1 Kronikas 17 - BIBLIA - traduson antigu in Krioulo

Davi misti kumpu templu

¹ Oca ku Davi mora ja na si kasa, i fala anunsiadur Natan: “Ali N mora na kasa di madera di sedru, ma arka di kontratu di SIÑOR sta na tenda.”

² Natan fala Davi: “Bu pudi fasi tudu ku bu na sinti dentru di bu korson, pabia Deus sta ku bo.”

³ Ma, ki di noti, SIÑOR bin papia ku Natan, i falal:

⁴ “Bai konta ña servu Davi kuma SIÑOR fala: ‘I ka abo ku na kumpu kasa pa N mora nel.

⁵ N ka ciga di mora na nin un kasa, disna di dia ku N tisi Israel di Ejitu te aos. N mora son na tenda ku ta mundantadu di un kau pa utru.

⁶ Nta na tudu kau ku N yanda ku tudu Israel, N ciga di punta kualker di ŝefis ku N pui pa e gia ña pobu nos ke ku manda e ka kumpun un kasa di sedru?’

⁷ “Asin bu pudi bai fala ña servu Davi kuma SIÑOR ku ten tudu puder fala: ‘N tirau tras di karnel, na kau nunde ku bu ta bakiaba nel, pa bu sedu ŝef di ña pobu Israel.

⁸ N staba ku bo na tudu kau ku bu bai, N bai bu dianti, N kaba ku tudu bu inimigus. Tambi N dau fama suma di omis mas garandi di mundu.

⁹ N na ranja un kau nunde ku N na paranta ña pobu Israel, pa e tene se propi tera nunde ke na sinta, pa nunka mas e ka rinkadu pa lebadu pa utru kau, nin jinti mau ka na kansa elis mas, suma ke ta fasiba,

¹⁰ disna di tempu ku N pui ŝefis riba di ña pobu Israel. N na bota tudu bu inimigus bas. “‘Tambi N na kontau kuma ami, SIÑOR, N na firmanta bu renansa.

¹¹ Ora ku bu dias kaba, pa bu pudi bai pa bu papes, ami N na lantanda algin di bu jorson pa i toma bu lugar, un di bu propi fijus; N na firmanta si renu.

¹² El ku na kumpun kasa; ami N na firmanta si tronu pa sempri.

¹³ N na sedu si pape; el i na sedu ña fiju. N ka na tira ña bondadi nel, suma ku N fasi ku kil ku staba antis di bo.

¹⁴ N na pul riba di ña kasa ku ña renu pa sempri; si tronu na fika firmi pa sempri.’ ”

¹⁵ Natan konta Davi tudu ki palabras, ku tudu kusa ku Deus mostral.

Orason di Davi

¹⁶ Rei Davi yentra i sinta dianti di SIÑOR, i fala: “O SIÑOR Deus, nta ami i kin? O kal balur ku ña familia ten, pa bu tisin te ne puntu?

¹⁷ Bu na oja es suma un kusa pikininu, o Deus; asin bu fala gosi aserka di familia di bu servu na tempus ku na bin. Abo, SIÑOR Deus, bu na tratan suma un omi importanti.

¹⁸ Ke mas ku N pudi fala aserka di onra ku bu fasin, ami Davi, bu servu? Bu kunsi bu servu diritu.

¹⁹ O SIÑOR, pa amor di bu servu, konformi bu vontadi, bu fasin pa N sibi tudu e kusas garandi ku bu na fasi.

²⁰ “SIÑOR, i ka ten ningin suma bo, nin i ka ten utru deus fora di bo, konformi tudu ku no obi ku no oreja.

²¹ Nta i ten algin suma bu pobu Israel? Elis i uniku jinti na mundu ku bu liberta di katiberasku pa e sedu bu pobu. Bu nomi torna kunsidu pabia di kusas garandi i meduñu ku bu fasi. Bu bai dianti di bu pobu ku bu tira di Ejitu, bu serka utru nasons pa bu pobu pudi yentra.

²² Bu toma bu pobu Israel pa e sedu di bo pa sempri; abo, SIÑOR, bu sedu se Deus.

²³ “O SIÑOR, ki palabra ku bu fala aserka di bu servu ku si familia, bu ta konfirmal pa sempri, bu fasi ke ku bu fala.

²⁴ Asin bu nomi na sta firmi, i na ngabadu pa sempri. Jinti na fala: ‘SIÑOR ku ten tudu puder, Deus di Israel, el ku sta riba di Israel.’ Renu di bu servu Davi i na sta firmi bu dianti.

²⁵ Abo, ña Deus, bu mostra bu servu kuma bu na firmanta si renu. Pabia di kila, bu servu oja fiansa pa ora bu dianti.

²⁶ O SIÑOR, abo i Deus. Bu fala e bon kusa aserka di bu servu.

²⁷ Di bon vontadi bu bensua jorson di bu servu, pa i sta sempri bu dianti. Abo, SIÑOR, bu bensual ja; asin i na bensuadu pa sempri.”