Revelation 12 - Patamuna New Testament Revised

Nossan Molopai Ulupelu

¹ Molopai nen uchi eke yentok ipàkàlà usenpoikappù epùn poi. Nossan wechippù màlà molo, ipon wechippù wei molopai kapùi wechippù itta yo'no, molopai 12 pan chilùkà yamùk ipokon alok wechippù ippai pàk.

² Monoppe iwechippù iwentu winàkàik molopai iwechi'mosak utaimelunpa wentaimeppù.

³ Tùulon yentok ipàkàlà usenpoikappù màlà epùn po. Molo iwechippù Eke, ichuweyu lùmà ulupelu, 7 pe ippai wechippù molopai 10 pe iletù yamùk, molopai alok wechippù ippai yamùk po.

⁴ Taukù ke itonpa pe chilùkà yamùk pàlàkappù ya kak poi 1/3 pe, molopai icholokappù ya non pona. Nossan mule ke iwentu winàkài'no yemlotopo iwechippù, imle yantoppe tùuya iwentukapù pe.

⁵ Màlàyau iwentuppù walawoppe, tamù'nawolon pata yamùk yepoi itepulu pe tùwechi woton ke, sa'man ayanpun tekessen ke. Tùse mule yanùmùppù màlà molopai yalàppù Katù piyak molopai yapon piyak.

⁶ Nossan wepeppù wontaik yak, molo Katù uya ipatassek woton konekasak wechippù, imainanpatok yau woton 1,260 pe wei.

⁷ Màlàyau wepanta'mantok wepyattàppù epùn po. Michael molopai yo'non kon inchelù yamùk uya ulupelu panta'mappù, mùkkàlà uya nàlà tok panta'mappù tiyinchelùyi yamùk pokonpe.

⁸ Tùse ulupelu yentaikappù tok uya, molopai ulupelu molopai itinchelùyi yamùk kupùppù epùn po tok wettoppe pen nen uchi màlà.

⁹ Eke ulupelu lùmà yenu'mappù màlà, mùkkàlà penalok àkài, Makui wapùla Settan itesek, tamù'nawolon kon kappon yamùk non pon kon yennakanàippù. Yenu'mappù màlà non pona tamù'nawàlà itinchelùyi yamùk pokonpe.

¹⁰ Màlàyau nen uchi eke mayin yetappù uya epùn po. “Sàlà pe Katù winàpaino wepùikattàntok molopai meluntà uyàssak man! Molopai Kùkatùyi wettok Itepulu pe! Molopai Kùlaik, ineunokoppù wettok apàikkeppe! Masapùla kùtonpa kon yamùk winàkàik àli pe ichelupasak kon Katù yemloto po wei kaichalà molopai ewalupà kaichalà, yenu'mappù man epùn yapai,” te ya.

¹¹ “Tok uya yentaikasak man Kalinilu Mule mùnù winà, molopai ailon tùnekamappù kon Katù yekale winà, tok uya tùwemattok kon pùnùmappù pen màlàpàk tùwelikù kon pàk tok usenalippa pùla iwechippù.

¹² Màlàpàk uchi atauchinpakà epùn, molopai amyamlo tamù'nawolon kon molo yau tùwemassan! Tùse àsà pe iwechi màlà non molopai palau pona! Masapùla Makui uttàsak man apyakù'nokon molopai iwanùssak man we'naikantok ke, masapùla mala kulu tùweyu wà'nànsak ittuyan,” teppù ya.

¹³ Ulupelu uya tenu'masak non pona ittusak yau, nossan mùkkàlà walawok muleppù ke iwentusak lùppù wenaimappù imattanùsse.

¹⁴ Nossan lepappù màlà asa'là eke umuchimà yapàli ke, iwainùntoppe tùpatassek wontaik yawon yak. Molo imainanpatoppe inai pàkàlà là molopai màlà yentak miyaiwa molopai màlà yentak malalà ipona, àkài uya yepolo tukaik.

¹⁵ Màlàyau àkài uya tuna ikkwamùppù tùnta yapai tùwu'masen tuna kasa nossan ye'mappù pàk, tuna'ma uya yatoppe.

¹⁶ Tùse non uya nossan pùikattàppù, iwentakali'mappù molopai tuna ulupelu mùta yapai iyàssak lùppù yeuno'mappù ya.

¹⁷ Màlàyau ulupelu we'naikasak kulu wechippù màlà nossan pàk. Molopai iitàppù imle tonpassan panta'mase, tamù'nawolon kon Katù uya enupantok maimu yawolon kon, molopai ailon Jesus winà yenpoikasak lùppù pàk ailon pe tùwessan panta'mase.

¹⁸ Molopai ulupelu wechippù satippe palau yena po.