1 Kronikas 20 - BIBLIA - traduson antigu in Krioulo

Davi ngaña Rabá

¹ Dipus di un anu, na tempu ku reis kustuma ta bai gera, Joab sai ku tropas, i dana tera di amonitas; i bai pa Rabá, i tajal. Ma Davi fika na Jerusalen. Joab ataka Rabá, i danal.

² Davi tira koroa na kabesa di rei; ki koroa di uru, ku pesaba serka di trinta i kuatru kilu, i teneba pedras di balur nel. I pudu riba di kabesa di Davi, ku toma manga di kusa di ki prasa, i leba elis.

³ I leba tambi jinti ku staba la, i pui elis tarbaja ku seras, ku mancadus ku pikaretas di feru. Asin ki fasi ku tudu prasas di amonitas. Dipus Davi ku tudu tropas e riba pa Jerusalen.

Geras kontra filisteus

⁴ Mas tardi, gera bin lanta kontra filisteus na Jezer. Na ki tempu Sibekai di Usa i mata Sipai, di jorson di jiganti. Filisteus bin baŝa kabesa.

⁵ I torna ten mas gera kontra filisteus. El-Anan, fiju di Jair, i mata Lami, ermon di ki jiteu Golias, ku po di si kañaku seduba suma ransi di fisial.

⁶ I fasidu mas utru gera na Gat, nunde ki tenba un omi kumpridu dimas ku teneba vinti i kuatru dedu, seis na kada mon ku seis na kada pe. El tambi i seduba di jorson di jiganti.

⁷ I fika i na koba Israel, i na disafia elis, ma Jonatas, fiju di Simeia, ermon di Davi, i matal.

⁸ Ki omis ku Davi ku si omis mata e padidu na jorson di jigantis di Gat.