Santiago 2 - Nuevo Testamento Uwotjüja

Rekuä rü̧jä̧u̧rü̧'i̧nä̧, järe ruwotürü'i̧nä̧ yoräteunä̧ toäkuäwä wȩnȩ

¹ Chawaruwä chi̧jä̧wa̧tü̧, ukutu ku̧ru̧wa̧ Jesucrito-rü esetinä̧tü̧mä̧ ya̧tȩrü̧tä̧ kuesekuätukua'anä̧, kka̧ra̧rü̧mä̧ kuesekuätukuoka'anä̧mä̧ jȩ'kuä̧'chä̧tu̧kuä̧.

^2-3 Isopäi'ünä̧ ka̧ka̧ku̧ ku̧'ȩjä̧tu̧kuo̧mȩnä̧ ya̧tȩ pärätä ru̧wa̧ üdo'chenä̧ oro i̧so̧bü̧ rü̧nä̧rü̧, ü̧'ka̧tä̧wä̧ta̧mä̧ adiwäjuei i̧sä̧ta̧ 'ka̧tä̧u̧ ichi'ürümä̧ «Juȩnȩtä̧ adiwomȩ pä̧mä̧di̧ pä'ätüjä̧» ja̧'wa̧ta̧nü̧ usurä i̧sa̧ ü̧'ka̧tä̧wä̧ta̧ täbo i̧sä̧ta̧ 'ka̧tä̧u̧ doächi'ürümä̧ «yȩna̧ja̧ kkä̧wi̧ ja̧'wa̧nü̧ jü̧ juiyüttü'i̧nä̧ rȩjȩtä̧ pä̧wi̧» pä'ätüjä̧;

⁴ Ja̧'wa̧nü̧ yorätewätü jü̧juiyünä̧ to'kuätukuomȩnä̧mä̧ adiwokomȩnä̧ amükuädü jȩpä̧tü̧jä̧.

⁵ Chawaruwä chü̧jä̧wa̧tü̧ pi̧yȩ adiu ä̧ju̧kuä̧tu̧kui̧: Dio-mä̧ pi̧jä̧nä̧ttü̧ usurä isotürü pojopü ȩmi̧nü̧ tta̧'kua̧ wȩnä̧rä̧kuä̧wä̧nä̧ ruwotü juotta pä'ü, ja̧'wa̧ta̧nü̧ eseu rȩpȩä̧u̧ru̧ Ru̧wa̧ Dio iäre ju'to uruwotü pätti'ünä̧, chi̧yä̧kua̧sä̧ päinü̧ ji̧nü̧ ttȩma̧ pä'ümä̧;

⁶ Ja̧'wa̧nü̧ ja̧'a̧nä̧ kua̧mü̧nä̧tu̧ku̧mä̧ kukuo teäkuäwokotüjä̧. ¿Jua̧u̧nu̧mä̧ ruwotümä̧kü̧ jä̧'i̧ja̧'a̧ ukuturu iyä'chü ikuä'ijätümä̧, ja̧'wa̧ta̧nü̧ ukuo ruwotü ttä'ka jo̧mȩ do'o'ü ȩpä̧'i̧jä̧tü̧mä̧?

⁷ ¿Juätütämä̧ jo̧ka̧ jä̧'i̧ja̧'a̧ tu̧ru̧wa̧ adiwä i̧mi̧nä̧ ukuturu jä'epinü̧rü̧ suronä̧ ukuokuä'ijätümä̧?

⁸ Isopäi'ünä̧ ukuo weäwä wȩnȩ päü'a̧kuä̧ jȩ'kuä̧tu̧kuo̧mȩnä̧ adiu jȩpä̧tü̧jä̧, ja̧u̧ wȩyu̧kuä̧ wȩnȩmä̧ pä'a: «kua̧mü̧nä̧ repekuäuta'anü̧ kua̧wa̧ru̧wa̧rü̧'i̧nä̧ eseunu̧ repe'i.»

⁹ Ja̧'wa̧nü̧ ja̧'a̧nä̧ ttü̧ja̧rü̧ yorätewätü jü̧nä̧ to'kuätukuoka'a jü̧ttü̧mä̧, surojü jȩpä̧tü̧jä̧ ja̧'wa̧ta̧nü̧ Dio-ttü weäwä wȩnȩnä̧mä̧ surojü jȩpä̧jä̧tü̧ jü̧nä̧tä̧ kka̧kui̧pä̧tü̧jä̧.

