Filipenses 1 - Nuevo Testamento Uwotjüja

Teäwinü̧ wȩnȩ

¹ Chawaruwä chi̧jä̧wa̧tü̧, Filipo ütawiyänä̧ kka̧kuä̧tü̧rü̧, diákunu̧ wotürü'i̧nä̧, Pató-tü̧ wotürü'i̧nä̧, te'äwätüjä̧, ujutu Jesucrito umüwäyotü päi'ünä̧ wotü Pauru'i̧nä̧, Timoteo'i̧nä̧ Jü̧nä̧.

² Tä'o Dio rȩrü̧jü̧ toü'i̧nä̧, wȩnȩ juiyünä̧ kkä̧kuä̧wä̧ iyü'i̧nä̧, ukutunä̧ kka̧ pä'ätüjä̧.

Pauru Dio-rü ukuokuinü̧ Jesucrito-rü esetätürü

³ Kko̧ro̧nü̧ jü̧ta̧'a̧nü̧ ukuturu chamükuädomȩnä̧mä̧, Chä'o Dio-rü eseusä;

⁴ Dio-rü chukuokuomȩnä̧mä̧ 'kuäopünä̧ eseunu̧ ukuokusä ukutu o'katoi'ünä̧rü̧ ja̧'a̧tȩ'ü̧;

⁵ jua'amä̧ jareü wȩnȩ jidäwomȩnä̧ ppä̧kuä̧dä̧rä̧tu̧kua̧'a̧ttü̧, ä̧kuo̧mȩnä̧ kuä̧ju̧kui̧nä̧tu̧kuo̧mȩttü̧ kkä̧mä̧dü̧ jitä mo̧ro̧bü päi'ünä̧.

⁶ Chu̧wo̧juä̧u̧nä̧ jä̧ku̧sä̧ isopäi'ünä̧ ukutunä̧ adiwä juei jȩpi̧nü̧mä̧, yabonü̧ aditü ikuäkua̧ pä'ü, Jesucrito ppa̧wä̧chä̧kuȩ mo̧ro̧bü päi'ünä̧.

⁷ Ukuturumä̧ o'katoi'ünä̧rü̧ ja̧'wa̧nü̧ adiwomȩnä̧ chamükuädünä̧ jä̧ku̧sä̧, cha̧mi̧so'kinä̧ chamükuä̧rä̧u̧ kuätukua'attü; isopäi'ünä̧ kärenä̧ chü̧'o̧mȩnä̧'i̧nä̧, ruwotü ttä'kattü jidäwomȩnä̧'i̧nä̧, jareü wȩnȩ jo̧mȩnü̧ rü̧ä̧chü̧nä̧, ukutumä̧ o'katoi'ünä̧ ttürü Dio iyinü̧ ppä'ädü usurä ȩmä̧wä̧tü̧jä̧.

⁸ Ja̧'wa̧ta̧nü̧ Dio-tä ja̧'a̧ ukutu o'katoi'ünä̧rü̧ repedü wo̧jua̧mä̧, Crito repe'ü eseuta'anü̧.

⁹ Ja̧'wa̧ta̧nü̧ Dio-rü chukuokuomȩnä̧mä̧ pi̧yȩ jä'epä'ijüsä: Ukutu eseu repekuäwätuku yaboku rü̧ä̧chä̧tu̧kua̧ku̧ pä'ü'i̧nä̧, o'katoi'ünä̧ yaboku adiwomȩnä̧ jȩä̧kuä̧wä̧ ku̧wo̧juä̧chä̧tu̧kua̧ pä'ü'i̧nä̧, jü̧nä̧.

¹⁰ Jua'amä̧ adiwäjuei ku̧wo̧juä̧tu̧kua̧ pä'ü. Ja̧'wa̧nü̧ kuätukuttümä̧ Jesucrito ichü mo̧ro̧ päi'omȩnä̧ surojü juikuätukuäkuotüjä̧ ya̧tȩ'i̧nä̧ surojü jȩ'kuȩ'i̧jü̧ päü juiyäkua'anü̧.

¹¹ Isopäi'ünä̧ Jesucrito ppäda'anä̧tä̧, adiwäjueimä̧ jȩ'kuä̧kuo̧tü̧jä̧ ttü̧ja̧ Dio-rü ukuotü tteseäkuäwarü pä'ümä̧.

