Santiago 1 - Nuevo Testamento Uwotjüja

U̧ru̧wa̧ i̧mi̧nä̧ te'äwinü̧

¹ Dio'i̧nä̧ tu̧ru̧wa̧ Jesucrito'i̧nä̧ ttu̧mü̧wä̧ya̧, Sa̧ti̧a̧ku̧mä̧, Irae ttü̧ja̧ ttü̧jä̧pü̧ttü̧ ta̧ju̧nü̧ wotü tti̧tti̧mü̧ ruwäkuiyä pa̧ja̧ku̧nä̧ pperekuächinä̧tü̧rü̧ te'äusä.

Wo̧juä̧wä̧ wȩnȩmä̧ Dio-ttü icha'a

² Chawaruwä chü̧jä̧wa̧tü̧, kka̧kuä̧mȩ'ü̧ toä'chünä̧ rü̧ä̧nä̧ 'kuäkuopätukua'anä̧ kua̧mi̧ 'ki'ächi'ü yabokutä eseäkuäwätukui.

³ Ja̧'wa̧ta̧nü̧ täkü wo̧juä̧tü̧jä̧ kua̧'kua̧ ku̧wȩnä̧rä̧tu̧ku̧nä̧ pi̧jä̧ jäwä kka̧kuä̧mȩ'ü̧ toomȩnä̧mä̧ usurä ȩmä̧u̧ ttujuruku tta̧mi̧ 'kiächi'äkuäwä pä'ümä̧.

⁴ Ja̧'wa̧nü̧ ja̧'a̧nä̧ ja̧u̧ kujurutukunä̧ juekuächäkuäwära̧'a̧, ja̧'wa̧ta̧nü̧ jo̧mȩnü̧ buojuoäwära̧'a̧ kkoro'i̧nä̧ rekuä rü̧jü̧ juiyünä̧ ȩpa̧'a̧nä̧ kua̧mi̧ 'ki'ächi'ätukui.

⁵ Ja̧'wa̧ta̧nü̧ ukututtü ya̧tȩ wo̧juä̧wä̧ wȩnȩ juiüttümä̧, Dio-rü jä'epätukui, jua̧u̧tä̧ ja̧'a̧ o'katoi'ünä̧rü̧ rü̧ä̧nä̧ iyümä̧; ja̧'wa̧ta̧nü̧ yawokuoka'atä iyü.

⁶ Ja̧'wa̧nü̧ ja̧'a̧nä̧ kua̧'kua̧ wȩnä̧rü̧ kkä̧nü̧ iyäkua̧sä̧di̧ päkuoka'a jäkuepa'anü̧ ja̧'a̧; isopäi'ünä̧ a̧'kua̧ wȩnä̧ro̧kü̧mä̧, kkä̧rü̧'koppa kkä̧rü̧'ko̧wo̧mȩnä̧ aje ppawäbi ji̧jä̧ku̧ ȩpa̧'a̧ jä̧'i̧nü̧'a̧nü̧ wa̧.

⁷ Ja̧'wa̧nü̧ wa̧mä̧, chu̧ru̧wa̧ttü̧mä̧ ji̧yȩtȩ'i̧nä̧ chȩmä̧kua̧sä̧ pä'ümä̧ kuamükuädä.

⁸ Ja̧'wa̧ta̧nü̧ jitä mo̧ro̧mä̧ ji̧yȩtȩ amükuäda'anä̧, ja̧'wa̧ta̧nü̧ yo̧ä̧i̧ mo̧ro̧ kkoro amükuädäkua̧ ja̧'wa̧nü̧ wa̧mä̧ rekuomä̧ kko̧kü̧ jä̧kua̧.

⁹ Jesucrito-rü esetinü̧ ukuo te'äkuäwokümä̧ Dio ä'ka jo̧mȩttü̧ rü̧ȩnä̧ kuimikuäwa'a esewi;

¹⁰ Ja̧'wa̧ta̧nü̧ pärätä ru̧wa̧rü̧ Dio jui'ädü ikuttümä̧ esewi, jua'amä̧ pärätä ru̧wa̧ isä'kua u̧wä̧ju̧ jä̧'i̧nü̧'a̧nü̧ rekuomä̧ kko̧ko̧tü̧ ttäkuotü.

