2 Tesalonicenses 3 - Nuevo Testamento Uwotjüja

Dio-rü ttukuokua pä'ü jä'epinü̧

¹ Chi̧jä̧wa̧tü̧, rüjinä̧mä̧, ujuturu'i̧nä̧ Dio-rü kukuokuätukua pä'ü jätepä̧u̧jä̧, kkoromȩ pünä̧ o'kajuiyünä̧tä̧ Tu̧ru̧wa̧ i̧wȩnȩ jitätä ja̧'a̧ku̧ rȩbȩwä̧kua̧'a̧nü̧, ja̧'wa̧ta̧nü̧ ukutu ȩmü̧ kuesewinä̧tukuta'anü̧ kkorotü'i̧nä̧ ȩmü̧ ttesewäkua'anü̧.

² Ja̧'wa̧ta̧nü̧ Dio-rü ukuokuätukui suronä̧ amükuädätürü'inä, suronä̧ jȩpä̧tü̧rü̧'i̧nä̧, ujuturu to'ija̧'a̧ku̧ jȩttü̧ juiyäkua'anü̧. Isopäi'ünä̧ o'katoi'ünä̧mä̧ tta̧'kua̧ wȩnä̧rä̧kuä̧wä̧ jui'ätü.

³ Ja̧'wa̧nü̧ ja̧'a̧nä̧ Tu̧ru̧wa̧mä̧ adiwä i̧sa̧, kua̧mi̧ 'ki'ächi'ü ku̧ja̧kuä̧tu̧ku̧nä̧ jȩä̧kuä̧u̧jä̧ surojü 'kuäopomȩnä̧'i̧nä̧ tta̧wä̧rä̧kuä̧u̧jä̧.

⁴ Ja̧'wa̧ta̧nü̧ Tu̧ru̧wa̧nä̧tä̧ ta̧'kua̧ wȩnä̧rä̧tü̧jä̧ ukutu jȩ'kuä̧tu̧ku̧mä̧ ja̧'wa̧ta̧nü̧ wetinü̧ porü yaboku jȩ'kuä̧tu̧kuä̧kuȩ'i̧nä̧.

⁵ Tu̧ru̧wa̧tä̧ ppä̧dä̧kuä̧u̧jä̧ Dio eseuta'anü̧ kuesewätukunä̧ usurä kuȩmä̧wä̧tu̧kuo̧mȩnä̧ Crito ujuru ku̧ju̧nä̧rä̧kuo̧tü̧jä̧.

O'katoi'ünä̧ ttadita pä'ü ja̧'a̧

⁶ Chi̧jä̧wa̧tü̧, Tu̧ru̧wa̧ Jesucrito i̧mi̧nä̧ jätepä̧u̧jä̧, kua̧wa̧ru̧wa̧ Igresia-ttü weäwä wȩnȩ ukuotokü ja̧'wa̧ta̧nü̧ ujutu tu̧wo̧juȩti̧nü̧ esetokotüttümä̧ 'kȩi̧pä̧chä̧tu̧kui̧.

⁷ Isopäi'ünä̧ ukutumä̧ wo̧juä̧tü̧jä̧ ujutu to'ka'anä̧ tti̧'cha̧ pä'ü kkä̧kuä̧wä̧mä̧: ujutumä̧ ukutu ku̧'kä̧tȩtu̧ku̧ttu̧mä̧ ütäwe'ä'chü taditoka'amä̧ kko̧ko̧tü̧ pinä̧tü̧jä̧,

⁸ mipponä̧mä̧ kkorotü ttu̧kuȩttü̧mä̧ kuokotü pinä̧tü̧jä̧. Ja̧'wa̧nü̧ jȩtta̧jue'imä̧ mo̧ro̧'i̧nä̧, yodo'i̧nä̧ 'kuäo'ünä̧ aditü usurä ȩmä̧u̧ borepäkuäwinä̧tü̧jä̧ ukututtü ya̧tȩrü̧ pä'ü'i̧nä̧ a̧mä̧kü̧ juiya pä'ümä̧.

