1 Koríntius 9 - BIBLIA - traduson antigu in Krioulo

Diritu di apostolu

¹ N na punta bos: Ami i ka algin libri? Ami i ka apostolu? N ka oja Jesus no Siñor? Abos bo ka sedu rusultadu di tarbaju ku N fasi pa Siñor?

² Nin ku N ka sedu apostolu pa utru jinti, sertamenti N sedu pa bos, pabia i abos ku sedu proba kuma ami i apostolu, suma bo sedu di Siñor.

³ Pa kilis ku na kritikan, es i ña difesa.

⁴ No ka ten diritu di kume no bibi?

⁵ No ka ten diritu di bai bias ku minjer krenti ku no kasa ku el, suma ki utru apostolus, ku ermons di Siñor, ku Pedru?

⁶ O son ami ku Barnabé ku ka ten diritu di disa di tarbaja pa no kabesa?

⁷ Kal soldadu ku ta paga dispesa pa si kabesa nkuantu i sta na tropa? Kin ku ta fasi orta, i ka ta kume si frutu? Kin ku ta bakia limarias, i ka ta purbita se liti?

⁸ O N na fala asin suma ku omi ta fala? O lei ka fala tambi asin?

⁹ Na lei di Moisés i sta skritu pa ka mara boka di turu ku sta na tarbaju di masa arus. O Deus, son turu ki na kuda nel?

¹⁰ I ka fala tambi asin pabia di nos? Sertamenti i pa nos tambi ki sta skritu, pabia kil ku labra ku kil ku na masa, e dibi di tarbaja ku speransa di oja se parti di arus ke kebra.

¹¹ Si no sumia pa bos kusa spiritual, i ta sedu mal si no risibi di bos kusas material?

¹² Si utrus ten diritu di pera e kusa di bos, anos tambi no ka ten mas diritu? Ma anos, nunka no ka purbita de diritu. Pa kontrariu, no nguenta tudu pa ka no pui mpidimentu na Bon Noba di Kristu.

¹³ O bo ka sibi kuma kilis ku ta tarbaja na kasa di Deus e ta kume di oferta di kasa di Deus? I suma kilis tambi ku ta sirbi na altar, e ta toma se parti di karni di sakrifisiu.

¹⁴ Asin tambi Siñor manda pa kilis ku na konta Bon Noba pa e sustentadu nel.

¹⁵ Ma ami, nin un de diritus li N ka purbita, nin N ka na skirbi e karta pa bo pudi fasi asin ku mi. I minjor N muri te pa algin fasi ña manera di ngaba ña kabesa pirdi balur.

¹⁶ Si N na konta Bon Noba, N ka ten roson di njata, pabia N sinti obrigason pa fasil. Ai di mi si N ka konta e Bon Noba!

¹⁷ Si N na fasil na ña propi vontadi, N ten ku pagadu, ma N fasil suma un dever, pabia i Deus ku dan el pa N fasi.

¹⁸ Agora kal ki ña pagamentu? I kontentamentu ku N ten pa konta Bon Noba sin kobra ningin, sin purbita ki diritu ku N ten suma kil ku ta konta Bon Noba.

¹⁹ Ami i omi libri; N ka sedu katibu di ningin, ma N fasi ña kabesa katibu di tudu jinti pa N ngaña jinti mas ciu ku N pudi.

²⁰ Oca ku N na tarbaja ku judeus, N yanda suma elis pa N pudi ngaña elis. Pa kilis ku sta bas di lei di Moisés, N bida suma ami tambi N sta bas del, pa N pudi ngaña elis, kontudu ami N ka sta bas del.

²¹ Si N sta ku jinti ku ka tene lei di Moisés, N ta bida suma algin ku ka tene ki lei, pa N pudi ngaña elis. I ka suma N ka tene lei di Deus, ma N sta bas di lei di Kristu.

²² Pa kilis ki fraku, N ta bida suma fraku tambi, pa N pudi ngaña elis. Asin N ta sedu tudu kusa pa tudu jinti, pa N salba utrus di kualker manera ku N pudi.

²³ N ta fasi tudu e kusas pabia di Bon Noba, pa N pudi toma parti nel.

Jugadur pa Kristu

²⁴ Bo sibi kuma, na disafiu, tudu ta kuri na kurida, ma i un son ku ta ngaña premiu. Bo kuri ku forsa pa bo pudi yangasal.

²⁵ Tudu kil ku ta luta i ta pui disiplina forti na si kurpu pa i pudi ngaña premiu di koroa di floris ku ka ta tarda, ma anos no na luta pa kil ku ka ta dana nunka.

²⁶ E ku manda ami N ta kuri ku uju na meta; N ta sukia, ma i ka na ar.

²⁷ N ta kastiga ña kurpu, N ta pul bas di ña ordi pa, dipus di N konta utru jinti palabra di Deus, ami propi pa ka N bin fika raprobadu.