1 Koríntius 8 - BIBLIA - traduson antigu in Krioulo

Karni di ronia

¹ Gosi N na ruspundi bo purgunta aserka di karni di ronia. I bardadi ku “anos tudu no ten ntindimentu”, suma ku bo fala, ma e ntindimentu i ta pui algin inci ku orgulyu. Amor ta juda.

² Si algin kuda kuma i sibi kualker kusa, na bardadi i ka sibi suma ki dibi di sibi,

³ ma si algin ama Deus, Deus ta kunsil.

⁴ Kusa di kume karni di ronia, no sibi kuma idulu i ka nada na mundu di bardadi, suma ku bo fala. I ka ten utru deus fora di un son.

⁵ Nin ki ten kilis ku ta comadu deusis, na seu o na tera, pabia na bardadi i ten manga di deus ku manga di siñor,

⁶ ma pa nos i ten son un Deus, Pape, ku kumpu tudu kusas, ku no ta vivi pa el; i ten tambi un son Siñor, Jesus Kristu, ku tudu kusa kumpudu pa si mon, ku anos no na vivi pabia del.

⁷ I ka tudu ku ten e ntindimentu. Utrus kustuma dimas ku idulu. Te gosi, ora ke na kume, e ta sinti suma ki karni i di idulu. Manera ku se konsiensia i fraku, e ta sinti susu.

⁸ I ka kusa di kumida ku na cigantanu mas pertu di Deus, pabia no ka ta fika pior si no ka kume; no ka ta fika minjor si no kume.

⁹ Bo jubi pa bo liberdadi ka bin sedu motivu pa frakus mbaransa.

¹⁰ Si algin ku tene konsiensia fraku ojau, abo ku ten kuñisimentu, bu sinta na mesa na lugar di sirmonia, i ka ta dal koraẑen pa i kume karni di ronia?

¹¹ Asin bu “ntindimentu” ta pui bu ermon fraku pa i pirdi, kil ku Kristu muri pa el.

¹² Ne manera bo na peka kontra Kristu, suma ku bo na peka kontra bo ermons, bo na fidi se konsiensia fraku.

¹³ Asin, si i kumida ku na fasi ña ermon peka, nunka mas N ka na kume karni, pa ka N sedu kil ku na pui ña ermon pa i peka.