¹⁰ Ja̧'wa̧ta̧nü̧ ya̧tȩ weäwä wȩnȩ o'kajuiyünä̧tä̧ ukuota'anä̧, weäwä wȩnȩttü̧ ji̧yȩtȩtä̧ ukuotoka'a jü̧ttü̧mä̧, weäwä wȩnȩmä̧ o'kajuiyünä̧tä̧ ukuotokü.

¹¹ Ja̧'wa̧ta̧nü̧ chutä Dio-mä̧ pä'inü̧ «Irekua wokojuku, kkirekuo woküku suronä̧ jȩ'kuä̧tu̧kuä̧», ja̧'wa̧ta̧nü̧ «kuä'ü kuikuä.» Ja̧'wa̧nü̧ ja̧'a̧ttü̧ Irekua wokojuku, kkirekuo woküku suronä̧ jȩä̧'cho̧ka̧'a̧nä̧ kuä'ü ikuttümä̧, weäwä wȩnȩmä̧ ukuotokü.

¹² Ukutumä̧ kukuokuätuku'i̧nä̧, jȩ'kuä̧tu̧ku̧'i̧nä̧ ttu̧'ȩpä̧rä̧kuä̧wä̧tu̧kui̧, weäwä wȩnȩ surojüttü rä'epü ikunä̧ pojopü kku̧nä̧wo̧tü̧ jä̧'i̧nü̧'a̧nü̧.

¹³ Ja̧'wa̧ta̧nü̧ kkorotürü rȩrü̧jü̧nü̧ topokotü pä'ijätürümä̧, rȩrü̧jü̧ toäkuäwä juiyünä̧tä̧ ro̧ȩpä̧kuo̧tü̧, ja̧'wa̧nü̧ ja̧'a̧nä̧ rȩrü̧jü̧ toäkuäwä kku̧nä̧rä̧'i̧jä̧tü̧mä̧ Dio ro̧ȩpü̧ mo̧ro̧ adiu rä'opü tteseäkuäwäkuotü.

Tta̧'kua̧ wȩnä̧rä̧kuä̧wä̧mä̧ ttaditäwättü i̧jȩkuä̧cha̧'a̧

¹⁴ Chawaruwä chü̧jä̧wa̧tü̧, ¿däje ppäda'ajä̧ttü̧ yotüte ta̧'kua̧ wȩnä̧rä̧tü̧jä̧ pätta'anä̧ ttaditäwänä̧ tti̧jȩpo̧ka̧'a̧mä̧? ¿Ja̧u̧ tta̧'kua̧ ttu̧wȩnä̧rü̧tä̧ surojüttü ttü̧ji̧pü̧nä̧ ppädü'anü̧ tä̧jí̧?

¹⁵ Ja̧'wa̧ta̧nü̧ ta̧wa̧ru̧wa̧ ti̧jä̧wa̧ ja̧'wa̧nü̧ jü̧juiyüttü'i̧nä̧ tawaruwaju tüjäwaju ttü̧'ka̧tä̧wä̧ta̧ juiyüttümä̧ ja̧'wa̧ta̧nü̧ ttu̧kuȩ ttu̧kuä̧kuȩ'i̧nä̧ juittüttümä̧;

¹⁶ ukututtü ya̧tȩ adiutä tätukui, ku̧'ka̧tä̧wä̧ta̧ 'ka̧tä̧wi̧, sukuädi'ätukunä̧ o'kajuiyünä̧ kuätukui, jättäpäyotürü rekuä rü̧jü̧ kuiyätukuoka'ara̧'a̧ päkuätukuttümä̧ ¿däjetä ppädäkua'ajä̧ttü̧?

¹⁷ Tta̧'kua̧ wȩnä̧rä̧kuä̧wä̧'i̧nä̧ ja̧'wa̧nü̧tä̧ ja̧'a̧: ttaditäwänä̧ tti̧jȩpo̧ka̧'a̧jü̧ttü̧mä̧ kkorojuei wa'ü ikua'a jä̧'i̧nü̧'a̧nü̧ ja̧'a̧.

