1 Koríntius 5 - BIBLIA - traduson antigu in Krioulo

Susidadi di Igreẑa di Korintu

¹ Noba pajiga kuma na bo metadi i ten susidadi garandi dimas, ku nin kil ku ka kunsi Deus ka ta fasi, kuma utru sta juntu ku minjer di si pape.

² Bo sta sañadu, nin bo ka fika tristi! Bo dibi di tira na bo metadi kil ku na fasi e kusa.

³ Ami di ña parti, N sta lunju na kurpu, ma pertu na spiritu. N julga ja kil ku fasi e kusa suma ku N sta la.

⁴ Bo ten ku junta na nomi di no Siñor Jesus, ami na ña spiritu juntu ku bos. Na puder di no Siñor Jesus,

⁵ bo ta ntrega Satanas ki algin, pa kaba ku si kurpu, pa si alma pudi salba na Dia di Siñor.

⁶ Bo njatamentu i ka bon. O bo ka sibi kuma un bokadu di fermentu ta orfa masa tudu?

⁷ Bo ten ku bota fora fermentu beju di pekadu, pa bo sedu limpu, pa bo sedu nobu masa sin fermentu, suma ku bo sedu na bardadi, pabia Kristu, ki no Karnel di Paskua, i sakrifikadu ja pa nos.

⁸ Asin no na fasi festival di lembransa di Paskua; i ka ku pon di fermentu beju di pekadu ku malisia, ma ku pon ku ka tene fermentu, pon di puresa ku bardadi.

⁹ Na utru karta ku N skirbi bos, N fala pa ka bo junta ku kilis ku ta yanda na susidadi.

¹⁰ N ka fala kuma bo dibi di rapati ku tudu kilis de mundu ku ta yanda na mau vida, ku jinti ku risu mon, ku kilis ku ta furta, ku kilis ku ta adora idulus. Si i asin ba, i minjor bo sai na mundu!

¹¹ Gosi N na skirbi bos pa ka bo junta ku kilis ku ta fala kuma e sedu ermons, ma e ta yanda na mau vida, o e ta fasi risu mon, o e adora idulus, o papia mal di utrus, camiduris, o furtaduris; ki koldadi, nin ka bo kume ku elis.

^12-13 Kal diritu ku N ten pa julga kilis ku sta fora? I Deus ku na julga elis. Ma kilis ku sta dentru di bo igreẑa, i abos ku na julga elis. Bo tira ki omi mau na bo metadi.