Santiago 5 - Nuevo Testamento Uwotjüja

Pärätä ruwotürü ä'kanä̧ jiäwinü̧ wȩnȩ

¹ ¡Ukutu ruwotümä̧ pi̧yȩ pädü adiu ä̧ju̧kuä̧tu̧kui̧! ¡ajuäkuäu wopätukui, usurä kuȩmä̧wä̧tu̧kuä̧kuȩ tü'küwächa'attü̧!

² Kuiäretuku rü̧ä̧nä̧ mikuäumä̧ täkü pparuwächa'a; ku'katäwätiyu̧tu̧ku̧'i̧nä̧ isotü ttukui'ü.

³ Ja̧'wa̧ta̧nü̧ kuiäretuku pärätä'i̧nä̧ Oro'i̧nä̧ ü̧tä̧nȩkuä̧chi̧na̧'a̧, ja̧u̧ jä̧kua̧'a̧ ji̧yȩtȩ ukuturu kka̧kuä̧mȩ'ü̧ to̧ä̧kuȩmä̧ ja̧'wa̧ta̧nü̧ kuidepätukumä̧ okuränä̧ kuo'ü ikua'a jä̧'i̧nü̧'a̧nü̧ si'epü i̧kuä̧kuȩmä̧. Rüjí mo̧ro̧ ja̧'a̧ku̧ ka̧ka̧tü̧ kutä'ijätuku jä̧kua̧'a̧.

⁴ Adikuä ttü̧ja̧ kui'ättatükuttü u̧wä̧ju̧ ka̧ka̧tü̧ aditinä̧tü̧mä̧ kuimitätukuokomȩ ji̧no̧mȩnä̧, chi̧mi̧täkuotüjä̧ päkuinä̧tukua'anä̧ kuyaparewinä̧tu̧kuä̧u̧mä̧, kuimitätukuatü pä'ü wotta'a Dio o'kajuiyünä̧ ju̧ru̧wa̧mä̧ ä̧ju̧kui̧nü̧.

⁵ Pi̧jä̧nä̧ttü̧mä̧ adiu a̧'kua̧kui̧'ü̧, ja̧'wa̧ta̧nü̧ kuidepätuku pä̧wä̧rü̧jü̧nä̧ päkäyä ubärewächa'a jä̧'i̧nü̧'a̧nü̧ ku̧ja̧kuä̧'i̧jä̧tu̧kua̧'a̧nä̧ ¡Täkü ukuturu kuä'äu tti̧kuä̧kuȩ mo̧ro̧ rȩbȩä̧kuä̧wa̧'a̧!

⁶ Ukutumä̧ suronä̧ jȩpo̧ko̧tü̧rü̧ wȩnȩtä̧'chü̧, ja̧'wa̧ta̧nü̧ ttürowäwa pä'ü'i̧nä̧ jerupätürü kuä'äu ikuinä̧tü̧jä̧.

Tta̧mi̧'ki'ächi'ü tta̧wä̧rä̧kuä̧wä̧ wȩnȩ

⁷ Ja̧'wa̧nü̧ ja̧'a̧nä̧ chawaruwä chü̧jä̧wa̧tü̧, ukutumä̧ tü̧ä̧nä̧wa̧ ichomȩbü päi'ünä̧ kua̧mi̧'ki'ächi'ü tta̧'a̧rä̧tu̧kui̧. Kuäwä kku̧nä̧wä̧ i̧sa̧ u̧wä̧ju̧ adiu jo̧mȩnü̧ ja̧'a̧ ü̧ka̧ka̧ta̧ pä'ümä̧ a̧'ȩ juwa'anä̧ a̧mi̧ 'ki'ächi'ü tta̧'a̧rü̧ kkü̧

⁸ Ja̧'wa̧ta̧nü̧ ukutu'i̧nä̧ kua̧mi̧ 'ki'ächi'ü, jo̧mȩnü̧ 'kiyünä̧ tta̧'a̧rä̧tu̧kui̧, isopäi'ünä̧ Tü̧ä̧nä̧wa̧ ppa̧wä̧chä̧kua̧'a̧mä̧ täkü tü'küwächa'a.

⁹ Chawaruwä chü̧jä̧wa̧tü̧ kkorotünü̧rü̧mä̧ päkuä'chätukuä Dio ro̧ȩpü̧ juiyätukuaku pä'ümä̧; ja̧'wa̧ta̧nü̧ Juez-mä̧ täkü äpate ä'ka kkü̧.

¹⁰ Chawaruwä chü̧jä̧wa̧tü̧, profeta-tü̧ Tu̧ru̧wa̧ i̧mi̧nä̧ usurä ttȩmä̧wi̧nü̧ ja̧'wa̧ta̧nü̧ tta̧mi̧ 'ki'ächi'ü tta̧'a̧rü̧ ttü̧ja̧kui̧nü̧ta̧'a̧nü̧ ukutu'i̧nä̧ ja̧'wa̧nü̧tä̧ kka̧kuä̧tu̧kui̧.

¹¹ Ja̧'wa̧ta̧nü̧ ujutumä̧ usurä ttȩmä̧wa̧'a̧nä̧ ttujuruku tta̧mi̧ 'ki'ächi'ü kka̧kuä̧tü̧rü̧ eseu kka̧kuä̧tü̧ pä'ätüjä̧. Ukutumä̧ Job usurä ȩmä̧wa̧'a̧nä̧ a̧mi̧ 'ki'ächi'ü ü̧ji̧nü̧ wȩnȩ'i̧nä̧, ja̧'wa̧ta̧nü̧ rüjinä̧ ü̧ä̧nä̧wa̧ Dio-mä̧ tta̧'a̧nü̧ jȩpü̧ esekuinä̧ku̧ttü̧ pä'ü'i̧nä̧ ä̧ju̧kui̧nä̧tü̧jä̧, isopäi'ünä̧ tü̧ä̧nä̧wa̧mä̧ rȩrü̧jü̧ toäkuäwä i̧sa̧ ja̧'a̧ttü̧ rȩrü̧jü̧nü̧ topü ppä'ädü.