¹² Chawaruwä chi̧jä̧wa̧tü̧, ku̧wo̧juätu̧kua̧ pä'üsä, isopäi'ünä̧ ttürü 'kuäopinü̧mä̧ jareü wȩnȩ rü̧ä̧chü̧nä̧ 'kuäopina̧'a̧.

¹³ Ja̧'wa̧ta̧nü̧ kärenä̧ chü̧'a̧'a̧mä̧ wo̧juä̧tü̧ ruwode su̧ro̧do̧u̧'i̧nä̧, kkorotü'i̧nä̧ o'katoi'ünä̧; Crito-rü ukuotomȩttü̧, kärenä̧ pü̧ pä'ümä̧.

¹⁴ Jua'a yabonä̧, kärenä̧ chü̧'a̧'a̧ wo̧jui̧'ü̧mä̧, chawaruwä chü̧jä̧wa̧tü̧mä̧, Crito ppäda'anä̧, Dio i̧wȩnȩmä̧ yabokutä yeäwä juiyünä̧ ji'äwätü.

¹⁵ Isopäi'ünä̧ yotukupünä̧mä̧ Crito ütü'kü ji'äwätü, ttürü tta̧mi̧suru topütä, ä'kuoyäutä ja̧'wa̧nü̧ ja̧'a̧nä̧ kkorotümä̧ eseunü̧tä̧ adiu ji'äwätü.

¹⁶ Ja̧'wa̧nü̧ ji'äwätümä̧ eseu ji'äwätü; jua̧u̧mä̧ pojopü ȩmi̧nä̧ku̧ jareü wȩnȩ aboiyotürü suronä̧ jȩttü̧ juiyünä̧ tta̧wa̧rä̧kuä̧wä̧ i̧sa̧ pä'ü ttürü ttu̧wo̧jua̧'a̧ttü̧;

¹⁷ Ja̧'wa̧nü̧ ja̧'a̧nä̧ kkorotümä̧ ji'äwätü Crito-rü pa̧ja̧kuä̧rü̧tä̧, wäjuönä̧ ttukuokuoka'a; kärenä̧ chü̧'a̧'a̧nä̧ ttürü surojuottepa pä'ü.

¹⁸ Ja̧'wa̧nü̧ ja̧'a̧nä̧ ¿wä̧i̧nä̧ ja̧'a̧? täkü rüjinä̧mä̧, jueünä̧ jittäwaja pä'ü'i̧nä̧, ä'kuoyäwä'chü jittäwaja pä'ü'i̧nä̧, ji̧nä̧somä̧ Crito ütü'kü jittäwa'amä̧ adiwa'a. Ja̧'wa̧nü̧ ja̧'a̧ttü̧ eseusä. Ja̧'wa̧ta̧nü̧ yaboku chesewä̧kua̧sä̧,

¹⁹ pi̧yȩmä̧ o'kajuiyünä̧tä̧, Dio-rü kukuokuätukua'attü̧, Jesucrito a̧'kua̧ru̧wa̧ Epíritu-nä̧ ppäda'attü rädopä̧kua̧sä̧ kärenä̧ttü̧mä̧ pä'ü wo̧jua̧sä̧.

²⁰ Ja̧'wa̧ta̧nü̧ rü̧ȩnä̧ tta̧'ä̧rü̧sä̧, Dio-mä̧ suronä̧ chü̧ji̧pü̧nä̧mä̧ ja̧'a̧tä̧ tookä̧kua̧sä̧ pä'ü; pärokua'akutä jua̧u̧ ja̧jü̧ jueimä̧ Crito-mä̧ ji̧yȩnä̧tä̧ uruwo i̧jȩpä̧kua̧ chidepänä̧mä̧, cha̧'kua̧ra̧ja̧ pä'ü'i̧nä̧, 'korujuodächaja pä'ü'i̧nä̧, jü̧nä̧.

²¹ Isopäi'ünä̧ ttürümä̧, pi̧jä̧ttü̧ kkä̧kuä̧wä̧mä̧ Crito-tä ja̧'a̧ ja̧'wa̧nü̧ ja̧'a̧nä̧ 'korujuoächäkuäwämä̧ mikuä po̧kui̧kuä̧ ja̧'a̧.

