1 Koríntius 11 - BIBLIA - traduson antigu in Krioulo

¹ Bo remendan, suma ku N ta remenda Kristu.

Aserka di kubri kabesa

² Ami N ngaba bos pabia na tudu bo ta lembra di mi, suma ku bo obdisi nsinamentu ku N pasanta pa bos,

³ ma N misti pa bo sibi kuma i Kristu ki kabesa di tudu omi; omi tambi i kabesa di minjer; Deus i kabesa di Kristu.

⁴ Tudu omi ku na ora o i na anunsia rekadu di Deus ku kabesa kubridu, i ta tisi borgoña pa si kabesa.

⁵ Tudu minjer ku na ora o i na anunsia rekadu di Deus sin kubri kabesa, i ta tisi tambi borgoña riba di si kabesa, pabia i ta sta suma i rapa kabesa.

⁶ Asin si minjer ka kubri kabesa ku veu, i minjor i tiskia kabelu. Si pa un minjer tiskia kabelu, o i rapa, i borgoña, i minjor i kubri ku veu.

⁷ Un omi ka dibi di kubri kabesa, pabia el i parsensa di Deus; i spiju di si gloria; ma minjer i spiju di gloria di omi.

⁸ Omi ka kumpudu di minjer, ma minjer kumpudu di omi.

⁹ Nin omi ka kumpudu pabia di minjer, ma minjer kumpudu pabia di omi.

¹⁰ E ku manda, pabia di anjus, minjer dibi di kubri kabesa pa mostra kuma i sta bas di si omi.

¹¹ Ma dianti di Siñor omi pirsisa di minjer, minjer pirsisa di omi tambi,

¹² pabia, suma ku minjer sai na omi, asin tambi ku omi ta nasi di minjer, ma tudu bin di Deus.

¹³ Bo kudal entri bos propi, si i bon pa minjer ora Deus sin kubri kabesa.

¹⁴ Naturesa propi i mostranu kuma, si un omi tene kabelu kumpridu, i borgoña pa el,

¹⁵ ma si i minjer ku tene kabelu kumpridu, i bonitu, pabia i dadu kabelu pa kubril suma veu.

¹⁶ Si algin misti diskuti e kusa li, N pudi kontal kuma no ka ten e kustumu, nin igreẑas di Deus ka tenel.

Sia di Siñor

¹⁷ Ne kusa ku N na bin fala gosi, N ka pudi ngaba bos, pabia bo juntamentu i ka pa ben, ma i pa mal.

¹⁸ Purmeru kusa, N obi kuma, si bo junta pa adora Deus, bo ta dividi grupus. Na un parti N fia kuma i bardadi.

¹⁹ (Sertamenti i pirsis pa bo ten purfia na bo metadi, pa pudi kunsidu kilis ku sta na bardadi.)

²⁰ E ku manda, si bo junta na un lugar, i ka Sia di Siñor ku bo na kume,

²¹ pabia, ora ku bo na kume, kada un ta jumna si kumpañer pa kume di sil; utru ta fika ku fomi, utru ta cami.

²² Nta bo ka tene bo kasas pa kume, pa bibi nel? O bo ta njuti igreẑa di Deus pa pui na borgoña kilis ku ka tene nada? Ke ku N pudi fala bos? Pa N ngaba bos? Nes li N ka pudi ngaba bos.

²³ N risibi di Siñor ki nsinamentu ku N pasanta pa bos, kuma Siñor Jesus, na noti ku Judas falsial, i toma pon,

²⁴ i fala Deus obrigadu, i kebral, i fala: “Es i ña kurpu ki pa bos. Bo fasi asin pa ña lembransa.”

²⁵ Na mesmu manera, dipus di sia, i toma kopu, i fala: “E kopu i nobu kontratu seladu ku ña sangi. Kada bias ku bo bibi nel, bo fasil pa lembra di mi.”

²⁶ Kada bias ku bo kume e pon, bo bibi ne kopu, bo ta konta mortu di Siñor te ki bin.

²⁷ Asin, si algin kume pon di Siñor, o i bibi na si kopu, na mau manera, i na peka kontra kurpu ku sangi di Siñor.

²⁸ E ku manda, kada un dibi di jubi si korson purmeru; dipus i ta kume pon, i bibi na kopu,

²⁹ pabia si i kume, i bibi, i ka rapara kurpu di Siñor, i ta kume i bibi pa si propi kondenason.

³⁰ E ku manda manga di bos sta fraku, duenti, tok utrus muri ja.

³¹ Si no ta seta jubi no propi korson, no ka ta ciga di julgadu.

³² Ora ku Siñor na julganu, i na disiplinanu pa ka no bin julgadu ku kilis di mundu.

³³ Asin ña ermons, ora ku bo junta pa kume, bo pera ŋutru.

³⁴ Si algin tene fomi, pa i kume na si kasa, pa ora ku bo junta, bo ka kai na kondenason. Restu di kusas, ora ku N ciga la, N ta ruma elis.