¹² Chawaruwä chü̧jä̧wa̧tü̧ kkorottü'i̧nä̧ abonä̧nü̧mä̧, mo̧ro̧jä̧ i̧mi̧nä̧'i̧nä̧, pi̧jä̧ i̧mi̧nä̧'i̧nä̧, yoriso kkorojuei i̧mi̧nä̧'i̧nä̧, juramento pättüjueinä̧mä̧ jȩ'kuä̧tu̧kuä̧. «A̧» pä'ätümä̧ jueünä̧tä̧ «A̧» pä'ätukui; ja̧'wa̧ta̧nü̧ «ja̧'wa̧nü̧mä̧kü̧» pä'ätümä̧, jueünä̧tä̧ «ja̧'wa̧nü̧mä̧kü̧» pä'ätukui. Dio ro̧ȩpü̧ juiyätukuaku pä'ümä̧.

Dio-rü ukuokuäkuäwä wȩnȩ

¹³ Ukututtü ya̧tȩ a̧'kua̧ tta̧wȩku̧ttü̧mä̧, Dio-rü ukuokui, ja̧'wa̧ta̧nü̧ ya̧tȩ a̧'kua̧ adiuttümä̧, eseu ra̧'i̧.

¹⁴ Ja̧'wa̧ta̧nü̧ ya̧tȩ na̧wä̧chü̧ttü̧mä̧ igresia-ttü ukuo isotürü, wopätukui, jua̧u̧ru̧ tü̧ä̧nä̧wa̧ i̧mi̧nä̧ unä̧ aceite tu'epü Dio-rü ttukuokuäkua'anü̧.

¹⁵ Ja̧'wa̧ta̧nü̧ kua̧'kua̧ wȩnä̧rü̧ kkä̧nü̧ Dio-rü kukuokuätukuomȩnä̧mä̧ na̧'ä̧chü̧mä̧ u̧mä̧richeittümä̧ ü̧'i̧pä̧kua̧, ja̧'wa̧ta̧nü̧ tü̧ä̧nä̧wa̧mä̧ ä̧rä̧bȩ'ä̧kua̧; surojü jȩä̧'i̧jü̧ttü̧'i̧nä̧ jȩpo̧kü̧ päji 'kua̧rü̧nä̧ eseku i̧kuä̧kua̧.

¹⁶ Ja̧'wa̧nü̧ ja̧'a̧ttü̧ surojü jȩ'kuä̧'i̧jä̧tu̧ku̧mä̧ kkorotünü̧ku̧ ji'äkuäu ikuätukui, ja̧'wa̧ta̧nü̧ kkorotünü̧ku̧ Dio-rü ukuokuätukui nattä̧chä̧ji̧ ttü̧'i̧pä̧kua̧'a̧nü̧. Adiu jȩä̧kuä̧wä̧ i̧sa̧ Dio-rü ukuokuomȩnä̧mä̧ ujuru kka̧'a̧.

¹⁷ Profetas Elía-mä̧ ujututa'anü̧ ttü̧ja̧ i̧sa̧ jü̧nä̧ winü̧, ja̧'wa̧ta̧nü̧ a̧'kua̧ wȩnä̧rü̧ kkä̧nü̧ ajiya ichü juiya pä'ü Dio-rü ukuokuomȩnä̧mä̧ ajiyamä̧ wäbodäkuä años 'kuäo'ünä̧nü̧ jo̧mȩnä̧ ichoka'a ji̧na̧'a̧

¹⁸ Jua̧u̧nü̧ o'ka'a pä'äjita'anü̧ Dio-rü ukuokuomȩnä̧ ä'koji jä̧ji̧ta̧'a̧nü̧ mo̧ro̧jä̧ttü̧ ajiyamä̧ ichina̧'a̧, ja̧'wa̧nü̧ jo̧mȩnä̧ rȩjȩttü̧ ba'i'ü kuäwä wȩji̧na̧'a̧.

Surojü jȩpü̧ ü'ärowächü wȩnȩ

¹⁹ Chawaruwä chü̧jä̧wa̧tü̧, ukututtü ya̧tȩ isopäi'ünä̧ wȩnȩttü̧ 'kȩi̧pä̧chü̧rü̧mä̧ ja̧'wa̧ta̧nü̧ kka̧ra̧mä̧ ä'koji jä̧ji̧ta̧'a̧nü̧ ppa̧wä̧chü̧nä̧ jȩä̧ku̧,

²⁰ Pi̧yȩ adiu wo̧jui̧'ä̧tu̧kui̧ ya̧tȩ surojü jȩpü̧rü̧ u̧mä̧nä̧ su̧rä̧jä̧mä̧ttü̧ ppa̧wä̧chü̧nä̧ ppa̧'a̧dü̧mä̧ wa'arettü ü̧ji̧pü̧nä̧ jȩpü̧, ja̧'wa̧nü̧ jo̧mȩnä̧ ttü̧ja̧ rekuätü surojü jȩttä̧'i̧jü̧ Dio jȩpü̧ ikunä̧ jȩpü̧.