1 Kronikas 14 - BIBLIA - traduson antigu in Krioulo

Davi fasi kontratu ku rei Iron

¹ Iron, rei di Tiru, i manda jinti pa Davi, pa e leba madera di sedru, ku pedrerus ku karpinterus, pa e kumpu kasa pa Davi.

² Davi ntindi kuma SIÑOR firmantal ja pa i sedu rei riba di Israel, i yalsa puder di si renu pa amor di si pobu.

³ La na Jerusalen Davi bin buri mas minjeris, i padi fijus macu ku femia.

⁴ Esis i nomis di fijus ki padi na Jerusalen: Samua, Sobab, Natan, Salomon,

⁵ Ibar, Elisua, Elpelet,

⁶ Nogá, Nefeg, Jafia,

⁷ Elisama, Beeliada ku Elifelet.

Davi ngaña filisteus

⁸ Oca ku filisteus obi noba di kuma Davi unjidu pa i sedu rei riba di tudu Israel, e lanta tudu, e bai pa paña Davi. Davi obi kila, i sai kontra elis.

⁹ Filisteus bin e toma konta di kobon di Refain.

¹⁰ Davi punta Deus: “N dibi di bai geria kontra filisteus? Bu na ntrega elis na ña mon?” SIÑOR falal: “Bai, pabia N na ntregau elis.”

¹¹ Davi bai pa Baal-Perazin, i ngaña elis la; i fala: “Ku ña mon Deus rebenta kontra ña inimigus suma ku yagu ta kebra orik.” Asin i coma nomi di ki kau Baal-Perazin.

¹² Filisteus bandonaba se deusis la; Davi da ordi pa e kemadu na fugu.

¹³ Filisteus torna bin toma konta di ki kobon.

¹⁴ Davi torna punta Deus; Deus falal: “Ka bu bai diretamenti pa elis, ma boltia se tras, bu ataka elis dianti di amoreras.

¹⁵ Ora ku bu obi baruju di pes ku na marŝa riba di amoreras, bu ta sai janan pa gera, pabia i ta kontra Deus ku sai ja bu dianti pa ngaña tropas di filisteus.”

¹⁶ Davi fasi suma ku Deus mandal; e mata-mata tropas di filisteus desdi Jibeon te na Jezer.

¹⁷ Asin fama di Davi laga na tudu ki teras; SIÑOR pui tudu ki nasons pa e medi Davi.