2 Thessalonians 3 - Patamuna New Testament Revised

Ina Pona Àpùlematàk Kon

¹ Molopai nen uchi wenukapù pe, ina pona màpùlematàik, te uya sàlà àpàkù'nokon ina tonpa yamùk, Itepulu maimu utalenkatoppe miyaiwa asse'ne molopai yapulàtok wessepotoppe àkklottau'nokon iwekkupùppù kasa.

² Àsà ton, molopai àli ton kappon yamùk winàpai Katù uya ina kuttoppe màpùlematàik ina pona. Masapùla tamù'nawolon kon kulu là wechi ailon tetok yesappe pen màlà.

³ Tùse Itepulu mùkkàlà tàwàlàlà ailon pe tùwessen. Meluntà pe ama kon ya màlà molopai Ene Makui winàpai àkupù kon ya wakù pe.

⁴ Molopai ina uya kulu Itepulu yau ailon pe ittusak man, eyenupatok kon ina uya maimu yawàlà ewechi kon, molopai imaimu yawàlà luppù ewechi kon tàwàlà.

⁵ Tàwàichi Itepulu ayalài'nokon, Katù pùnùnma kon pa eke pe kulu, molopai Christ yau echii'ma yà'làlà pàlikatok auya'nokon màlà intùlùppù.

Emya'nek Pe We'nà Namai'no

⁶ Itepulu Jesus Christ yesek yau meluntà pe eyelupayatàu ina, ina tonpa yamùk, mùkyamlo emya'neppe nai'nan nùk kùtonpa yamùk kùlottau kettàu, eyenupatok kon ina uya yawàlà pùla nai'nannùk kùlottau.

⁷ Amyamlo pe eyiwalà'nokon ànkupù kon mùttuyatàik, màlà yamùk ina nùkupùssan. Emya'neppe ina wechi pùn ku apyau'nokon ina wechi yau.

⁸ Ànù'là winàpai te'maik pùla là kùyali yekkwatù ina uya pùn. Tùse ina we'wotokomappù sa'man pe; wei nai molopai ewalupàttawàlà. Ànù'là wotokoma ina uya tukaik.

⁹ Ina uya sàlà kupùppù upùikattàtok auya'nokon yeponài yeppe lànen wechi tùse. Ina uya ikupùppù màlà yentok auya'nokon ipàkàlà pe.

¹⁰ Apyau'nokon tùwechi kon yau ina uya yekamappù àpàkù'nokon, “Ànù'là e'wotokomapaino pen uta'lettà pen màlà,” tawon.

¹¹ Ina uya sàlà wate, masapùla, tùulon kon kappon yamùk emya'neppe tùwemassan wechi àkklottau'nokon yeta tùuya'nokon pàk, mùkyamlo yà'làlà ku'nài nan pen iwotokoyi pùn walai non tùse tùulon kon yeselu yennài nan, tok pantomù pàk tùuselupasan yauchin pe.

¹² Itepulu Jesus Christ yesek yau pùsamlo kappon yamùk yekamappoyan kulu ina tùuseka'nonkaik, meluntà pe, eppana echii'ma tok we'wotokomatoppe, tùwematok kon iwinà yepotoppe tùuya'nokon.

¹³ Tùse amyamlo, ina tonpa yamùk, wakù kupù pàk kesetakkatàu.

¹⁴ Molo ànù'là wechi màlà itekale, ina neunossai'nùk sàlà kaleta yau, maimu yawàlà tùwechi woton pen. Tùse meneik, sàlà kasa iwechi yau, tàwà nechii ipokonpe kechii, iwekkuli'matoppe.

¹⁵ Tùse eyeyaton kon pe kùkkuttàu, wapùla làkku, yekamappotàk kon àtonpa kon kasa.

Tewin Itekkwalok Lùppù Mayin

¹⁶ Tàwà Itepulu echitonpa pe we'nàtok ke elepai'nokon tùmàlà pe tàwàlà molopai i'nai yekwa yawàlà. Itepulu wechi màlà apyau'nokon.

¹⁷ Iulà, Paul, Uyemyatù ke, sàlà menukayan: “Wakù pe na' messatàu?” tetok. Sàlà kasaichi tamù'nawolon kaleta menukanài Iulà; uyesek ipona.

¹⁸ Tàwà wakù pe we'nàtok Kùyepulu Jesus Christ winàpaino apyau'nokon nechii tamù'nawolon kon.