1 Kronikas 15 - BIBLIA - traduson antigu in Krioulo

Purparason pa mundanta arka

¹ Davi kumpu kasas pa si kabesa na prasa di Davi, i purpara tambi un kau, i yarma tenda pa arka di Deus.

² I rabida i fala: “Ningin ka pudi karga arka di Deus si i ka son levitas, pabia SIÑOR kuji elis pa e ba ta karga arka, tambi pa sirbi Deus pa sempri.”

³ Davi junta tudu Israel na Jerusalen pa e bai tisi arka di SIÑOR pa pul na ki kau ki purparaba ja pa el.

⁴ I junta tambi fijus di Aron ku levitas.

⁵ Di fijus di Koat i bin Uriel ku seduba ŝef, ku 120 di si ermons.

⁶ Di fijus di Merari i bin Asaias, se ŝef, ku 220 di si ermons.

⁷ Di fijus di Jerson i bin Joel, se ŝef, ku 130 di si ermons.

⁸ Di fijus di Elizafan i bin Semaias, se ŝef, ku 200 di si ermons.

⁹ Di fijus di Ebron i bin Eliel, se ŝef, ku 80 di si ermons.

¹⁰ Di fijus di Uziel i bin Aminadab, se ŝef, ku 112 di si ermons.

¹¹ Davi coma saserdotis Zadok ku Abiatar, ku levitas Uriel, Asaias, Joel, Semaias, Eliel ku Aminadab,

¹² i fala elis: “Abos i ŝefis di familias di levitas. Bo purifika bo kabesa, ku bo ermons, pa bo pudi tisi arka di SIÑOR, Deus di Israel, pa kau ku N purpara ja pa el.

¹³ Ki purmeru bias i ka abos ku bai kargal pa tisi. Pabia di kila SIÑOR rebenta ku nos, suma ku no ka puntal manera diritu di tisil.”

¹⁴ Asin saserdotis ku levitas e purifika, pa e pudi bai tisi arka di SIÑOR Deus di Israel.

¹⁵ Levitas bai, e miti varas na anilias di arka di Deus, e kargal na se ombras, konformi ordis ku SIÑOR daba na boka di Moisés.

¹⁶ Davi fala ŝefis di levitas pa e kuji se ermons ku sibi kanta, pa e tisi tambi instrumentus di musika suma violas, arpas ku simbalus, pa e toka, e kanta altu ku kontentamentu.

¹⁷ Asin levitas kuji Eman, fiju di Joel. E kuji tambi Asaf, fiju di Berekias, na metadi di se ermons. Di se ermons di familia di Merari e kuji Etan, fiju di Kusaias.

¹⁸ E kuji tambi utru ermons pa juda elis: Zakarias, Beni, Jaaziel, Semiramot, Jeiel, Uni, Eliab, Benaia, Maaseias, Matitias, Elifeleu ku Mikneias, ku Obed-Edon ku Jeiel ku sedu porterus.

¹⁹ Ki kantaduris Eman, Asaf ku Etan, elis ku tenba ku toka simbalus di metal.

²⁰ Zakarias, Aziel, Semiramot, Jeiel, Uni, Eliab, Maaseias ku Benaia e tenba ku toka violas di nota altu.

²¹ Matitias, Elifeleu, Mikneias, Obed-Edon, Jeiel ku Azazias e tenba ku toka arpas di nota bas pa kumpaña melodia.

²² Kenanias, ŝef di levitas, el ku sedu nkargadu di kantigas, pa nsaia jinti, tambi pa diriẑi elis, pabia i tenba jitu na kila.

²³ Berekias ku Elkana e kujidu pa sedu guardas di arka.

²⁴ Obed-Edon ku Jeias tambi e seduba guardas di arka. Saserdotis Sebanias, Jeosafá, Netanel, Amasai, Zakarias, Benaia ku Eliezer e kujidu pa toka korneta dianti di arka di Deus.

Arka lebadu pa Jerusalen

²⁵ Asin Davi, ku garandis di Israel, ku kapitons di mil, e bai ku tudu kontentamentu pa toma arka di kontratu di SIÑOR na kasa di Obed-Edon.

²⁶ Manera ku Deus juda ki levitas ku na lebaba arka di kontratu di SIÑOR, e mata seti turu nobu ku seti karnel macu suma sakrifisiu.

²⁷ Davi bistiba un kamisoti kumpridu di liñu finu, suma tambi tudu ki levitas ku na kargaba arka, ku kantaduris, ku Kenanias, se diriẑenti di kantiga. Davi bistiba tambi un efodi di liñu.

²⁸ Tudu pobu di Israel kumpaña arka di kontratu di SIÑOR, ku gritus di kontentamentu, ku toku di cifris di karnel, kornetas, simbalus, violas ku arpas.

²⁹ Oca ku arka di kontratu di SIÑOR na yentraba na prasa di Davi, Mikal, fiju femia di Saul, i jubi na janela, i oja Davi na baja, i na toka; i disprezal na si korson.