1 Jon 4 - BIBLIA - traduson antigu in Krioulo

Anunsiaduris falsu

¹ Ña kiridu ermons, ka bo fia na tudu jinti ku fala kuma e tene Spiritu di Deus, ma bo proba elis pa jubi si na bardadi ki spiritu bin di Deus, pabia i ten manga di anunsiadur falsu ku lanta na mundu.

² Asin ku bo ta pudi rapara si i Spiritu di Deus: Tudu algin ku fala klaru kuma Jesus Kristu bin suma omi, i tene Spiritu di Deus.

³ Tudu kil ku nega konta kuma Jesus Kristu bin suma omi, spiritu ki tene i ka di Deus, ma i spiritu di anti-kristu, kil ku bo obi faladu i na bin bin; gosi i sta ja na mundu.

⁴ Ña fijus, abos bo sedu di Deus, bo vensi ki anunsiaduris, pabia kin ku sta na bos i mas ki algin ku sta na jinti di mundu.

⁵ Elis i di mundu; e ku manda e ta papia kusas di mundu; mundu ta obi elis.

⁶ Anos i di Deus. Kin ku kunsi Deus i ta obinu. Kin ki ka di Deus ka ta obinu. Asin ku no ta kunsi Spiritu di bardadi ku spiritu ku ta yara.

Deus i amor

⁷ Ña kiridu ermons, no ama ŋutru, pabia amor i di Deus. Tudu kil ku ten amor i fiju di Deus; i kunsi Deus.

⁸ Kil ku ka ten amor i ka kunsi Deus, pabia Deus i amor.

⁹ Deus mostra si amor pa nos suma ki manda si un Fiju son pa mundu pa no pudi tene vida pabia del.

¹⁰ Es i amor; i ka kuma no ama Deus, ma i el ku amanu, i manda si Fiju pa no pekadu pudi tiradu pabia del.

¹¹ Ña kiridu ermons, si Deus amanu de manera, no dibi di ama ŋutru tambi.

¹² Ningin ka ciga di oja Deus, ma si no ama ŋutru, Deus sta na nos; si amor sta kompletu na nos.

¹³ No sibi kuma no sta na Deus, Deus sta na nos, pabia i danu si Spiritu.

¹⁴ No oja, no konta kuma Deus no Pape manda si Fiju pa i sedu Salbadur di mundu.

¹⁵ Kil ku konta klaru kuma Jesus i Fiju di Deus, Deus sta nel, el i sta na Deus.

¹⁶ No sibi kuma Deus amanu; tambi no fia na si amor. Deus i amor. Kil ku sta na amor i sta na Deus; Deus sta nel.

¹⁷ Amor i kompletadu na nos pa no pudi ten fiansa na dia di juisu, pabia suma ku Jesus sedu, asin ku no sedu tambi ne mundu.

¹⁸ Medu ka sta na amor, ma un amor kompletu i ta tira medu fora, pabia medu liga ku kastigu. Kin ku ten medu, si amor inda ka sta kompletu.

¹⁹ No ama pabia i amanu purmeru.

²⁰ Si algin fala kuma i ama Deus, ma i nfastia si ermon, i munturus, pabia kil ku ka ama si ermon ki oja, kuma ki pudi ama Deus ki ka oja?

²¹ E mandamentu, i Kristu ku danu el, kuma kin ku ama Deus, pa i ama tambi si ermon.