1 Koríntius 2 - BIBLIA - traduson antigu in Krioulo

Manera ku Paulu konta palabra na Korintu

¹ Ermons, oca ku N bai konta bos aserka di bardadi di Deus, N ka konta bos el ku palabras kansadu, nin ku jiresa de mundu,

² pabia nada N ka buska sibi na bo metadi, son Jesus Kristu, ku si mortu na krus.

³ Oca N staba ku bos, N staba fraku, N na tirmi ku medu.

⁴ Ña manera di fala ku kusa ku N ta konta ka seduba palabra di ngoda na jiresa di jinti, ma ku proba firmi di puder di Spiritu,

⁵ pa ka bo fe nkuña na jiresa di omi, ma pa i nkuña na puder di Deus.

Jiresa di Deus

⁶ Na bardadi no ta papia ku jiresa na metadi di krentis ku maduru na fe, ma i ka jiresa de mundu, nin di otridadis de mundu ku kada dia na pirdi puder.

⁷ No fala di jiresa di Deus ku sukundidu na si sigridu, ku Deus markaba pa no gloria antis di kumsada di mundu.

⁸ Nin un otridadi de mundu ka ntindil, pabia si e ntindilba, e ka na krusifikaba Siñor di Gloria.

⁹ Suma ki sta skritu: “Kusas ku uju ka oja, oreja ka obi, nin i ka yentraba na korson di jinti, i ki kusas ku Deus purpara pa kilis ku amal.”

¹⁰ Deus pui si Spiritu pa mostranu ki kusas, pabia Spiritu ta garbata tudu kusas, te na fundura di Deus.

¹¹ Kal omi ku ta ntindi kusas di omi si i ka spiritu di omi ku sta nel? Asin tambi kusa di Deus, ningin ka pudi ntindil, son Spiritu di Deus.

¹² Anos no ka risibi spiritu di mundu, ma no risibi Spiritu ku bin di Deus, pa no pudi ntindi kusas ku Deus danu di grasa.

¹³ I e kusas ku no na fala; i ka ku palabra ku jiresa di mundu ta nsina, ma ku palabra ku Spiritu Santu ta nsina. No ta splika kusas spiritual pa kilis ki spiritual.

¹⁴ Na bardadi omi na si ntindimentu i ka pudi ntindi kusas di Spiritu di Deus, pabia e ta parsil tulesa. I ka pudi ntindi elis, pabia son Spiritu ku ta pul i ntindi.

¹⁵ Kil ki spiritual i ta ntindi balur di tudu, ma el, ningin ka pudi ntindil.

¹⁶ Kin ku ciga di kunsi pensamentu di Siñor pa i pudi nsinal? Ma anos no tene pensamentu di Kristu.