1 Kronikas 18 - BIBLIA - traduson antigu in Krioulo

Vitorias di Davi

¹ Dipus di kila, Davi torna ngaña filisteus, i domina elis, i roba elis prasa di Gat ku si tabankas na roda.

² I ngaña tambi moabitas; kilas fika bas del, pa ba ta paga mpustu.

³ Oca ku Adad-Ezer, rei di Zobá, bai pa toma konta di tera lungu di riu Eufrates, Davi bai ngañal lungu di Amat,

⁴ i tomal mil karu, seti mil tropa di kabalu ku vinti mil tropa di pe. I guarda sen kabalu di karu; restu i korta se nervus di pe.

⁵ Sirus di Damasku bin pa sakura Adad-Ezer, rei di Zobá, ma Davi mata vinti i dus mil delis,

⁶ i pui kampamentus di tropas na se tera; sirus fika bas di Davi, e ta paga mpustu. SIÑOR ta daba Davi vitoria na kualker kau ki bai.

⁷ Davi toma tajaderas di uru ku ŝefis di Adad-Ezer ta usaba, i leba elis pa Jerusalen.

⁸ I toma tambi manga di kobri di Tibat ku di Kun, prasas di Adad-Ezer. Mas tardi Salomon bin usa ki kobri pa kumpu ki bañera di templu, ku kulunas ku material di kobri.

⁹ Oca ku Tou, rei di Amat, obi kuma Davi kaba ku tudu tropas di Adad-Ezer, rei di Zobá,

¹⁰ i manda si fiju Adoran pa Davi pa falal manteña, pa dal parabens manera ki geria ku Adad-Ezer, i ngañal, pabia Adad-Ezer i ta fasiba gera kontra Tou. Tou mandal tambi manga di kusa di uru, prata ku kobri.

¹¹ Davi toma ki kusas, i dedika elis pa SIÑOR, tudu ku utru prata ku uru ki tomaba di tudu e nasons: edomeus, moabitas, amonitas, filisteus ku amalekitas.

¹² Fora di kila, Abisai, fiju di Zeruia, i mata disoitu mil edomeu na Kobon di Sal,

¹³ i pui kampamentus di tropas na Edon. Tudu jinti di Edon e fika bas di Davi. SIÑOR ta daba Davi vitoria na kualker kau ki bai.

¹⁴ Davi rena riba di tudu Israel, i ta julgaba tudu si pobu ku bon justisa.

¹⁵ Joab, fiju di Zeruia, i seduba ŝef di tropas; Jeosafá, fiju di Ailud, el ku ta skirbiba tudu ku na pasa na renu.

¹⁶ Zadok, fiju di Aitub, ku Abimelek, fiju di Abiatar, e seduba saserdotis; Savsa seduba sekretariu.

¹⁷ Benaia, fiju di Jeoiada, i staba riba di kereteus ku peleteus. Fijus di Davi staba na pusison mas altu, lungu di rei.