1 Jon 3 - BIBLIA - traduson antigu in Krioulo

Fijus di Deus

¹ Bo oja garandi amor ku no Pape mostranu, pa no comadu fijus di Deus. Asin ku no sedu na bardadi. E ku manda jinti di mundu ka kunsinu, pabia e ka kunsil.

² Ña kiridu ermons, gosi no sedu fijus di Deus; ke ku no na bin sedu i ka klaru inda, ma no sibi, ora ku Kristu bin, no na sedu suma el, pabia no na ojal manera ki sedu.

³ Tudu ku ten e speransa nel, i dibi di limpa si vida, suma ku el i limpu.

⁴ Tudu kil ku fasi pekadu i ta kebra lei di Deus, pabia pekadu i ora ku bu kebra lei.

⁵ Bo sibi kuma Kristu bin pa tira no pekadus. El i ka tene pekadu.

⁶ Tudu algin ku sta nel i ka ta peka, ma tudu kil ku na peka i ka ojal, nin i ka kunsil.

⁷ Ña fijus, ka bo disa ningin ngana bos. Kil ku ta fasi kusas diritu, ki algin i justu, suma ku Kristu i justu.

⁸ Kin ku ta fasi pekadu i di diabu, pabia diabu peka disna di kumsada. I pa e fin ku Fiju di Deus bin, pa kaba ku kusas ku diabu fasi.

⁹ Kil ku padidu na familia di Deus ka ta fasi pekadu, pabia simentera di Deus sta nel. I ka pudi kontinua na pekadu, pabia i padidu na familia di Deus.

¹⁰ I es ku ta mostra fiju di Deus ku fiju di diabu: Kil ku ka ta fasi kusas diritu, ku ka ama si ermon, i ka di Deus.

Amor pa ŋutru

¹¹ Palabra ku bo obi disna di kumsada i es, pa no ama ŋutru.

¹² I ka suma Kain ku seduba di ki malvadu, i mata si ermon. Ke ku manda i matal? I pabia i ta fasi kusas mau; si ermon ta fasi kusas bon.

¹³ Ña ermons, ka bo dimira si jinti di mundu nfastia bos.

¹⁴ No sibi kuma no kapli ja di mortu pa vida, pabia no ama no ermons. Kin ku ka ama si ermon i sta inda na mon di mortu.

¹⁵ Kil ku nfastia si ermon i matadur. Bo sibi kuma nin un matadur ka tene vida ku ka ta kaba.

¹⁶ I es ku manda no sibi ke ki amor, suma ku Kristu da si vida pa nos. Anos tambi no dibi di da no vida pa no ermons.

¹⁷ Kin ku sta ben ne mundu, i oja si ermon ku falta, i fica si korson pa el, kuma ki pudi fala kuma amor di Deus sta nel?

¹⁸ Ña fijus, ka no ama son ku palabra di boka, ma no ama na bardadi ku kil ku no na fasi.

Fiansa na Deus

¹⁹ De manera no ta sibi kuma no sta na bardadi, no ta pui no korson diskansadu dianti di Deus.

²⁰ Si no korson na kondenanu, no sibi kuma Deus i mas garandi di ki no korson. El i sibi tudu kusa.

²¹ Ña kiridu ermons, si no korson ka kondenanu, no fiansa dianti di Deus.

²² Kualker kusa ku no pidil, no na risibi, pabia no obdisi si mandamentus, no ta fasi kil ki misti.

²³ Es i si mandamentu, pa no fia na nomi di si Fiju Jesus Kristu, pa no ama ŋutru suma ki manda.

²⁴ Kin ku obdisi si mandamentu i sta na Deus; Deus sta nel. Es ku ta pui no sibi kuma i sta na nos, pabia di Spiritu ki danu.