1 Kronikas 16 - BIBLIA - traduson antigu in Krioulo

¹ E leba arka di Deus, e pul dentru di tenda ku Davi yarmaba pa el; e pursenta ofertas kemadu ku ofertas di pas dianti di Deus.

² Oca ku Davi kaba pursenta ki ofertas kemadu ku di pas, i bensua pobu na nomi di SIÑOR.

³ I pati kada omi ku kada minjer na Israel un pon, un bon padas di karni ku un bulu di uvas seku.

⁴ Davi kuji utru levitas pa e fasi sirvis dianti di arka di SIÑOR, pa kanta, pa gardisi, pa ngaba SIÑOR Deus di Israel.

⁵ Asaf seduba ŝef, ku Zakarias si sugundu. Jeiel, Semiramot, Jeiel, Matitias, Eliab, Benaia, Obed-Edon ku Jeiel e kujidu pa toka violas ku arpas; Asaf tenba ku toka simbalus.

⁶ Saserdotis Benaia ku Jaaziel e tenba ku toka kornetas sempri dianti di arka di kontratu di Deus.

Kantiga di gardisimentu

⁷ Na ki mesmu dia, pa purmeru bias, Davi ntrega Asaf ku si ermons kargu di kanta e kantiga pa ngaba SIÑOR.

⁸ Bo ngaba SIÑOR, bo coma si nomi; bo konta na metadi di nasons kusas ki fasi.

⁹ Bo kanta pa el, bo ngabal ku kantiga, bo papia di tudu kusas garandi ki fasi.

¹⁰ Bo njata na si nomi sagradu. Kilis ku ta buska SIÑOR, pa e kontenti na se korson.

¹¹ Bo buska SIÑOR, bo buska si forsa; bo buska si pursensa sempri.

^12-13 Abos, si servus, jorson di Israel, abos, fijus di Jakó, kilis ki kuji, bo lembra di kusas garandi ki fasi, si milagris, ku si palabras di julgamentu.

¹⁴ El i SIÑOR no Deus; si julgamentus sta na tudu parti di mundu.

¹⁵ Bo ba ta lembra sempri di si kontratu, ki palabra ki firmanta pa tudu tempu,

¹⁶ ki kontratu ki fasi ku Abraon, ki juramentu ki fasi pa Isak.

¹⁷ I konfirmal pa Jakó suma lei, i dal pa Israel suma kontratu ku ka ta kaba;

¹⁸ i fala: “N na dau tera di Kanaan suma kiñon di bo yardansa.”

¹⁹ Bo seduba inda puku na numeru, puku omis, ospris na tera.

²⁰ Bo papes yanda-yanda di un nason pa utru, di un renu pa utru pobu.

²¹ Deus ka disa ningin kalka elis; pa amor delis i raprindi reis, i fala:

²² “Ka bo toka na jinti ku N kuji, nin ka bo fasi ña anunsiaduris mal.”

²³ Abos di tudu mundu, bo kanta pa SIÑOR, bo konta di si salbason kada dia.

²⁴ Bo diklara si gloria na metadi di nasons, bo konta tudu rasas kusas garandi ki fasi.

²⁵ SIÑOR i garandi, i mersi ngabadu; i mas mersi rispitu di ki tudu deusis,

²⁶ pabia tudu deusis di utru nasons e sedu idulus son, ma SIÑOR, el ku kumpu seu.

²⁷ El i un Rei gloriosu, rodiadu di garandesa; forsa ku kontentamentu e ta inci si kau di mora.

²⁸ Abos, familias di nasons, bo glorifika SIÑOR, bo ngaba si gloria ku si forsa,

²⁹ bo ngaba gloria di Nomi di SIÑOR. Bo tisi ofertas, bo bin si dianti; bo adora SIÑOR na bonitasku di si puresa.

³⁰ Tudu mundu pa i tirmi si dianti! Mundu sta firmi; i ka pudi bulbulidu.

³¹ Abos seu ku tera, bo kontenti! Pa i diklaradu na metadi di nasons kuma SIÑOR na rena.

³² Mar pa i somna, ku tudu ku sta nel; Kampada pa i kontenti, ku tudu ku sta nel!

³³ Arvuris di matu na kanta ku kontentamentu dianti di SIÑOR, pabia i na bin pa julga mundu.

³⁴ Bo ngaba SIÑOR pabia el i bon; si bondadi i pa sempri.

³⁵ Bo fala: “O Deus no Salbadur, salbanu, bu juntanu, bu libranu di nasons, pa no pudi gardisiu, no ngaba bu nomi sagradu ku kontentamentu.”

³⁶ SIÑOR Deus di Israel, pa i ngabadu pa sempri! Tudu jinti fala “Amen,” e ngaba SIÑOR.

Organisason di kultus

³⁷ Davi fika Asaf ku si ermons dianti di arka di kontratu di SIÑOR, pa e fasi sirvis la sempri, konformi kil ku lei manda pa kada dia.

³⁸ Tambi i fika Obed-Edon, fiju di Jedutun, ku elis tambi, ku si sesenta i oitu ermon. Obed-Edon ku Osa e seduba porterus.

³⁹ Davi fika tambi saserdoti Zadok, ku utru saserdotis si ermons, dianti di tenda di SIÑOR ku staba na kau altu na Jibeon,

⁴⁰ pa pursenta ofertas kemadu pa SIÑOR riba di altar di ofertas kemadu, sempri parmaña ku di tardi, konformi tudu ku sta skritu na lei ku SIÑOR da Israel.

⁴¹ Eman ku Jedutun e staba ku elis, ku utru jinti ku kujidu, se nomis comadu, e nkargadu pa ngaba SIÑOR, pabia si bondadi i pa sempri.

⁴² Eman ku Jedutun, elis ku ta tokaba kornetas ku simbalus, ku utru instrumentus di musika di Davi, ma fijus di Jedutun e ta guardaba porton.

⁴³ Tudu jinti bai, kada kin pa si kasa. Davi riba pa si kasa pa bensua si familia.