1 Koríntius 6 - BIBLIA - traduson antigu in Krioulo

Keŝas kontra ermons

¹ Nta si un di bos tene un keŝa kontra utru ermon, bu ta osa lebal dianti di juis ki ka krenti, te pa bu pul dianti di pobu di Deus?

² O bo ka sibi kuma pobu di Deus na bin julga mundu? Si bo na bin julga mundu, nta bo ka kapas di julga kusa pikininu?

³ Bo ka sibi kuma no ten ku bin julga anjus? Ku fadi kusa ku pertensi e vida?

⁴ Nta si bo tene kualker palabra ne vida kontra bo kumpañer, bo ta lebal na kilis ku ka ten nin un lugar na igreẑa?

⁵ N fala es pa pasanta bos borgoña. Nta i ka ten nin un jiru na bo metadi ku pudi julga na metadi di si ermons?

⁶ Ma un ermon ta leba si ermon na justisa dianti di kilis ki ka krentis!

⁷ Na bardadi, si bo tene palabra entri bos ku na ciga na justisa, i mostra kuma bo kai ja. Ke ku manda bo ka ta sufri si algin fasi bos mal o bo sufri furtu, te pa bo leba bo ermon dianti di justisa?

⁸ Abos propi bo ta fasi kusas injustu; bo ta furta, mesmu di bo ermons.

⁹ O bo ka sibi kuma kilis ku ta fasi mal ka na ten parti na renu di Deus?

¹⁰ Ka bo ngana bo kabesa, pabia kilis di mau vida, kilis ku ta adora idulus, kilis ku ta fasi pekadu seksual, kilis ki omoseksual, ladrons, kilis ku risu mon, camiduris, kobaduris di mal ku nturjons, e ka na ten parti na renu di Deus.

¹¹ Utrus na bo metadi seduba asin, ma bo labadu, bo santifikadu, bo ojadu justu na nomi di Siñor Jesus Kristu, pa Spiritu di no Deus.

No kurpu i membru di Kristu

¹² Algin pudi fala kuma i sta libri pa fasi tudu kusa. I bardadi, ma i ka tudu kusa ki bon pa fasi. N sta libri pa fasi tudu kusa, ma N ka na disa nin un son manda na mi.

¹³ Utru pudi fala kuma kumida i pa stomagu, stomagu tambi i pa kumida. I bardadi, ma Deus na bin kaba ku elis tudu. Kurpu i ka pa mau vida; i pa Siñor; Siñor i pa kurpu.

¹⁴ Deus, ku lantanda Siñor di mortu, tambi i na lantandanu pa si puder.

¹⁵ Bo ka sibi kuma bo kurpu fasi parti di kurpu di Kristu? Nta N na toma parti di kurpu di Kristu pa N fasil parti di algin di mau vida? Di nin un manera!

¹⁶ O bo ka sibi kuma, kil ku junta ku algin di mau vida, i ta junta un kurpu son ku el? Skritura fala kuma elis dus e ta forma un kurpu son.

¹⁷ Kil ku junta ku Siñor i ta sedu un ku el na spiritu.

¹⁸ Bo kuri di mau vida. Tudu pekadu ku algin fasi, i fora di kurpu, ma kil ku kai na pekadu seksual, i na peka kontra si propi kurpu.

¹⁹ Nta bo ka sibi kuma bo kurpu i santuariu di Spiritu Santu ku Deus da bos, ku mora na bos? I ka abos ku tene bo kabesa,

²⁰ pabia bo kumpradu ku bon pres. Bo ta tene bo kurpu pa gloria di Deus.