1 Koríntius 7 - BIBLIA - traduson antigu in Krioulo

Konsiju aserka di kasamenti

¹ Gosi N na trata di kusas ku bo skirbin del. Bo fala kuma i bon pa omi ka kasa,

² ma, pabia i ten manga di pekadu seksual, kada omi dibi di tene si propi minjer; minjer tambi si propi maridu.

³ Omi dibi di fasi si dever suma maridu. Minjer tambi dibi di fasi si dever suma minjer.

⁴ Minjer i ka dunu di si kurpu, ma i si maridu ku tenel. Omi tambi i ka dunu di si kurpu, ma i si minjer ku tenel.

⁵ Bo ka dibi di nega vontadi di ŋutru, son si bo konkorda pa lunjusi di ŋutru un bokadu, pa da tempu pa orason. Dipus, bo ta junta mas, pa ka Satanas tenta bos si bo ten falta di disiplina.

⁶ E kusa ku N konta bos, bo pudi fasil, ma i ka mandamentu,

⁷ pabia N mistiba pa tudu omi sedu suma mi, ma kada kin tene si don ku Deus dal, un de manera, utru di utru manera.

⁸ N na fala pa solterus ku viuvas kuma i bon pa e fika suma mi,

⁹ ma si e ka pudi domina se kurpu, e dibi di kasa, pabia i minjor kasa di ki yardi ku vontadi di kasa.

¹⁰ Pa kilis ku kasadu, N tene mandamentu, ma i ka di mi, i di Siñor, kuma minjer ka dibi di bandona si maridu,

¹¹ ma si i bandonal, pa i fika sin kasa, o nta pa i torna ku si maridu. Maridu tambi pa ka i larga si minjer.

¹² Pa utrus N na fala (ma i ka suma i Siñor ku na fala): si un ermon tene minjer ki ka krenti, si minjer seta fika ku el, pa ka i largal.

¹³ Si minjer tambi tene maridu ki ka krenti, maridu seta fika ku el, pa ka i largal.

¹⁴ Maridu ki ka krenti i pertensi Deus pabia di si minjer. Minjer tambi ki ka krenti i pertensi Deus pabia di si maridu krenti. Si i ka asin ba, bo fijus e ka ta pertensiba Deus, ma na bardadi e pertensil.

¹⁵ Si maridu o minjer ki ka krenti misti separa di kil ki krenti, i pudi separa. Asin maridu o minjer ki krenti i ta fika libri di obrigason, pabia Deus comanu pa pas.

¹⁶ Abo minjer krenti, kuma ku bu pudi sibi si bu na salba bu maridu? O abo maridu, kuma ku bu pudi sibi si bu na salba bu minjer?

¹⁷ Kada un dibi di kontinua vivi konformi don ku Siñor dal, suma ki staba oca Deus comal. Es ku N ta nsina na tudu igreẑa.

¹⁸ Si Deus coma un algin dipus di i sirkunsidadu, pa i fika asin. Si Deus coma algin ku ka sirkunsidadu, ka i sirkunsida.

¹⁹ Sirkunsison i ka nada. Tambi falta di sirkunsison i ka nada. Kusa ki importanti i pa obdisi mandamentu di Deus.

²⁰ Kada un pa i fika na stadu ki comadu nel.

²¹ Si bu comadu ocau katibu, ka bu kuda kila, ma si bu ten manera di fika libri, purbita.

²² Kil ku Siñor coma, mesmu ki sedu katibu, i omi libri ku pertensi Siñor. Kil tambi ku comadu, nin ki sedu libri, i katibu di Kristu.

²³ Bo kumpradu pa bon pres. Ka bo torna sedu katibu di omi.

²⁴ Ermons, kada un dibi di fika dianti di Deus suma ki staba oca i comadu.

²⁵ Aserka di kilis ki solteru, N ka tene ordi di Siñor, ma N ta da ña opinion, suma kin ki di fiansa pabia di miserikordia di Siñor.

²⁶ Na un tempu di kansera suma no sta nel, N oja kuma un omi dibi di fika na manera ki sta.

²⁷ Si bu tene minjer, ka bu buska separa del. Si bu ka tene, ka bu buska minjer,

²⁸ ma si bu kasa, i ka kuma bu peka. Si bajuda kasa, tambi i ka peka, ma tudu ku kasa na sufri kansera na kurpu. I el ku N misti libra bos del.

²⁹ Ke ku N misti fala bos, ermons, kuma tempu sta kurtu. Gosi, kil ku tene minjer, pa i sta suma i ka tene.

³⁰ Kilis ku na cora, pa e sedu suma e ka na cora; kilis ku sta kontenti pa e fasi suma e ka kontenti; kilis ku na kumpra, suma e ka na rakada.

³¹ Kilis ku ta okupa ku tarbaju de mundu li, pa ka e fika suma kin ku maradu nel, pabia mundu, na manera ki sta gosi, i ka na tarda, i na pasa.

³² N ka misti pa bo tene manga di kudadi. Omi ku ka kasa, i ta kuda na tarbaju di Siñor, manera ki pudi pui Siñor kontenti,

³³ ma omi kasadu i ta kuda na kusa di mundu, kuma ki na fasi si minjer kontenti.

³⁴ Asin i ta tene dus pensamentu. Un bajuda o un minjer ku ka kasa, i ta kuda son na tarbaju di Siñor. Si vontadi i pa ntregal si kurpu ku si spiritu, ma minjer kasadu, si kudadi i son na kusas de mundu, kuma ki pudi fasi si omi kontenti.

³⁵ Suma ku N fala asin, N ka misti pa bo fika prezu, ma N misti juda bos pa bo fasi kusa diritu, limpu, ku bo ka ta fika mbaransadu ku nada, pa bo pudi sirbi Siñor.

³⁶ Na kasu di omi ku si bajuda ke ka kasa, si omi sinti kuma i ka na trata ben ku si bajuda, suma ki na pasa idadi di kasa, omi tambi i na sinti vontadi di kasa, i pudi kasa suma i misti; i ka na peka.

³⁷ Ma si un omi sinti kuma i sta firmi na si pensamentu, sin ningin ka na pincal, i ten puder riba di si vontadi, si i rezolvi na si kabesa ki na disa si minina virẑen, i ta fasi ben.

³⁸ De manera, kil ku kasa ku si bajuda, i fasi ben, ma kil ku ka kasa, i fasi mas ben.

³⁹ Minjer kasadu i ta sta ligadu ku si omi nkuantu kila bibu, ma si i muri, minjer ta fika libri pa kasa ku kin ki misti, ma son si omi i krenti tambi,

⁴⁰ ma i ta sta mas kontenti si i fika suma ki sta. Es i ña opinion, ma N kuda kuma N tene tambi Spiritu di Deus.