1 Kronikas 21 - BIBLIA - traduson antigu in Krioulo

Davi fasi konta di tropas

¹ Satanas lanta kontra Israel, i cuci Davi pa i fasi resensiamentu.

² Davi fala Joab ku utru ŝefis: “Bo bai fasi konta di israelitas desdi Berseba te na Dan, bo tisin konta, pa N sibi se numeru.”

³ Joab falal: “Ñu Rei, SIÑOR ta buri si pobu sen bias mas! Nta elis tudu e ka sedu servus di Ñu Rei? Ke ku manda Ñu misti fasi e kusa ku pudi tisi kulpa riba di Israel?”

⁴ Ma palabra di rei tenba forsa kontra Joab. Asin Joab sai, i pasa na tudu tera di Israel; dipus i riba pa Jerusalen,

⁵ i konta Davi numeru di omis ku pudi bai gera. Na tudu Israel i tenba 1.100.000 omi ku ta usa spada, ku 470.000 di Judá.

⁶ Joab ka fasi konta di omis di Levi nin di Benjamin, pabia ki ordi di rei i nujenti pa el.

⁷ Deus ka fika kontenti ku ki kusa ku fasidu; asin i kastiga Israel.

⁸ Davi fala Deus: “N peka ciu ne kusa ku N fasi. N pidiu pa bu tira kulpa di bu servu, pabia N fasi suma tulu.”

⁹ SIÑOR papia ku Gad, anunsiadur di Deus na sirvis di Davi, i falal:

¹⁰ “Bai konta Davi kuma SIÑOR fala: ‘N na pui tris kusa bu dianti; kuji un son delis pa N fasiu el.’ ”

¹¹ Gad bai pa Davi i falal: “Asin ku SIÑOR fala: ‘Kuji kil ku bu misti:

¹² tris anu di fomi, tris mis di kuri dianti di bu inimigus ku na serkau ku spada, o tris dia di spada di SIÑOR ku sedu duensa meduñu na tera, ora ku anju di SIÑOR na leba mortu pa tudu parti di Israel.’ Jubi kal rasposta ku N na leba pa kil ku mandan.”

¹³ Davi fala Gad: “N foronta dimas! Ma i minjor pa N kai na mon di SIÑOR, pabia i ta ten garandi pena di jinti; libran di N kai na mon di omis!”

¹⁴ Asin SIÑOR manda duensa meduñu riba di Israel, tok setenta mil jinti muri.

¹⁵ SIÑOR manda un anju pa dana Jerusalen. Oca ku anju kumsa na danal, SIÑOR ojal, i muda ideia ki teneba di fasi mal, i fala ki anju danadur: “I justa! Bu pudi para ja.” Anju di SIÑOR staba lungu di kau di masa trigu di un jebuseu comadu Ornan.

¹⁶ Davi yalsa si uju, i oja anju di SIÑOR ku staba na ar, ku distindi mon ku spada riba di Jerusalen. Davi ku garandis, elis tudu e bisti saku, e mborka na con.

¹⁷ Davi fala Deus: “Nta i ka ami ku manda pa omis resensiadu? I ami propi ku peka, N fasi mal, ma e karnelis, ke ke fasi? SIÑOR ña Deus, N misti pa bu kastigan, ami ku ña familia, ma tira e kastigu riba di bu pobu.”

¹⁸ Anju di SIÑOR fala Gad pa i konta Davi pa i bai kumpu altar pa SIÑOR na kau di masa di ki jebuseu Ornan.

¹⁹ Davi obdisi palabra ku Gad fala na nomi di SIÑOR, i bai.

²⁰ Oca ku Ornan ku si kuatru fiju na masa trigu, i vira i oja anju; si fijus bai sukundi.

²¹ Oca ku Davi ciga, Ornan ojal, i sai na kau di masa, i bai dal kontrada, i mpina ku rostu na con si dianti.

²² Davi falal: “Bindin ki bu kau di masa trigu pa N kumpu un altar pa SIÑOR, pa i pudi kaba ku e praga riba di pobu. N na pagau si pres sertu.”

²³ Ornan fala Davi: “Ñu Rei, tomal, bu fasi ke ku bu misti fasi. Ali N na da ña turus pa oferta kemadu, ku ña makina di masa pa bu fasil leña, tambi ku trigu pa oferta di kumida. N na dau tudu.”

²⁴ Davi ruspundi Ornan i falal: “Nau, i ka pudi sedu asin. N misti kumpral na si balur. Bindin el na pres sertu, pabia N ka na toma nada di bo pa SIÑOR, nin N ka na da oferta kemadu ku ka kustan nada.”

²⁵ Asin Davi paga Ornan seizentus mueda di uru pa ki kau,

²⁶ i kumpu la un altar pa SIÑOR, i pursenta ofertas kemadu ku ofertas di pas. I coma SIÑOR; i ruspundil ku fugu di seu riba di altar di oferta kemadu.

²⁷ SIÑOR da ordi pa anju; kila torna si spada na baiña.

²⁸ Na ki ora Davi oja kuma SIÑOR ruspundil; i pursenta sakrifisius la na ki kau di masa di Ornan.

²⁹ Tenda di SIÑOR ku Moisés kumpu na lala, ku altar di oferta kemadu, staba na kau altu di Jibeon,

³⁰ ma Davi ka pudiba bai la pa buska SIÑOR, pabia i tenba medu di spada di anju di SIÑOR.