Revelation 8 - Patamuna New Testament Revised

7 Pe Iku'nài Yachittok

¹ Kalinilu Mule uya 7 pe iku'nài yachittok ikkwàssak takkokase yau, eppana iwechippù epùn po tachin pe kulu pùla.

² Màlàyau 7 pan kon inchelù yamùk Katù yemloto po satippe tùwessan yeneppù uya, tok lepasak wechippù 7 pan paka letù lùppù walai wai ke.

³ Tùulon inchelù appoi'nan tùpottàsen yen kolù yesak uyàpùppù molopai satippe iweleutappù tùpottàsen yapon piyak. Eke pe appoi'nan tùpottàsen ke ilepappù, ipottàtoppe ya tamù'nawolon kon Katù ponalok kon kappon yamùk wàpùlematok pokonpe, tùpottàsen yapon kolù po, aponnok yemlotopo.

⁴ Appoi'nan tùpottàsen kelechin wenukuppù màlà Katù ponalok kon kappon yamùk wàpùlematok pokonpe, inchelù Katù yemlotopo tùwessen yemyapai.

⁵ Molopai nen uchi inchelù uya appoi'nan tùpottàsen yen yanùmùppù molopai yanùkkappù ya apok ke tùpottàsen pottàtok yapon pon ke, molopai yenu'mappù ya non pona. Molo wala'napi wetoippàtùppù màlà, pata wekamlippàtùppù àsà pe molopai tùlùpùnù utàppù.

Paka Letù Walainon Wai Yamùk

⁶ Màlàyau 7 pan kon inchelù yamùk wekonekappù 7 pan paka letù walainon wai yamùk tàulùnpa pàk.

⁷ Wapiyalok inchelù uya tùwayi tàulùnpappù. Tuna pun molopai apok, mùn ke yoi'masak, uyàpùppù tùwekkwamù pe non pona. Non pùkkù uyassak wechippù 1/3 pe, yuk yamùk pùkkù uyassak wechippù 1/3 pe, molopai tamù'nawàlà lola wanak uyassak wechippù.

⁸ Molopai ite'mappù pokon inchelù uya tùwayi tàulùnpappù. Eke wùk kasa tùusensen uyatù apok ke yenu'mappù màlà palau kak. Palau pùkkù wenasak wechippù mùn pe 1/3 pe.

⁹ Molopai tamù'nawolon kon nulànan kon ànùkyan nànan palau kawon kon tonpa yamùk welikùppù màlà 1/3 pe, molopai itonpa pe 1/3 pe kanau yamùk umattappù.

¹⁰ Màlàyau icholùwano inchelù uya tùwayi tàulùnpappù. Eke chilùkà ulenpansak apok uyatù kasa wepukappù kaupai, molopai iwepukappù tuna yamùk pùkkù molopai non yapai tùwepakkasan tuna kak 1/3 pe.

¹¹ (Chilùkà yesek màlà Maik.) Tuna yamùk pùkkù wenappù màlà maippe 1/3 pe molopai tukke kappon yamùk u'matùppù tuna tinchise. Tok wemaipasak ike, masapùla maippe iwenasak pàk.

¹² Màlàyau ichakùlà'no inchelù uya tùwayi tàulùnpappù. Wei pùkkù wànàppù 1/3 pe molopai kapùi pùkkù 1/3 pe, molopai chilùkà yamùk tonpa yamùk nàlà 1/3 pe, màlàpàk ipùkkù pe tok yakkwayi usà'nùpùppù, akkwa pe pùla iwechippù weinai 1/3 pe, molopai ewalupà pe kulu nàlà ewalupàttau 1/3 pe.

¹³ Màlàyau uyenu tùlùppù uya, molopai umuchimà wainùnsak kau, màlà wentaime yetappù uya eke pe, “Entuppak man! Entuppak talumattàntok wechi màlà molo! Àsà pe kulu iwechi kupù pe man mùkyamlo tamù'nawolon kon tùwemassan non po pona, mùkyamlo tùulon kon àsolùwawon kon inchelù yamùk uya paka letù walai tùwayi kon tàulùnpa yau!” tukaik.