1 Koríntius 1 - BIBLIA - traduson antigu in Krioulo

Kumsada ku manteña

¹ Ami Paulu, comadu pa vontadi di Deus pa sedu apostolu di Jesus Kristu, juntu ku ermon Sóstenis,

² N skirbi e karta pa igreẑa di Deus ku sta na Korintu, pa kilis ku santifikadu na Kristu Jesus, ku comadu pa sedu pobu di Deus. N na skirbi tambi pa tudu kilis ku na tudu lugar coma nomi di no Siñor Jesus Kristu; i se Siñor, i di nos tambi.

³ N misti pa Deus no Pape ku Siñor Jesus Kristu da bos fabur ku pas.

⁴ Sempri N ta fala ña Deus obrigadu pa bos, suma ki da bos si fabur na Jesus Kristu,

⁵ pabia na bo union ku Kristu bo fasidu riku na tudu, na palabra, tambi na kil ku bo sibi.

⁶ No tustumuñu di Kristu i konfirmadu na bos.

⁷ Asin bo ka falta nin un puder spiritual nkuantu bo na pera pa no Siñor Jesus Kristu bin.

⁸ I na guarda bos firmi te na kabantada, pa ka bo fika kulpadu di nada na dia di no Siñor Jesus Kristu.

⁹ Deus i fiel, ku coma bos pa bo ten kumuñon ku si Fiju Jesus Kristu no Siñor.

Divison na igreẑa

¹⁰ Ermons, N pidi bos, na nomi di no Siñor Jesus Kristu, pa abos tudu bo fala un kusa son. Ka bo sedu divididu, ma bo uni na un pensamentu ku un sintidu.

¹¹ Ña ermons, jinti di familia di Kloé kontan kuma bo tene jus na bo metadi;

¹² kuma entri bos bo na purfia; un ta fala: “Ami i di Paulu;” utru: “Ami i di Apolu;” utru: “Ami i di Sefas;” utru inda ta fala: “Ami i di Kristu.”

¹³ Nta Kristu sta divididu? O Paulu krusifikadu pabia di bos? O bo batisadu na nomi di Paulu?

¹⁴ N ta fala Deus obrigadu pabia N ka batisa nin un di bos; son Krispu ku Gaiu ku N batisa.

¹⁵ Asin ningin ka pudi fala kuma i batisadu na ña nomi.

¹⁶ I bardadi, N batisa tambi Stéfanas ku si familia, ma N ka lembra kuma N batisa mas algin.

¹⁷ Kristu ka mandan pa N batisa; i mandan pa N konta Bon Noba; i ka pa N kontal ku palabra di jiresa umanu, pa N ka lebsi krus di Kristu.

Kristu i puder ku jiresa di Deus

¹⁸ Palabra di krus i tulesa pa kilis ku na pirdi, ma pa nos ku na salba i puder di Deus.

¹⁹ I sta skritu kuma Deus fala: “N na kaba ku jiresa di jinti jiru; N na dana ntindimentu di jinti ntindidu.”

²⁰ Nunde ku jinti jiru sta? Nunde ku ntindidu sta? Nunde ku jinti diskutidur de mundu sta? Nta Deus ka mostra kuma jiresa de mundu i tulesa?

²¹ Deus na si jiresa fasi pa ka omis kunsil na se jiresa, ma i rezolvi usa anunsiu “tulu” pa salba kilis ku fia.

²² Judeus ta pidi milagri; gregus ta buska jiresa,

²³ ma anos no ta konta aserka di Kristu krusifikadu, ku sedu ofensa pa judeus, tulesa pa gregus,

²⁴ ma pa kilis ku Deus coma, judeus ku gregus, pa elis Kristu i puder di Deus, i jiresa di Deus.

²⁵ Tulesa di Deus i mas jiresa di pekadur; frakesa di Deus i mas forsa di pekadur.

²⁶ Ermons, bo lembra kuma ku bo staba oca bo comadu. Bo ka ciu ku tenba jiresa de mundu, nin e ka ciu kilis ku tenba puder, nin fidalgus tambi ka ciu ba.

²⁷ Deus kuji kil ku mundu coma tulu pa pasanta borgoña kilis ki jiru. Deus kuji tambi kil ku mundu coma fraku pa pasanta borgoña kilis ki forti.

²⁸ Deus kuji kil ku mundu njuti, ku jinti oja kuma i ka bali, ku ka sedu nada, pa kaba ku kil ku sedu kusa,

²⁹ pa ka nin un algin njata dianti di Deus.

³⁰ Deus junta bos ku Jesus Kristu; i fasil jiresa pa nos. Pabia del tambi i fasinu justu, i santifikanu, i libertanu.

³¹ Asin, suma ki sta skritu: “Kil ku na njata, pa i njata na Siñor.”