1 Kronikas 13 - BIBLIA - traduson antigu in Krioulo

Arka pudu na kasa di Obed-Edon

¹ Davi konsulta ideia di tudu ŝefis, ku kapitons di mil ku di sen.

² Dipus i papia ku tudu juntamentu di pobu, i fala: “Si bo oja kuma i bon, i kusa ku SIÑOR no Deus misti, no ta manda jinti ku rekadu pa tudu no ermons ku sta na tudu tera di Israel, tambi pa saserdotis ku levitas ku sta na se prasas ku se pontas, pa e bin junta ku nos,

³ pa no bai tisi arka di no Deus, pabia no ka ligaba ku el na tempu ku Saul seduba rei.”

⁴ Tudu juntamentu konkorda pa fasi asin, pabia tudu jinti oja kuma i bon.

⁵ Asin Davi junta tudu Israel, desdi Sior na frontera di Ejitu te na entrada di Amat, pa e bin bai tisi arka di Deus di Kiriat-Jearin.

⁶ Davi ku tudu Israel bai pa Baalá, ku sedu Kiriat-Jearin ku sta na Judá, pa tisi di la arka di Deus, ku nomi di ki SIÑOR ku ta mora na metadi di kirubins ta comadu riba del.

⁷ E tira arka di Deus na kasa di Abinadab, e pul na un kareta nobu pa lebal. Uzá ku Aió, elis ku na giaba ki kareta.

⁸ Davi ku tudu Israel e na bajaba ku kontentamentu ku tudu se forsa dianti di Deus, e na kanta, e na toka arpas, violas, tambriñas, simbalus ku kornetas.

⁹ Oca ke ciga na kau di masa di Kidon, turus da tapada; Uzá distindi mon i pega arka pa sugural.

¹⁰ Raiba di SIÑOR lanta kontra Uzá; i matal pabia i pui mon na arka. Asin i muri la dianti di Deus.

¹¹ Davi fika ku kasabi manera ku raiba di SIÑOR rebenta kontra Uzá; asin i coma ki kau Perez-Uzá; ki nomi fika te aos.

¹² Ki dia Davi sinti medu di Deus, i punta: “Kuma ku N na tisi arka di Deus pa mi?”

¹³ Asin i ka leba arka ku el pa prasa di Davi, ma i rabida ku el, i pul na kasa di Obed-Edon, un omi jiteu.

¹⁴ Arka fika tris mis na kasa di ki familia. SIÑOR bensua familia di Obed-Edon, ku tudu ki tene.