1 Koríntius 3 - BIBLIA - traduson antigu in Krioulo

Divison na igreẑa

¹ Na bardadi, ermons, N ka pudiba papia ku bos suma ku N kustuma ta fasi ku jinti spiritual, ma N tenba ku papia ku bos suma jinti di mundu, o suma mininus na kamiñu di Kristu.

² N tenba ku alimenta bos ku liti; i ka ku kumida risu, pabia bo ka pudi nguental. Te gosi inda bo ka pudi,

³ pabia bo na yanda inda suma jinti de mundu. Manera ku na bo metadi i ten inda nveẑa ku jus, bo ka sedu nan jinti di mundu? Bo ka na yanda suma utru jinti?

⁴ Si un fala kuma el i di Paulu, utru fala kuma el i di Apolu, nta i ka ta parsi kuma bo sedu de mundu?

⁵ Afinal, kin ki Apolu? Kin ki Paulu? Son servus di Deus ku bo konvertiba pabia delis. Kada un tarbaja konformi Siñor dal.

⁶ Ami N paranta, Apolu regua, ma i Deus ku fasil kirsi.

⁷ De manera, nin kil ku paranta o kil ku regua i ka nada, ma son Deus ku ta da kirsimentu.

⁸ Kil ku paranta ku kil ku regua, elis i un son. Kada un na risibi si pagamentu konformi si tarbaju.

⁹ Anos no sedu kumpañeris pa tarbaja juntu ku Deus. Abos i labur di Deus, ku kasa ku Deus kumpu.

¹⁰ Ku don ku Deus dan, N tarbaja suma mestre di pedreru jiru. N pui alisersu; utru na kumpu kasa riba del. Kada kin jubi kuma ki na kumpu riba del,

¹¹ pabia ningin ka pudi pui utru alisersu fora di kil ku pudu ja, ku sedu Jesus Kristu.

¹² Si algin lantanda riba di ki alisersu un kasa di uru o prata, o pedra di balur, o madera o fenu o paja,

¹³ Dia di Kristu na mostra klaru tarbaju di kada kin. I fugu ku na mostral; ki fugu na proba tarbaju di kada kin pa jubi i kal koldadi.

¹⁴ Si kil ku algin kumpu riba di ki alisersu i ka kema na fugu, si dunu ta risibi pagamentu,

¹⁵ ma kil ku si tarbaju kema na fugu i ta pirdi pagamentu; el i ta sedu salbu, ma suma kil ku pasa na fugu.

¹⁶ Nta bo ka sibi kuma abos i santuariu di Deus, kuma Spiritu di Deus mora na bos?

¹⁷ Si algin dana santuariu di Deus, Deus ta dana si dunu tambi, pabia santuariu di Deus i son pa el; abos ku sedu ki santuariu.

¹⁸ Ka ningin ngana si kabesa. Si algin na bo metadi kuda kuma i ten jiresa de mundu li, i minjor i fasi tulu pa i pudi sedu jiru di bardadi,

¹⁹ pabia jiresa de mundu i tulesa dianti di Deus, suma ki sta skritu: “Deus ta paña jirus na se nturjisa.”

²⁰ I fala tambi: “Siñor kunsi pensamentu di jirus kuma i ka bali nada.”

²¹ Asin, ka ningin njata na omi si kumpañer. Tudu i di bos:

²² Paulu, Apolu, Sefas, e mundu, vida, mortu, gosi, ku futuru — tudu i di bos.

²³ Abos bo sedu di Kristu; Kristu i di Deus.