Matthew 28 - Patamuna New Testament Revised

Jesus We'wuluukatok

¹ Jew Wàlàkkattok weyu tùpo, wapiyalok wei Suntayakka wemapù pe, Mary Magdalene molopai tùulon Mary tawonnan utàppù màlà uluwaik yense.

² Màlà yattai meluntà pe tùlùpùnù wechippù molo. Itepulu inchelùyi uttàppù màlà epùn poi, tàk pelenkappù ya uluwaik mùta poi, molopai iweleutappù ipona.

³ Icheneppù màlà pata wekamlipù kasa molopai ipon wechippù aimu'ne kulu.

⁴ Uluwaik yennàinan wettalipasak kulu wechippù màlà ipàk, tok pùlànài'nùmùppù molopai iwelichak kasa tok wenappù.

⁵ Inchelù uya nossan yamùk yelupappù. “Kettalipatàu uchi, Jesus ipukapàssak lùppù pulusuk pona iwa auya'nokon pe tùttuyaik,” teppù ya.

⁶ “Talà pùla nen man, iwuluukappù man wa teppù ya kasa. Àittàk kon, ipatappù yense.

⁷ Asse'neichi itàtàk kon ya'lonkonnùssan pàk yekamase, ‘Iwuluukappù man weli'nàtok yapai molopai nen uchi nùtàyan Galilee pona awapiya'nokon. Molo yene auya'nokon màlà!’ mùkatàik. Mùttutàik uchi àpàkù'nokon unekamappù,” teppù ya.

⁸ Màlàpàk uluwaik nàmàppù tok uya tùusemittàpaik, tok wettalipasak wechippù màlà tùse nàlà tok utauchinpasak, molopai aitunpe tok utàppù ya'lonkonnùssan pàk yekamase.

⁹ Màlà yattai là Jesus uya tok yepoloppù asantau, molopai tok pàk, “Tàwà wàlàkà'nàtok apyau'nokon nechii,” teppù. Tok uyàpùppù ipyak molopai tok uya itta pàk yachippù, molopai tok uya yapulàppù.

¹⁰ “Kesenalippatàu. Itàtàk kon utonpa yamùk utàtoppe Galilee pona yekamatantàk, molopai molo tok uya uyene màlà,” teppù ya.

Uluwaik Yennàinan Yekale

¹¹ Màlàyau nossan yamùk utà tùse, uluwaik yennàinan tonpa yamùk wennappoppù màlà pata pona molopai eke ton paatele yamùk pàk tamù'nawolon iwekkussak lùppù yekamappù tok uya.

¹² Eke ton paatele yamùk molopai Jew yamùk tùnamasan wepilipùppù molopai tùnkupù kon woton konekappù tok uya, eke pe pùlayatta tùlùppù tok uya màlà soicha yamùk yemyak.

¹³ Molopai tok pàk, “ ‘Ya'lonkonnùssan uyàpùppù nechii ewalupàttau molopai itàkàpù yonamùppù tok uya ina we'nùmù tùse,’ mùkatàik,” teppù tok uya.

¹⁴ “Molopai Kopùna uya sàlà yetasak yau, ailon tetoppe ya ina uya ikupù màlà molopai autaimelunpatok pùla iwechi màlà,” teppù tok uya.

¹⁵ Uluwaik yennàinannùssan uya pùlayatta yekkwatùppù molopai ikuttoppe tùuya'nokon yekamasak lùppù kupùppù tok uya. Sàlà wei tepose sàlàichi màlà itekale Jew yamùk nekama mailàlà.

Jesus Usenpoika Tùnenupassan Kon Piyak

¹⁶ 11 pan kon Jesus ya'lon kon utàppù màlà Galilee pona, Jesus nekamappù tùutàtok kon ipona pe wùk pona.

¹⁷ Jesus yensak tùuya'nokon yau, tok uya yapulàppù, tùse tùulon kon uya ailon te ma'le iwechippù.

¹⁸ Jesus uyàpùppù màlà mei pùla molopai tok pàk, “Ulepasak man tamù'nawolon apàikkek ke epùn yau molopai non po.

¹⁹ Itàtàk kon uchi tamù'nawolon kon kappon yamùk piyak, i'nailàlà. Molopai uya'lon kon pe tok mùkonekatàik, tok menpataukatàik Ukàipùnù yesek yau molopai Imu yesek yau molopai Wakù Akkwalù yesek yau.

²⁰ Molopai tok menupatàik tamù'nawolon “Mùkuttàik” teppù uya lùppù àpàkù'nokon maimu yawàlà tok wettoppe. Apyau'nokon wechi màlà tàwàlà pata weyu wenukattok ponalà,” teppù ya.