²² Ja̧'wa̧nü̧ ja̧'a̧nä̧ pi̧jä̧ttü̧ cha̧'kua̧ra̧'a̧mä̧, Dio aditäwä yaboku chadita pä'ü rekuä rü̧jä̧ku̧sä̧, ja̧'wa̧nü̧ jä̧ku̧ ¿ti̧yȩnä̧ chü̧ji̧pa̧'a̧ jä̧ttü̧? pä'üsä.

²³ Todärekue'ü rekuä rü̧jä̧ku̧sä̧, ji̧yȩtȩmä̧, Crito-ku chü̧ja̧ pä'ü, 'korujuodächa päda'anä̧, jua'amä̧ kkorottü'i̧nä̧ abonä̧nü̧ adiwa'attü̧;

²⁴ Ja̧'wa̧nü̧ ja̧'a̧nä̧, pi̧jä̧nä̧ cha̧'kua̧ra̧ pä'ü rü̧ȩnä̧ rekuä rü̧jä̧ku̧sä̧, ukuturu rekuä rü̧ja̧'a̧ttü̧.

²⁵ Ja̧'wa̧nü̧ jä̧ku̧ cha̧'kua̧ wȩnä̧rü̧sä̧, ji̧nä̧ ukutu o'katoi'ünä̧ku̧ pi̧jä̧nä̧ chü̧jä̧kua̧sä̧ pä'ü, ukuturu rekuä rü̧ja̧'a̧ttü̧, kua̧'kua̧ wȩnä̧rü̧ yaboku weyejuo'ü kuesewätukua pä'ü.

²⁶ Ja̧'wa̧nü̧ ja̧'a̧ttü̧, pä'äjita'anü̧ jua'a ku̧jä̧tu̧kua̧'a̧ chichomȩnä̧mä̧, Jesucrito-rü rü̧ȩnä̧tä̧ kuesewätukuäkuotüjä̧, ttü jäwänä̧.

Jareü wȩnȩ päü'a̧kuä̧ kkä̧kuä̧wä̧ wȩnȩ

²⁷ Ji̧yȩtȩtä̧ jädepä̧u̧jä̧, Crito i̧wȩnȩ jareü wȩnȩ päü'a̧kuä̧ ku̧ja̧kuä̧tu̧kua̧ pä'ütä. Ukuturu topü chichüttü'i̧nä̧, chichü juiyüttü'i̧nä̧, ji̧nä̧ ji̧yȩtȩnä̧ ku̧jä̧tu̧kua̧'a̧, usurä kuȩmä̧wä̧tu̧kua̧'a̧ ukuowa'a chä̧ju̧kua̧ pä'üsä, jareünä̧ tta̧'kua̧ wȩnä̧rä̧kuä̧wä̧ wȩnȩnä̧,

²⁸ kuaboiyotü pättä'chümä̧ yekuekuätukuä. Ja̧'wa̧nü̧ yekuekuätukuttümä̧, täkü juiyupätü pä'ü ttu̧wo̧jua̧'a̧ttü̧ ja̧'wa̧nü̧ ja̧'a̧nä̧ ukuturumä̧ ra̧wä̧pi̧jü̧ttü̧ kki̧'i̧kuä̧ wȩnȩ ja̧'a̧. Ja̧'wa̧nü̧ ja̧'a̧ttü̧, jua̧u̧mä̧ Dio-ttü ichü ja̧'a̧.

²⁹ Isopäi'ünä̧ Dio-mä̧ ukuturu adiwä juei iyinü̧, suro Crito-rü kuesetätukua pä'ütämä̧kü̧, Jua̧u̧ jäwänä̧ usurä kuȩmä̧wä̧tu̧kua̧ pä'ü'i̧nä̧, iyinä̧u̧jä̧.

³⁰ Isopäi'ünä̧ ttü usurä ȩmä̧u̧ 'chu̧dä̧rä̧kuä̧wa̧'a̧ to'kuinä̧tu̧ku̧mä̧ jitä'i̧nä̧ wo̧juä̧tü̧jä̧ usurä ȩmä̧u̧ 'chu̧dä̧rä̧kuä̧u̧mä̧.