1 Koríntius 4 - BIBLIA - traduson antigu in Krioulo

Nkargadu di Deus

¹ Jinti dibi di ojanu suma servus di Kristu, nkargadu di sigridus di Deus.

² Agora no na pera kuma un nkargadu dibi di ojadu fiel.

³ Si N na julgadu pa bos o pa kualker tribunal di omi, N ka mporta nada. Nin ami propi N ka ta julga ña kabesa.

⁴ N ka na sinti nada na ña konsiensia, ma es i ka proba kuma N ka kulpadu. I Siñor ku na julgan.

⁵ Asin, ka bo julga antis di ora. Bo pera tok Siñor bin. I na pui na lus kusa ku sukundidu na sukuru. I na mostra kalkulus ku sta dentru di jinti. Dipus, Deus ta ngaba kada kin suma ki mersi.

Njatansa di koríntius; otridadi di apostolu

⁶ Ermons, pa N juda bos ntindi e kusas li ku manda N toma isemplu di mi ku Apolu, pa bo pudi sibi ke ku signifika e ditadu ku fala asin: “Ka bu pasanta mas di kil ku sta skritu,” pa ka bo yalsa un, bo baŝa utru.

⁷ Kin ku ta diferensiau? Ke ku bu tene ku bu ka dadu el? Si bu dadu el, ke ku manda bu na njata suma bu ka patidu nan el?

⁸ Bo sta ja fartu! Bo sta riku! Sin nos, bo na rena! I ta bon pa bo rena na bardadi, pa no pudi rena juntu ku bos!

⁹ I parsin kuma anos apostolus, Deus punu tras. No sedu suma omis kondenadu pa muri na rua na uju di tudu mundu, na uju di anjus ku di jinti.

¹⁰ No sedu tulu pabia di Kristu, ma abos bo jiru na Kristu; anos i fraku ma abos bo forti. No njutidu; abos bo rispitadu.

¹¹ Te gosi no na sufri fomi ku sedi. No bisti rataju, no bofotiadu, no ka tene kau sertu di mora.

¹² No ta tarbaja ku no mon, no ta kansa. Ora ke falanu mal, no ta fala ben delis; ora ku no pirsigidu, no ta sufri;

¹³ ora ku no kobadu, no ta torna ku palabra mansu. Te gosi no na tratadu suma bora, suma muntudu di mundu.

¹⁴ N ka skirbi asin pa N pasanta bos borgoña; N fasil pa N konsija bos suma ña fijus propi ku N ama.

¹⁵ Nin ku bo teneba des mil pursor na vida kriston, bo ka tene manga di pape, ma na kamiñu di Jesus Kristu abos i ña fijus manera ku N konta bos Bon Noba.

¹⁶ E ku manda N na pidi bos pa bo remendan.

¹⁷ Pabia des N na manda bos Timótiu, ña fiju ku N ama; i fiel na Siñor; i ta juda bos lembra nsinamentu di kamiñu ku N ta yanda nel juntu ku Kristu, ku N ta nsina tambi na tudu parti, na kada igreẑa.

¹⁸ Utrus na yanda sañadu, suma ku N ka na torna bai nunde bos,

¹⁹ ma si Siñor misti, N ka na tarda pa bai visita bos. Asin N ta kunsi kilis ku sta sañadu; i ka son pa palabra, ma N ta oja tambi se puder,

²⁰ pabia renu di Deus i ka sedu di palabra ma di puder.

²¹ Kal ku bo misti? Pa N bai nunde bos ku mantampa, o ku amor ku spiritu mansu?