1 Koríntius 12 - BIBLIA - traduson antigu in Krioulo

Koldadi dons di Spiritu

¹ Gosi, ermons, N na ruspundi kil ku bo skirbi aserka di dons di Spiritu Santu, pabia N misti pa bo ntindil diritu.

² Bo sibi kuma, oca bo ka kunsiba inda Deus, bo ta rolantadu di manga di manera pa irans ku ka pudi fala nada.

³ Asin N misti pa bo ntindi kuma, algin ku na fala na puder di Spiritu di Deus ka ta fala kuma Jesus maldisuadu. Ningin tambi ka pudi fala: “Jesus i Siñor,” si i ka papia na puder di Spiritu Santu.

⁴ I ten manga di koldadi dons, ma i mesmu Spiritu ku ta da elis.

⁵ I ten manga di koldadi sirvis, ma Siñor i ki un son.

⁶ I ten manga di koldadi tarbaju, ma i mesmu Deus ku ta tarbaja tudu kusa na tudu jinti.

⁷ Spiritu ta mostra na kada un na manera diferenti, ma pa ben di tudu,

⁸ pabia Spiritu ta da un algin palabra di jiresa; i ta da utru palabra di kuñisimentu;

⁹ mesmu Spiritu ta da utru fe; i ta da utru puderis di kura;

¹⁰ utru tambi, Spiritu ta dal puder di fasi milagris; utru, i ta dal don di anunsia rekadu di Deus; utru, i ta dal puder di rapara koldadi spiritu; utru, i ta dal puder pa fala na linguas ki ka obi; utru, i ta dal manera di splika ki linguas.

¹¹ Tudu e dons i di un mesmu Spiritu. I el ku ta da kada kin na manera ki misti.

Un kurpu ku tudu si partis

¹² Kristu i suma un kurpu son ku tene manga di parti. Kontudu e ciu, ma e ta junta pa e sedu un kurpu son.

¹³ Anos tudu no batisadu na un Spiritu, pa no forma un kurpu son, judeus ku gregus, katibus ku kilis ku sta libri. I ki un Spiritu ku dadu pa nos tudu no bibi nel.

¹⁴ Kurpu i ka un parti son, ma manga del.

¹⁵ Pe pudi fala: “Suma ami i ka mon, N ka sedu di kurpu,” ma i pertensi kurpu na mesmu.

¹⁶ Oreja pudi fala: “Ami i ka uju; N ka sedu di kurpu,” ma i pertensi kurpu na mesmu.

¹⁷ Si kurpu tudu sedu son uju, kuma ku algin pudi obi? Si tudu seduba oreja, kuma ku algin pudi sinti ceru?

¹⁸ Deus pui kada parti di kurpu na si lugar propi, konformi i misti.

¹⁹ Si tudu seduba un parti son, kurpu ka na tenba,

²⁰ ma na bardadi, i ten manga di parti, ku ta forma un kurpu son.

²¹ Uju ka pudi fala mon: “N ka pirsisa di bo.” Nin kabesa ka pudi fala pe asin: “N ka pirsisa di bos.”

²² Ki parti di kurpu ku parsi mas fraku, no ka pudi fika sin el.

²³ Ki partis di kurpu ku no oja kuma e ka ten garandi balur, i elis ku no ta trata ku mas rispitu. Ki partis na nos ku ka bonitu suma utrus, no ta trata elis mas diritu,

²⁴ na un manera ku ki partis mas bonitu ka ta pirsisa del. Deus forma kurpu na un manera ku ki partis ku ka bonitu tene muitu mas rispitu,

²⁵ pa ka kurpu sedu divididu, ma pa partis tene mesmu tratu un pa utru.

²⁶ Asin, si un parti na sufri, tudu ta sufri ku el. Si un parti ngabadu, tudu ta kontenti juntu ku el.

²⁷ Abos ku sedu kurpu di Kristu; kada un di bos sedu un parti di si kurpu.

²⁸ Na purmeru lugar Deus pui na igreẑa apostolus; na sugundu lugar anunsiaduris; na terseru, pursoris; dipus, kilis ku ta fasi milagris; dipus, kilis ku dadu puder di kura, o di juda utrus, o di guberna na igreẑa, o di fala linguas ke ka obi.

²⁹ I ka tudu ki apostolu, nin anunsiadur, nin pursor. I ka tudu ku ten puder pa fasi milagri,

³⁰ o pa kura duentis, pa fala lingua ki ka obi, o pa splika lingua.

³¹ Bo buska ku mpeñu ki dons mas importanti. Gosi N na mostra bos kamiñu ki mas bon di tudu.