaju! SIÑOR i ta sta ku bo.”

¹⁷ Davi da ordi pa tudu ŝefis di Israel pa e juda si fiju Salomon; i fala elis:

¹⁸ “SIÑOR bo Deus sta ku bos, i da bos diskansu na tudu ladu, pabia i ntrega moraduris di tera na ña mon; tera sta bas di SIÑOR ku si pobu.

¹⁹ Gosi, bo pui bo sintidu ku tudu bo korson pa buska SIÑOR bo Deus; bo lanta, bo kumpu kau sagradu di SIÑOR Deus, pa arka di si kontratu, ku kusas sagradu di Deus, pudi tisidu pa kasa ku na bin kumpudu pa si nomi.”