1 Jon 2 - BIBLIA - traduson antigu in Krioulo

Kristu no Judadur

¹ Ña fijus, N na skirbi bos e kusas pa ka bo peka, ma si algin fasi un pekadu, no tene un algin justu, ku sedu Jesus Kristu, ku ta difindi pa nos dianti di no Pape.

² I pabia di sakrifisiu di Kristu ku no pekadu pudi tiradu; i ka son di nos, ma di jinti di tudu mundu.

³ Si no obdisi mandamentu di Deus, no ta sibi kuma no kunsil.

⁴ Si algin fala kuma i kunsil, ma i ka obdisi si mandamentu, i munturus; bardadi ka sta nel.

⁵ Kil ku obdisi si palabra, na bardadi, amor di Deus sta kompletu dentru del. Asin no ta sibi kuma no sta na Deus.

⁶ Kil ku fala kuma i sta nel, i dibi di yanda suma ku Kristu yanda.

⁷ Ña kiridu ermons, i ka nobu mandamentu ku N na skirbi bos, ma i mandamentu antigu ku sempri bo tene disna di kumsada. E antigu mandamentu i palabra ku bo obi ja.

⁸ Kontudu e mandamentu ku N na skirbi bos i nobu, si bardadi i ta ojadu na Kristu, tambi na bos, pabia sukuru na bai; lus di bardadi na numia.

⁹ Kil ku fala kuma i sta na lus ma i nfastia si ermon, te gosi i sta na sukuru.

¹⁰ Kil ku ama si ermon i sta na lus; i ka ten nada nel ku ta pui algin mbaransa,

¹¹ ma kil ku nfastia si ermon i sta na sukuru; i na yanda na sukuru; i ka sibi nunde ki na bai, pabia sukuru segal uju.

¹² Fijus, N na skirbi bos, suma ku bo pekadu purdadu pabia di nomi di Kristu.

¹³ Papes, N na skirbi bos, pabia bo kunsi kil ku sedu disna di kumsada. Jovens, N na skirbi bos, pabia bo vensi ki malvadu. Fijus, N skirbi bos, pabia bo kunsi no Pape.

¹⁴ Papes, N skirbi bos, pabia bo kunsi kil ku sedu disna di kumsada. Jovens, N skirbi bos, pabia abos i forti; palabra di Deus sta na bos; bo vensi ki malvadu.

¹⁵ Ka bo ama mundu nin kusas ku sta nel. Si algin ama mundu, amor di no Pape ka sta nel,

¹⁶ pabia tudu ku sta na mundu, ku sedu kusas ku no kurpu ta dija, ku uju ta oja i misti, ku vida di ronku, es tudu i ka di no Pape, ma i di mundu.

¹⁷ E mundu na pasa, ku tudu si diseẑus mau, ma kil ku na fasi vontadi di Deus i na fika pa sempri.

Inimigu di Kristu

¹⁸ Ña fijus, es i ora di kabantada. Suma ku bo obi kuma anti-kristu na bin, manga di anti-kristu parsi ja. Es ta mostranu kuma no sta ja na ora di kabantada.

¹⁹ E sai na no metadi, ma e ka pertensinu, pabia si elis e seduba di nos e ta fikaba ku nos. E sai pa i pudi mostradu klaru kuma elis i ka di nos.

²⁰ Deus darma Spiritu Santu riba di bos; bo ntindi tudu.

²¹ I ka suma bo ka kunsi bardadi ku manda N na skirbi bos, ma pabia bo kunsil; tambi bo sibi kuma nin un mintida ka ta sai na bardadi.

²² Kin ki munturus si i ka kil ku nega kuma Jesus i Kristu? I el propi ki anti-kristu, kil ku nega Pape ku Fiju.

²³ Kil ku nega Fiju, tambi i ka tene si Pape. Kil ku seta Fiju, i tene tambi si Pape.

²⁴ Asin, bo ten ku rakada na bo korson ki palabra ku bo obi disna di kumsada. Si bo rakada ki palabra, bo ta sta sempri na union ku Fiju ku si Pape.

²⁵ Es i kusa ki fala i na danu: vida ku ka ta kaba.

²⁶ N skirbi bos e kusa aserka di kilis ku misti ngana bos.

²⁷ Spiritu Santu ku darmadu riba di bos i na fika ku bos. I ka pirsis pa algin nsina bos, pabia Spiritu ta nsina bos aserka di tudu kusas. El i bardadi; i ka ta konta mintida. Suma ki nsina bos, bo pega na Kristu.

²⁸ Ña fijus, bo pega nel, pa ora ki bin, no pudi ten fiansa; no ka na fika ku borgoña si dianti dia ki bin.

²⁹ Si bo sibi kuma el i justu, bo sibi kuma tudu kin ku ta fasi kusa diritu i si fiju.