¹¹ Kkä̧wa̧ räo'omȩnä̧ rü̧ȩnä̧ du'i'ü, isä'kua joi'ü u̧wä̧ju̧mä̧ ttawäwächomȩnä̧ ja̧'wa̧ta̧nü̧ üadiwä'i̧nä̧ toeächü. Ja̧'wa̧nü̧ jä̧'i̧nü̧ta̧'a̧nü̧ pärätä ru̧wa̧mä̧ wa'ikuomȩnä̧mä̧ iäre pärätä'i̧nä̧ toe'ächäkua'a.

¹² Surojü kka̧kuä̧mȩ'a̧'a̧nä̧ ujuruku a̧mi̧ 'ki'ächi'ümä̧ eseäkuäwä u̧ju̧nä̧rä̧kua̧, jua'amä̧ ja̧u̧ 'kuä'o'ü jo̧mȩnü̧ pä'i'ümä̧ Dio rȩpȩä̧u̧ru̧ premio pättü chiyäkua̧sä̧ päinü̧ kkä̧kuä̧wä̧ i'ko ȩmä̧kua̧'a̧ttü̧.

¹³ Yotütettü surojü jȩtta̧ pä'ü kka̧kuä̧mȩ'ü̧ toä'chä̧u̧mä̧, Dio ja̧'a̧ kka̧kuä̧mȩ'ü̧ topü pä'ümä̧ kuamükuädätukuä, isopäi'ünä̧ Dio-mä̧ surojü jȩa̧ pä'ü kka̧kuä̧mȩ'ü̧mä̧ tookoku ja̧'wa̧ta̧nü̧ ya̧tȩrü̧'i̧nä̧ surojü jȩi̧ya̧rü̧ pä'ümä̧ kka̧kuä̧mȩ'ü̧mä̧ topä'chokü.

¹⁴ Ja̧'wa̧nü̧ ja̧jü̧jueimä̧ yotukunä̧mä̧ tta̧mü̧nä̧ pa̧ja̧tü̧ tidepä kkü'kekua'a ichütä wȩä̧u̧jä̧.

¹⁵ Ja̧'wa̧nü̧ ja̧'a̧ pi̧yȩ surojü kkü'kekuttümä̧ surojü jȩttü̧ uwäpächa'a; Ja̧u̧ suronä̧ jȩttü̧ rü̧'ä̧chü̧ jo̧mȩnü̧ buojuomȩnä̧mä̧; wa'aretä uwäpächa'a.

¹⁶ Chawaruwä chü̧jä̧wa̧tü̧, kuyapareäkuäwätukuä:

¹⁷ O'kajuiyünä̧ adiwäjuei'i̧nä̧, jueü jäwä'i̧nä̧ ujuturu iyümä̧ ju'tojuttü ichü ja̧'a̧, Dio mo̧ro̧jä̧ jäwä aditinü̧ttü̧. Dio-mä̧ 'kuäopünä̧tä̧ chutä ja̧'a̧: ja̧u̧nä̧mä̧ 'kä̧u̧nä̧'i̧nä̧, yo̧ü̧'i̧nä̧ juiya'a.

¹⁸ Chutämä̧, ja̧'wa̧nü̧tä̧ pä̧wä̧rü̧ji̧nä̧ku̧, isopäi'ünä̧ wȩnȩnä̧tä̧ kkä̧kuä̧wä̧ i'komä̧ iyinä̧u̧jä̧, uwäbe'inä̧u̧ttü̧ ä̧kuo̧mȩnä̧ u̧wä̧ju̧ wotüta pä'ümä̧.

