1 Koríntius 13 - BIBLIA - traduson antigu in Krioulo

Amor

¹ N pudi papia linguas di omis, o te di anjus, ma si N ka ten amor, N ta sedu suma sinu ku na somna, o suma feru ku na majadu.

² N pudi tene don di anunsia rekadu di Deus, N kunsi tudu kusa sukundidu, N sibi tudu kusa; N pudi ten garandi fe pa N mundanta montis, ma si N ka ten amor, N ka na sedu nada.

³ N pudi pati pobris tudu ku N tene; N pudi da ña kurpu propi pa i kemadu, ma si N ka ten amor, N ka na purbita nada.

⁴ Amor i sufridur, i bon. Amor i ka nveẑosu; amor ka ta njata, i ka orgulyosu,

⁵ i ka mal-kriadu, i ka intereseru, i ka lestu di raiba, i ka rankorosu,

⁶ i ka ta kontenti ku mal di utru, ma i ta kontenti ku kusa di bardadi.

⁷ I ta sufri tudu; si fe, si speransa ku si pasensa nunka ka ta kaba.

⁸ Amor nunka i ka ta falia, ma si anunsius ten, e na kaba. Si linguas ten, e na para. Si kuñisimentu ten, i na disparsi,

⁹ pabia no kuñisimentu ku no anunsius i ka kompletu,

¹⁰ ma ora ku kil ku kompletu ciga, kil ku ka kompletu na pirdi.

¹¹ Ocan mininu N ta papiaba suma mininu, N ta sinti suma mininu, N ta kuda suma mininu, ma ocan garandi, N kaba ku kusas di mininesa.

¹² Kil ku no na oja gosi, i suma bo na oja fusku na spiju, ma na tempu ku na bin bin, no na oja kara ku kara. Kil ku N sibi gosi, i son un kusa lebi, ma na ki tempu N na kunsi kusa klaru, suma ku Deus kunsin.

¹³ Gosi inda no na fika ku e tris kusa: fe, speransa ku amor, ma mas garandi di tudu i amor.