1 Jon 5 - BIBLIA - traduson antigu in Krioulo

Fe na Fiju di Deus

¹ Tudu kil ku fia kuma Jesus i Kristu i fiju di Deus. Tudu kil ku ama un pape, i ta ama tambi si fiju.

² I ne manera ku no ta sibi kuma no ama fijus di Deus, si no ama Deus, no obdisi si mandamentus.

³ No amor pa Deus ta mostra na manera ku no ta obdisi si mandamentus. Si mandamentus gora, nin e ka kansadu,

⁴ pabia tudu fiju di Deus ta vensi mundu. Vitoria ku vensi mundu i no fe.

⁵ Nta kin ku vensi mundu si i ka kil ku fia kuma Jesus i Fiju di Deus?

Tustumuñu aserka di Jesus Kristu

⁶ Es i kil ku bin ku yagu ku sangi, ku sedu Jesus Kristu. I ka bin son ku yagu, ma ku yagu ku sangi. I Spiritu ku ta konfirma e kusa, pabia Spiritu i bardadi.

⁷ I ten tris ku ta da tustumuñu, [na seu: Pape, Palabra ku Spiritu Santu. E tris e sedu un son. I ten tris ku ta testifika na tera]

⁸ ku sedu Spiritu, yagu ku sangi. E tris ta konkorda.

⁹ No ta seta tustumuñu di omi, ma tustumuñu di Deus i mas forti. Tustumuñu di Deus i es ki da aserka di si Fiju.

¹⁰ Kin ku fia na Fiju di Deus i tene e tustumuñu dentru del. Kin ku ka fia na Deus, i na comal munturus, pabia i ka fia na tustumuñu ki da di si Fiju.

¹¹ Es i ki tustumuñu, kuma Deus danu vida ku ka ta kaba; e vida sta na si Fiju.

¹² Kin ku tene Fiju i tene vida. Kin ku ka tene Fiju di Deus i ka tene vida.

¹³ N na skirbi e kusas pa bos ku fia na nomi di Fiju di Deus, pa bo sibi kuma bo tene vida ku ka ta kaba.

Puder di orason

¹⁴ Es i fiansa ku no ten nel, kuma, si no pidi un kusa na si vontadi, i na obinu.

¹⁵ Si no sibi kuma i obinu na tudu ku no pidil, no ta sibi tambi kuma no risibi kil ku no pidil.

¹⁶ Si algin oja si ermon na fasi un pekadu ki ka pa mortu, i ta pidi Deus; Deus ta dal vida. Ma i son pa kilis ku fasi pekadu ki ka pa mortu. I ten pekadu ki pa mortu; N ka fala pa bo ora pa el.

¹⁷ Tudu kusa mau ku algin fasi i pekadu, ma i ten pekadu ki ka pa mortu.

¹⁸ No sibi kuma tudu kil ku padidu na familia di Deus i ka ta fasi pekadu, pabia Fiju di Deus ta guardal; ki malvadu ka ta toka nel.

¹⁹ No sibi kuma no sedu di Deus, ma tudu mundu sta bas di puder di ki malvadu.

²⁰ No sibi kuma Fiju di Deus bin ja, i danu ntindimentu pa no kunsi Deus ki di bardadi. No sta na kil ki di bardadi, ku sedu si Fiju Jesus Kristu. Es i Deus di bardadi; i vida ku ka ta kaba.

²¹ Ña fijus, bo libra di idulus.