زەبوورەکان 148 - پەیمانی نوێ و زەبوورەکان بە سۆرانی

¹ هه‌لیلویا. ستایشی په‌روه‌ردگار بكه‌ن له‌ ئاسمانان. له‌ به‌رزاییه‌كان ستایشی بكه‌ن.

² ئه‌ی هه‌موو فریشته‌كانی، ستایشی بكه‌ن. ئه‌ی هه‌موو سوپاكه‌ی، ستایشی بكه‌ن.

³ ئه‌ی خۆر و مانگ، ستایشی بكه‌ن. ئه‌ی هه‌موو هه‌ساره‌كانی ڕووناكی، ستایشی بكه‌ن.

⁴ ئه‌ی ئاسمانی ئاسمانان، ستایشی بكه‌ن. ئه‌ی ئه‌و ئاوانه‌ی له‌ سه‌رووی ئاسمانانن.

⁵ با ستایشی ناوی په‌روه‌ردگار بكه‌ن، چونكه‌ فه‌رمانی دا و ئافرێندران،

⁶ تاهه‌تایه‌ و تا ماون جێگیر ده‌بن، سنووریی بۆ داناون لێی تێناپه‌ڕن.

⁷ له‌ زه‌وییه‌وه‌ ستایشی په‌روه‌ردگار بكه‌ن، ئه‌ی ئه‌ژدیهاكان و قووڵایی ده‌ریاكان.

⁸ ئاگر و ته‌رزه‌، به‌فر و ته‌م، ڕه‌شه‌با كه‌ وشه‌ی ئه‌و جێبه‌جێ‌ ده‌كه‌ن.

⁹ چیاكان و هه‌موو گرده‌كان، دره‌ختی به‌ردار و هه‌موو ئورزه‌كان.

¹⁰ گیانله‌به‌ر و هه‌موو ئاژه‌ڵ، خشۆک و باڵدار.

¹¹ پاشاكانی زه‌وی و هه‌موو گه‌لان، سه‌رۆكه‌كان و هه‌موو دادوه‌رانی زه‌وی،

¹² گه‌نجان و كچانیش، پیران و منداڵان،

¹³ با هه‌موو ستایشی ناوی په‌روه‌ردگار بكه‌ن. چونكه‌ ته‌نها ناوی ئه‌و به‌رزه‌. شكۆمه‌ندیی ئه‌و له‌ سه‌رووی زه‌وی و ئاسمانانه‌.

¹⁴ قۆچی بۆ گه‌لی خۆی به‌رز كردووه‌، شانازی بۆ هه‌موو خوداناسانی. بۆ نه‌وه‌ی ئیسڕائیل، ئه‌و گه‌له‌ی كه‌ لێیه‌وه‌ نزیكن. هه‌لیلویا.