⁹ Isopäi'ünä̧ ukutu ppäkuädätukua pä'ümä̧ jätepü'anü̧ ja̧'a̧nä̧, ujutumä̧ aditinä̧tü̧jä̧, ukutu'i̧nä̧ taditüta'anü̧ aditü weyejuokuätukua pä'ü tu̧wo̧juȩta̧'a̧ttü.

¹⁰ Ukutuku tü̧ja̧kui̧nü̧mä̧, wȩti̧nä̧u̧jä̧ jȩ'kuä̧tu̧kua̧ pä'ü pi̧yȩ: adita pä'okümä̧, u̧kuȩmä̧ kuokü.

¹¹ Ja̧'wa̧nü̧ ja̧'a̧nä̧ tä̧ju̧ku̧nä̧ jä̧u̧jä̧, ukututtü ya̧ku̧nä̧mä̧ tu̧wo̧juȩti̧nü̧ ütäwe'ü ttaditoka'atä ttü̧ja̧kua̧'a̧, ja̧'wa̧nü̧ kkä̧nü̧ kkorotü jäwätä mȩtto̧pä̧ra̧'a̧.

¹² Ja̧'wa̧nü̧ ttaditoka'a kka̧kuä̧tü̧rü̧ Tu̧ru̧wa̧ Jesucrito i̧mi̧nä̧ jä'epünü̧ ttadita pä'ü we'ätüjä̧, tta̧mü̧nä̧ ttaditäwä mikuätä kuä̧nü̧ unichä̧rü̧ ttü̧ja̧kua̧ pä'ü.

¹³ Ja̧'wa̧nü̧ ja̧'a̧nä̧, chi̧jä̧wa̧tü̧ adiwäjuei jȩpü̧ ku̧ja̧kuä̧tu̧ku̧mä̧ 'kuäkuächi'ätukuä.

¹⁴ Pojä wȩyu̧kuojänä̧ wȩyu̧tu̧ wetü ütäwe'ürümä̧ ttu̧'ȩpä̧rü̧nü̧ topätukui jua̧u̧ku̧ ppäkuächi'ätukuä chutä dä'ä ttuäkua'anü̧.

¹⁵ Ja̧'wa̧nü̧ ja̧'a̧nä̧ kua̧bo̧i̧ya̧ jü̧nä̧mä̧ ku̧ju̧nä̧rä̧tu̧kuä̧rü̧, ja̧'wa̧nü̧ ja̧jü̧ jueimä̧ kui̧jä̧wa̧ jü̧nä̧tä̧ ji'äu ro̧'ȩpi̧rü̧.

¹⁶ Ja̧'wa̧ta̧nü̧ chutä Tu̧ru̧wa̧tä̧ wȩnȩ juiyünä̧ kkä̧kuä̧wä̧ i̧sa̧ ja̧'a̧ttü̧, kkoromȩttü̧'i̧nä̧ 'kuäopünä̧tä̧ unichä̧rü̧ ku̧jä̧tu̧ku̧nä̧ ppä̧dä̧kuä̧u̧jä̧. Tu̧ru̧wa̧mä̧ 'kuäopünä̧tä̧ ü̧jä̧kua̧, ukutu o'katoi'ünä̧ku̧.

¹⁷ Ttü, Pauru, pi̧yȩ chu̧mü̧nä̧ wȩyu̧tu̧ ukuturu te'äusä. Ja̧'wa̧ta̧nü̧ o'kajuiyünä̧ kuyäru ojiyä wȩyu̧tu̧ wedümä̧ rüjinä̧ chi̧mi̧ rütü, pa̧'a̧nü̧tä̧ wȩyu̧tu̧sä̧.

¹⁸ Tu̧ru̧wa̧ Jesucrito mippoünä̧ iyinü̧mä̧ ukuturumä̧ o'katoi'ünä̧tä̧ kuȩmä̧kuo̧tü̧jä̧.