¹⁸ Ya̧tȩmä̧ päü'anü̧ ja̧'a̧: «ukumä̧ kua̧'kua̧ wȩnä̧rä̧kuä̧wä̧ ku̧ju̧nä̧rü̧jä̧, ja̧'wa̧ta̧nü̧ ttümä̧ adikuätä kku̧nä̧rü̧sä̧. Adikuä juiyünä̧ kua̧'kua̧ ku̧wȩnä̧rü̧tä̧ i̧jȩpi̧ttü̧ pärokua'aku cha̧'kua̧ wȩnä̧rü̧ chaditüku chi̧jȩpa̧'a̧nä̧.»

¹⁹ Dio-mä̧ ya̧tȩtä̧ ja̧'a̧ pä'ü esetüjä̧, ja̧u̧ kuesetümä̧ adiwa'a; ja̧'wa̧ta̧nü̧ ä̧wȩttü̧'i̧nä̧ esetü ye'ekumä̧ ttü̧'ä̧wä̧tü̧.

²⁰ Jȩru̧pa̧ 'kua̧rü̧mä̧ kkü̧jä̧, kua̧'kua̧ ku̧wȩnä̧ra̧'a̧nä̧ jȩ'ku̧ i̧jȩpo̧ka̧'a̧ jü̧ttü̧mä̧ kua̧'kua̧ ku̧wȩnä̧rü̧mä̧ ppädoka'a.

²¹ Dio-mä̧ tä̧do̧ mi̧nä̧ Abraha̧-rü̧mä̧, surojü jȩpo̧kü̧ 'kua̧rü̧nä̧ esekuinä̧ku̧, i̧tti̧ isaa-rü kku iku iyäwä jȩi̧no̧mȩttü̧.

²² Ja̧'wa̧ta̧nü̧ Abraha̧-mä̧ Dio-rü a̧'kua̧ i̧wȩnä̧rü̧mä̧, jȩpü̧ i̧jȩpi̧nü̧ ja̧'wa̧nü̧ jȩpü̧tä̧ a̧'kua̧ u̧wȩnä̧rü̧mä̧ jo̧mȩnü̧ jue'ekuächinü̧.

²³ Pa̧'a̧nü̧tä̧ 'kuäopina̧'a̧ wȩyu̧kuä̧ wȩnȩ pä'ijomȩmä̧, ja̧u̧mä̧ pä'a: Abraha̧-mä̧ Dio-rü esetinü̧ ja̧'wa̧nü̧ ja̧'a̧ttü̧, Dio-mä̧ surojü jȩpo̧kü̧ 'kua̧rü̧nä̧tä̧ esekuinä̧ku̧ ja̧'wa̧nü̧ jo̧mȩttü̧ Dio a̧wa̧ru̧wa̧ pä'ü ottinä̧ku̧.

²⁴ Ja̧'wa̧ta̧nü̧ täkü topätüjä̧, Dio-mä̧ ttü̧ja̧sa̧rü̧mä̧ aditäwänä̧tä̧'i̧nä̧ adiu jȩpü̧ jü̧nä̧tä̧ juo'epü, ji̧yȩtȩ a̧'kua̧ u̧wȩnä̧rü̧nä̧tä̧mä̧kü̧.

²⁵ Ja̧'wa̧nü̧ jü̧ta̧'a̧nü̧ 'kuäopina̧'a̧ Rahab, kkidepä iyä'chäkuäwä isajuru'i̧nä̧: Dio-mä̧ adiwä isaju jü̧nä̧ jȩpi̧nü̧, jittäwa pä'ü we'äwotürü mä̧nä̧ kko̧ro̧mä̧nä̧ rättopächünä̧ we'ü iku ppäjädomȩnä̧mä̧.

²⁶ Isopäi'ünä̧ Epíritu jä̧ttä̧pä̧ya̧nä̧ to̧'a̧mä̧ wa'ü iku jä̧'i̧nü̧'a̧nü̧ ja̧'a̧, ja̧'wa̧nü̧ jü̧ta̧'a̧nü̧ ta̧'kua̧ ttu̧wȩnä̧ra̧'a̧nä̧ ttaditokomȩnä̧ wa'ü ikua'a jä̧'i̧nü̧'a̧nü̧ ja̧'a̧.