1 Koríntius 15 - BIBLIA - traduson antigu in Krioulo

Resureison di mortu

¹ Gosi, ermons, N na lembranta bos di Bon Noba ku N konta bos, ku bo risibi, kil ku bo firma nel,

² kil tambi ku tisi bos salbason, si bo rakadal suma ku N konta bos el. Si i ka asin, bo konverti pa nada.

³ Kusa mas importanti i es: N pasanta pa bos kil ku N risibi, kuma Kristu muri pa no pekadu suma ku Skritura fala.

⁴ I nteradu; na terseru dia i lantandadu di mortu, suma ku Skritura fala.

⁵ Pedru ojal; dipus, dozi apostolu ojal;

⁶ dipus, mas di kiñentus ermon ojal di un bias. Mas parti delis sta bibu inda, ma utrus muri ja.

⁷ Dipus, Tiagu ojal; dipus tudu apostolus.

⁸ Na fin di tudu i parsi pa mi tambi, mesmu ku N sedu suma algin ku padidu fora di tempu.

⁹ Ami N mas ka ten importansia di ki tudu apostolus, nin N ka mersi pa N comadu asin, pabia N pirsigi igreẑa di Deus,

¹⁰ ma fabur di Deus fasin kil ku N sedu. Deus ka dan e fabur sin purbitu, pabia N tarbaja mas di ki elis tudu. Ma i ka ami; i fabur di Deus ku na tarbaja ku mi.

¹¹ O i ami, o i elis, i es ku no ta konta; i el ku bo obi, bo seta.

¹² Suma i es ku no na konta, kuma Kristu lantandadu di mortu, kuma ku utrus di bos ta fala kuma resureison di mortu ka ten?

¹³ Si resureison di mortu ka ten, Kristu tambi ka lantandadu.

¹⁴ Si Kristu ka lantandadu, no ka tene nada di konta; abos tambi bo ka tene nada di fia nel.

¹⁵ Anos tambi, no ta parsi suma no na konta mintida aserka di Deus, pabia no fala kuma i lantanda Kristu di mortu, ma si na bardadi mortus ka ta lantandadu, tambi Deus ka lantanda Kristu di mortu.

¹⁶ Si mortus ka ta lantandadu, tambi Kristu ka lantandadu.

¹⁷ Si Kristu ka lantandadu, bo fe ka bali nada; bo sta inda na bo pekadu;

¹⁸ tambi kilis ku muri ku fe na Kristu e sta pirdidu.

¹⁹ Si Kristu danu speransa son pa e mundu, no koitadi mas di ki tudu jinti!

²⁰ Ma na bardadi Kristu lantandadu di mortu, suma purmeru di kilis ku muri.

²¹ Di mesmu manera ku un omi tisi mortu pa mundu, asin tambi un omi tisi resureison di mortu.

²² Suma ku tudu jinti muri pabia e liga ku Adon, asin tambi ku tudu na tene vida pabia e liga ku Kristu.

²³ Kada kin na lantandadu na si ordi: Kristu purmeru; dipus, ora ki bin, kilis ki di sil.

²⁴ Dipus, fin na bin. Kristu na kaba ku tudu forsa ku otridadi ku puder; i na ntrega renu pa Deus Pape.

²⁵ Kristu ten ku rena te ora ku Deus pui tudu inimigus bas di si pe.

²⁶ Ultimu inimigu ku na kabadu ku el i mortu.

²⁷ Palabra di Deus fala kuma i pui tudu kusa bas di si pe. Manera ki fala “tudu kusa” i klaru ki ka na pui na konta kil ku pui tudu kusa bas del, ku sedu Deus.

²⁸ Ora ku tudu kusa fika bas di Kristu, el propi, Fiju, i na fika bas di kil ku pui tudu kusa bas del, pa Deus pudi rena kompletamenti riba di tudu.

²⁹ Kilis ku ta batisadu na konta di utrus ku muri, kal ki se speransa? Si kontra na bardadi mortus ka ta lanta, ke ku manda jinti na batisa na se konta?

³⁰ Anos tambi, ke ku manda no ta nfrenta pirigu tudu ora?

³¹ Kada dia N na pera muri. Ña ermons, N konta bos asin pabia di kontentamentu ku N ten na bos, na no union na Kristu Jesus no Siñor.