Dio i̧wȩnȩ päü'a̧kuä̧ ukuotäkuäwä wȩnȩ

¹⁹ Chawaruwä chü̧jä̧wa̧tü̧ pi̧yȩ amükuädätukui: o'katoi'ünä̧ kuä̧ju̧kuä̧tu̧kua̧ pä'ümä̧ jo̧mȩnü̧ ku̧ja̧kuä̧tu̧kua̧'anü̧ ja̧'a̧; ja̧'wa̧nü̧ ja̧'a̧nä̧ rü̧ä̧nä̧mä̧ kukuokuätukuä ja̧'wa̧ta̧nü̧ jurunä̧mä̧ ku̧ra̧wä̧ri̧'ä̧tu̧kuä̧.

²⁰ Isopäi'ünä̧ pä̧i̧kua̧mä̧, Dio ä'ka jo̧mȩttü̧mä̧ adiwäjueimä̧ jȩpo̧kü̧.

²¹ Ja̧'wa̧nü̧ ja̧'a̧ttü̧ o'kajuiyünä̧ surojü jȩ'kuä̧tu̧ku̧ttu̧'i̧nä̧, pi̧jä̧nä̧ttü̧ surojü rü̧ä̧chü̧ttü̧'i̧nä̧ kä'ädi'ü, Dio i̧wȩnȩ ukuru iyinü̧tä̧ esetü ukuo teäwäkuäwä juiyünä̧ ȩmi̧; jua̧u̧tä̧ jä̧kua̧'a̧ surojüttü'i̧nä̧ kua̧'kua̧rü̧ kki̧'i̧pü̧nä̧ jȩü̧mä̧.

²² Ja̧'wa̧nü̧ ja̧'a̧nä̧ suro ä̧ju̧ku̧tä̧mä̧ kuä̧ju̧kuä̧; ji̧yȩnä̧tä̧ jȩpü̧ ku̧ja̧ pä'ütä ja̧'a̧, ja̧'wa̧nü̧ jü̧ juiyüttümä̧ kua̧mü̧nä̧tu̧ku̧tä̧ yapareäkuäwätüjä̧.

²³ Isopäi'ünä̧ ya'utekutä Dio i̧wȩnȩ ä̧ju̧kua̧'a̧nä̧ ja̧u̧ päü'a̧kuä̧ jȩpo̧kü̧mä̧, ya̧tȩ tti'ä toäkuäwodänä̧ i'ä toäkuäwa'a jä̧'i̧nü̧'a̧nü̧tä̧ wa̧:

²⁴ a̧mü̧nä̧ pa̧ja̧tü̧ toäkuäwa'anä̧ kkara'aku ijärächi'omȩnä̧ usurä jä̧ji̧mä̧ u̧ni̧chi'ü.

²⁵ Ja̧'wa̧nü̧ ja̧'a̧nä̧ ä̧ju̧kuä̧ji̧ unichi'okümä̧, ttu̧ni̧chi'äjueimä̧ weäwä wȩnȩ jueü wȩnȩmä̧ surojü rä'epü iku jü̧nä̧ adiu amükuädümä̧, ja̧'wa̧ta̧nü̧ ja̧u̧ päü'a̧kuä̧ 'chü̧mä̧ jȩü̧nä̧mä̧ eseutä ü̧jä̧kua̧.

²⁶ Ya̧tȩ Dio-rü esetüsä päa'anä̧ i̧nȩ jiyüdäkuäwä jȩru̧pa̧mä̧, chutä a̧mü̧nä̧tä̧ yapareäkuäu, ja̧'wa̧nü̧ jo̧mȩnä̧ Dio-rü esetüsä päümä̧ yoriso mikuäwoka'a.

²⁷ Jä'o Dio-rü esetäwämä̧ churutä eseäkuäwä ja̧'a̧ ja̧'wa̧ta̧nü̧ adiu jȩä̧kuä̧wä̧mä̧ reyotü usurä ȩmä̧wä̧tü̧rü̧'i̧nä̧, rȩkua̧mü̧rü̧'i̧nä̧ ppädäkuäwä ja̧'a̧, ja̧'wa̧ta̧nü̧ pi̧jä̧ jäwä surojuo'epünä̧mä̧ kuiditäkuäwätukuä.