1 Koríntius 16 - BIBLIA - traduson antigu in Krioulo

Oferta pa krentis di Judeia

¹ Aserka di kusa di oferta pa juda krentis na Jerusalen, bo dibi di fasi suma ku N da ordi pa igreẑas na Galásia.

² Kada dia dumingu kada un di bos ta pui aparti si oferta, konformi i ngaña ki semana. Diñeru ta rakadadu pa, ora ku N bai, i ka ta pirsis lantanda oferta.

³ Ora ku N ciga, N na da kartas pa jinti ku bo kuji, N manda elis pa e leba bo oferta pa Jerusalen.

⁴ Si no oja kuma i bali pena pa N bai, e ta bai ku mi.

Planu di Paulu

⁵ N na bai visita bos dipus di N pasa na Masedonia, pabia N ten ku pasa la.

⁶ Talves N ta fika ku bos tok cuba kaba. Dipus, bo ta judan na kamiñu pa kau ku N na bai.

⁷ N ka misti fasi bos visita kurtu, ma N misti tarda ku bos, si Siñor seta.

⁸ N na fika na Éfesu te Pentekostis,

⁹ pabia porta yabri pa no fasi tarbaju di garandi purbitu, ma i ten manga di inimigu.

¹⁰ Si Timótiu ciga la, bo fasil pa i sinti a vontadi na bo metadi, pabia i sta na tarbaju di Siñor suma mi.

¹¹ Ka ningin njutil. Bo judal pa i kontinua si bias ku pas, pa i pudi bin nunde mi, pabia N na peral ku ki utru ermons tambi.

¹² Aserka di no ermon Apolu, N pidil ciu pa i bai ku ki ermons pa visita bos, ma i ka sinti kuma i dibi di bai inda. I na bin bai mas tardi, si i oja manera.

Manteñas di kabantada

¹³ Bo toma sintidu, bo fika firmi na fe. Bo sedu forti suma omi balenti.

¹⁴ Tudu ku bo na fasi, pa i sedu ku amor.

¹⁵ Ermons, bo kunsi familia di Stéfanas, kuma elis i purmeru konvertidus na Akaia. E ntrega se vida pa sirbi pobu di Deus. N roga bos

¹⁶ pa bo suẑeta koldadi ki jinti, ku tudu kilis ku na pui mon na tarbaju pa juda.

¹⁷ N kontenti suma Stéfanas ku Fortunatu ku Akaiku bin, pabia e toma bo lugar ku na faltanba.

¹⁸ E animan, suma ke anima bos. Jinti suma es, i bon pa rikuñisi elis.

¹⁹ Igreẑas di Asia manda bos manteña. Ákila ku Priska ku igreẑa ku ta junta na se kasa manda bos manteña di amor na Siñor.

²⁰ Tudu ermons manda bos manteña. Bo fala ŋutru manteña ku beẑu santu.

²¹ Ku ña mon propi N skirbi es: Manteña di Paulu.

²² Si algin ka ama Siñor, pa i sedu maldisuadu. Maranata! Siñor, bin!

²³ Fabur di Siñor Jesus ta sta ku bos.

²⁴ N manda ña amor pa bos tudu, na Kristu Jesus.