³² Si i son pa kualker purbitu de mundu ku N luta na Éfesu ku limarias brabu, ke ku N ngaña? Si mortus ka ta lantandadu, “I minjor no kume, no bibi, pabia amaña no na muri.”

³³ Ka bo ngana bo kabesa. Mau kumpañerasku ta dana bon manera di yanda di algin.

³⁴ Bo riba pa bon kamiñu; ka bo yanda mas na pekadu. N na fala pa bo borgoña kuma utrus inda ka sibi nada di Deus.

Kurpu ku no na lanta ku el

³⁵ Algin na punta: “Kuma ku mortus ta lanta? Kal koldadi kurpu ke na tene?”

³⁶ Tulu! Kil ku bo sumia, i ka na nasi si i ka muri purmeru.

³⁷ Kil ku bo sumia i ka ki planta ku na bin nasi, ma i simentera son, di trigu o di utru koldadi.

³⁸ Deus ta bisti kada simentera konformi i misti; kada simentera ku si kurpu propi.

³⁹ I ka tudu karni ki juntu. I ten karni di omi, karni di limaria, karni di kacu, ku karni di pis.

⁴⁰ I ten kurpu di seu, ku kurpu di tera. Bonitasku di kurpu di seu i un kusa; bonitasku di kurpu di tera i ka juntu.

⁴¹ Sol i ten si bonitasku; lua ten di sil, strelas tambi e ten, ma strelas propi, i ten utrus ku mas ta lampra di ki utru.

⁴² Asin ki na sedu ora ku mortus lanta. Un kurpu ku nteradu i ta podri, ma ora ki lantandadu i ka ta podri.

⁴³ Si i nteradu i fiu, i fraku, ma ora ki lantandadu i ta bonitu, i forti.

⁴⁴ Si i nteradu i kurpu di karni; ora ki lantandadu i ta sedu kurpu di spiritu. Si kurpu di karni ten, kurpu spiritual ten tambi.

⁴⁵ I sta skritu na palabra di Deus kuma purmeru omi, ku sedu Adon, i dadu vida. Sugundu Adon i Spiritu ku ta da vida.

⁴⁶ Bo ntindi kuma i ka spiritual ku ta bin purmeru, ma i kurpu di karni; dipus, kurpu spiritual.

⁴⁷ Purmeru omi, kumpudu di reia, i di tera; sugundu omi bin di seu.

⁴⁸ Kilis ki di tera e sta suma kil ku kumpudu di reia. Kilis ki di seu e sedu suma kil ku bin di seu.

⁴⁹ Suma ku no parsensa i di kil ku kumpudu di reia, asin tambi no na tene parsensa di kil ku bin di seu.

⁵⁰ Kusa ku N na fala bos, ermons, kuma karni ku sangi ka pudi ten parti na renu di Deus; nin kusa ku ta dana ka pudi ten parti na kusa ku ka ta dana.

^51-52 Bo sukuta pa N konta bos un bardadi ku sukundiduba: I ka tudu nos ku na muri, ma, ora ku ultimu korneta toka, no na transformadu di repenti, suma yabri ku fica uju. Ora ku korneta toka, mortus na lantandadu; nunka mas e ka na muri. Anos no na transformadu,

⁵³ pabia i pirsis kil ku ta dana pa i bida kil ku ka ta dana; kil ku ta muri pa i bida kil ku ka ta muri.

⁵⁴ Ora ku es sedu, kil ku ta dana bida kil ku ka ta dana, kil ku ta muri bida kil ku ka ta muri, asin kusa ku sta skritu na bin sedu: “Mortu ngulidu, vitoria ngañadu!”

⁵⁵ “Mortu, nunde ku bu vitoria sta? Mortu, nunde ku bu fidida sta?”

⁵⁶ Fidida di mortu i pekadu. Forsa di pekadu i lei,

⁵⁷ ma Deus obrigadu manera ki ta danu vitoria na no Siñor Jesus Kristu.

⁵⁸ Asin, ña kiridu ermons, bo sedu firmi; ka bo bulbuli; bo tene sempri vontadi na tarbaju di Siñor, suma ku bo sibi kuma, kusa ku bo fasi pa Siñor i ka amonton.